Johan 9 - Zanniat Bible

Jesuh in Mitcawpa Cakruai I

¹ Jesuh tu ciatihin a vak laitak ah a nu pum songin a te ai panin mitcaw pa pakhat hmu i.

² A hnuahlunte in, “Sayapa, aisu ai sualhnak manin mitcaw in te ini? Amah ai sualhnak manin maw, a nu le pa ai sualhnak manin i?” tiin zawt tlang i.

³ Jesuh in, “A mit a cawhhnak heh amah ai sualhnak manin ilo i, a nu le a pate ai sualhnak manin khai ilo i. Pathian huham ai thil ti benhnak heh he pa cakruaihnak in larruai tuhin i.

⁴ Sun lak song hmuahhmuah i hlattu ai naper per kul i. Zan hleng cing tuh hang ai aisu khai naper per thil tuh nawn lo ising.

⁵ lailung ai i um songah kaimah heh lailung tleuhnak ing,” tiin ti i.

⁶ Ciatihin a ti hnuaah Jesuh in laipua ah cil thuih ai ciami cil in laivut a bekruai hnuaah ciami pa ai mit ah mat i.

⁷ Cia hnuaah, “Feh tulai Siloam Tili ah na hmai hliam tu,” tiin ti i. Siloam tu nalang tica i. Ciatihin ciami pa tu feh ai a hmai hliam i, khua hmu thil ai let i.

⁸ A innhnente le tun hlan ai rong ngen in a hmu awng de mite in, “Hemi pa heh to hmun in tangka a ngen awng detu ilo im?” tiin ti tlang i.

⁹ Mi hrekkhat in, “Amah rori i,” tiin ti i. Midang in, “Amah ilo i; amah bang midang i,” tiin ti i. Ciapa amah rori in, “Ning tihnak mi pa ing,” tiin ti i.

¹⁰ Anite in, “Akontih in tunah khua hmu thil leh isi?” tiin zawt tlang i.

¹¹ Ani in, “Jesuh tihnak pa in nawngbek tlawmniu bawn ai i mit ah a mat hnuaah Siloam ah feh tulai na hmai hliam tu iti i. A tihnak bangin feh ai hmai i hliam sawngpah in khuahmu thil leh ing,” tiin ti i.

¹² Anite in, “Ciapa tu akonah um i?” tiin zawt tlang i. Ani in,” Ling lo ing,” ti i.

Farasite In Zingzoi I

¹³ Cen anite in mit caw awng pa tu Farasite hnenah fehpui i.

¹⁴ Jesuh in nawngbek bawn ai a mitcawhnak a cakruai nia tu Sabbath nia i.

¹⁵ Ciamanin Farasite in a mit khua a hmuhnak thu zawt tlang leh i. Ani in, “I mit ah nawngbek mat i, cen i hmai hliam ai khua hmu thil ang menma ing,” tiin ti i.

¹⁶ Farasi mi hrekkhat in, “Hebang thil a bawntu pa tu Pathian hnenin a kawitu i tuh lo i, zaimantifangin Sabbath dan hlun lo i,” tiin ti tlang i. Midangte in, “Misual iselai hebang hnikhnaihhnak heh akontih in bawn thil tuh i?” tiin ti tlang ve i. Ciatihin amahte lakah khekdunhnak um i.

¹⁷ Ciamanin Farasite in ciami pa khiah thu zawt tlang lehthio ai, “Na mit varruai ikhaw ciami pa tu akontih in ruat isi?” tiin zawt tlang i. Ani in, “Prophet i tiin ruat ing,” tiin ti i.

¹⁸ Judah mi hotute in mitcaw pa thu khiah a nu le a pate zawt ngah hlanah mitcaw in te ai tunah khua hmu thil ti khiah sang nuam tlang hrimhrim lo i. Ciamanin a nu le a pate ko ai,

¹⁹ “Hemi pa heh ning fa im? Mitcaw in te i tiin ti i si; ciatih lekhaw akontih in tunah khua hmu thil ini?” tiin zawt tlang i.

²⁰ A nu le a pate in, “Ani tu kin fapa i ti ling i ing, cen mitcaw in te i ti ling i ing.

²¹ Ikhalselai akontih in tunah khua hmu thil leh ti le a mitcawhnak heh aisu in cakruai i ti tu ling kawm lo i ing. Amah zawt tu ih; upa zo hang ai amah in ning sawn thiam tuh i.

²² A nu le a pate in ciatihin rel kawm i, zaimantifangin Judah mi hotute a lau kawm manin i. Judah mi hotute in: aisu khai Jesuh heh Messiah i tiin sang ing a titute hmuahhmuah synagogue in suah tu seh, tiin lungkhimhnak nai tlang zo i.

²³ Ciamanin a nu le a pate in, “Upa ve zo i, amah zawt tu ih,” tiin a tihnak i.

²⁴ Mitcaw pa khiah a vel hnihhnak ko lehthio ai, “Thudik rel tuh ing tiin Pathian hmaiah thu kham tu! Na cakruaitu heh misual i hrimhrim i, ti ling i ing,” tiin ti i.

²⁵ Ciapa in, “Misual le misual lo kai in ling lo ing. Ikhalselai pakhat tu ling ing: mit i caw awng napui tun tu khua hmu thil zo ing,” tiin ti i.

²⁶ Anite in, “Akontih in na bawn i?” tiin zawt tlang i. Na mitcawhnak tu akontih in na cakruai i?” tiin ti tlang i.

²⁷ Ani in, “Ning rel zo napui ngai ning nuam tlang lo i. Zaimanin ling ning nuam lala heh i? Ning khai amah hluntu cang ning nuam ve im?” tiin ti i.

²⁸ Ciafangin anite in ciami pa tu cukcam tlang ai, “Nangmah sawn heh ciami pa ai hnuahluntu isi. Kin tu Moses ai hluntute i ing.

²⁹ Pathian in Moses hnenah thu rel i, ti ling i ing; ikhalselai khia pa tu a konteng in hleng i ti rin ling awng lo i ing!” tiin ti i.

³⁰ Ciapa in, “Hemi thu tu multing kul i! Ning incen a konteng in hleng i ti ling tlang lo i si, ikhalselai kai tu i mitcaw i varruai i!

³¹ Pathian in misualte ponkam ngai awng lo i ti ling ing; ikhalselai amah a upattu le a daihhnak a bawntute ai ponkam tu ngai i.

³² Mitcaw cia ai a tetu khua hmuruai bentu um i, ti khiah lailung a hampan in aisu inkhai ling awng lo ising.

³³ Hemi pa tu Pathian hnenin hlenghnak mi ihlah selai zaikhai bawnthilhnak nai tuh lo i,” tiin ti i.

³⁴ Anite in, “Sualhnak songah suak ai sualhnak songah a khangtu pa nang lamlam in maw thu kin zirh tum ve isi?” tiin ti tlang ai synagogue in hnawt teu i.

Rauhla Mitcawhnak

³⁵ Ciabang thil canghnak heh Jesuh in a za fangin ciami pa heh tawk ai, ‘Mi Fapa heh sang aw sim?” tiin zawt i.

³⁶ Ciapa in, “Bawipa, ciami pa tu aisu i? Amah sang thil tuhin i rel tu!” tiin ti i.

³⁷ Jesuh in, “Ani tu nangmah in hmu zo ai tun na pontu hnelhno heh i!” tiin ti i.

³⁸ Ciapa in, “Bawipa, sang ing!” ti kongin Jesuh hmaiah a khuk caicin ai bia i.

³⁹ Jesuh in, “Hemi lailung ah thukhan tuhin kawi ing; ciami tu mitcawte in khua hmu ai khua hmutute in mitcawhnak tuhin i,” tiin ti i.

⁴⁰ Farasi mi hrekkhat ciata ah um tlang ai ciatihin a relhnak a zatute in, “Kinmah khai mitcaw ve i si na ti nuamhnak im?” tiin zawt tlang i.

⁴¹ Jesuh in, “Mitcaw ita i silai mawhhlukhnak tuar tuh lo i si; ikhalselai khua hmu thil i ing ning tihnak manin mawhhlukhnak tuar ai ning sualhnak tang lai i,” tiin ti i.