Johan 8 - Zanniat Bible

A Sual Laitak Pommi Nupang

¹ Cen mi zongzong in amahte inn ṭen ah tlung sek i; ikhalselai Jesuh tu Olive Mual vumah feh i.

² A thangha zingniu in Biakinn ah feh lehsal i. Mi tampui a hnenah kawi i, cen Jesuh tu to ai thuzirh i.

³ Cialak fangin Danthiam sayate le Farasite in kangkawm sualhnak a bawn laitak rori a pommi nupang nu khiah koih ai mizapui hmaiah dingruai i.

⁴ Jesuh hnenah, “Sayapa, he nupang nu heh kangkawm sualhnak a bawn laitak rori ai pom i.

⁵ Kin dan songah Moses ai thupeciahnak bangin ciabang nupang tu lungto in a thi tian sep tuh i. Nang akontih in ruat isi?” tiin zawt tlang i.

⁶ Hetih ai amahte zawthnak tu Jesuh heh sual a si thil tuhin thang a tohhnak i. Ikhalselai Jesuh tu ut ai laipua ah a kutzung in lai ngan i.

⁷ Ciatihin thu zawt tlang thliahthlo manin Jesuh tu cang ngai in to ai anite hnenah, “Ningmah lakai sual nai lotu in hmasaber ah lungto in sep tu ih,” tiin ti i.

⁸ Cen ut lehthio ai laipua ah lai ngan lala i.

⁹ Ciami a za fangin amahte veksen in pakhat hnua pakhat tlan tlang sio i: Upa upa in tlan hmasa i. Cen Jesuh lek tang ai a hmaiah nupang nu ian ding i.

¹⁰ Cang ngai in to leh ai a hnenah, “Kon feh sio i? Mawh na hluktu tuhin aisu khai tang nawn lo awm?” tiin zawt i.

¹¹ Nupang nu in, “I, Bawipa, aisu khai tang lo i,” tiin ti i. Jesuh in, “Ciatih ilekhaw kai inkhai mawh na hluk tuh lo ing, tlung tulai sual nawn mah,” tiin ti i.]

Jesuh Tu Lailung Tleuhnak I

¹² Jesuh in Farasite hnenah, “Kai tu lailung ai tleuhnak ing. Aisu khai kaimah i hluntu in a nunhnak ah tleuhnak nai tuhai khuathim songah vak tuh lo i,” tiin ti i.

¹³ Farasite in a hnenah, “Na ihnak thu tu nangmah in rel isi. Ciamanin na relhnak heh zaikhai lang tlak lo i,” tiin ti tlang i.

¹⁴ Jesuh in, “I lo i; kaimah thu tu kaimah in i rel inrin i relhnak tu a dikmi i, zaimantifangin a konteng in hleng ing ti le a konteng ah feh tuh ing ti ling ing. Ning incen a konteng in hleng ing ti le a konteng ah feh tuh ing ti, i ling lo i si.

¹⁵ Ning incen minung ai taksa dan in thukhan de i si; kai cenin aisu vum ahkhai thukhanhnak bawn lo ing.

¹⁶ Ikhalselai thukhan inglai khai i thukhanhnak tu dik tuh i, zaimantifangin he thukhanhnak ah kaimah ian ilo ing, i hlattu pa khai i hnenah um i.

¹⁷ Ning dan laibu songah ‘Thulingtute pahnih lungkhim kawm lekhaw amahte relhnak tu a dik i,’ tiin um i.

¹⁸ I thu heh kaimah in rel ai i hlattu pa inkhai i thu heh rel ve i,” tiin ti i.

¹⁹ Anite in, “Na Pa tu akonah um i?” tiin zawt tlang i. Jesuh in, “Kaimah ituseh, i Pa ituseh ling tlang lo i si. Kaimah i ling le i sikhaw i Pa khai ling tuh ve i si,” tiin ti i.

²⁰ Hemi thute a relhnak tu Biakinn songah thu a zirhhnak thawhhlawm kuangte dahhnak khan ah a relhnak i. Cen aisu inkhai pom lo i, zaimantifangin a can khim lai lo i.

I Fehhnak Ah Feh Thil Tuh Lo I Si

²¹ Jesuh in anite hnenah, “Kai tu feh tuh ing; i si tlang tuh napui ning sualhnak songah ning thi tuh i. I fehhnak ahcen feh thil tuh lo i si,” tiin ti i.

²² Ciamanin Judah mi hotute in, “I fehhnak ah feh thil tuh lo i si, tiin kin ti i si. Amah veve rek dun tum ini tur im?” tiin ti tlang i.

²³ Jesuh in, “Ningte tu hnia lam mite i si; ikhalselai kai tu vum lam mi ing. Ningte tu he laivum in i si, kai tu he laivum in ilo ing.

²⁴ Ciamanin i ning sualhnak songah ning thi tuh i, i tihnak khiah! Cen ‘Kai tu Kaimah ing,’ ti khiah i sang hlah le i sikhaw ning sualhnak songah ning thi tuh rori i,” tiin ti i.

²⁵ Ciafangin anite in, “Aisu isi?” tiin zawt tlang i. Jesuh in, “A hampan ai i relhnak awng khiah i.

²⁶ Ning thula heh rel tuh tampui nai ing; mawhhluk tlak ning i zia khai heh tampui rel tuh nai ing. Ikhalselai i hlattu cenin sangtlak i ai a hnenin i linghnak ian khiah he lailung ah than ing,” tiin ti i.

²⁷ Jesuh in amahte hnenah Pa ai thu a rel heh ling tlang lo i.

²⁸ Ciamanin anite hnenah, “Mi Fapa heh ning khaitar fangin, ‘Kaimah heh Kaimah ing,’ ti khiah ling tlang tuh i si. Cen kaimah ai thunaihnak in zaikhai bawn lo ing; Pa in rel tuhin i ruaihnak ian rel i, ti ling tlang tuh i si.

²⁹ Cen i hlat tu khiah i hnenah um ai kaimah lek i zam awng lo i; zaimantifangin amah ai lungkhimhnak lek bawn ing,” tiin ti i.

³⁰ Hemi thu a relhnak a zatu mi tampui in Jesuh tu sang tlang i.

Miluat Le Salte

³¹ Ciamanin Jesuh in amah a sangtute hnenah, “I thuzirhhnak hlun le i sikhaw kaimah ai hnuahluntu peupeu i tuh i si;

³² thutak ling tuhai cia thutak in ning luatruai tuh i,” tiin ti i.

³³ Anite in, “Kin tu Abraham tesinfate i ing ai aisu ai sal khai i awng lo i ing. ‘Miluat ning cang tuh i,’ na ti fangin ziang na ti nuamhnak i?” tiin ti tlang i.

³⁴ Jesuh in anite hnenah, “Thutak ning rel ing: aisu khai ituseh sualhnak a bawntu khiah sual ai sal i.

³⁵ Sal tu innsang ah a zomzet in um thil lo i; ikhalselai fapa tu innsang ah a kumzangza in um i.

³⁶ Fapa in ning luatruai lekhaw miluat taktak i tuh i si.

³⁷ Abraham ai tesinfa i si, ti ning ling ing. Ikhalselai i rek tum thotho i si, zaimantifangin i thuzirhhnak pom thil lo i si.

³⁸ I Pa ai i hmuhhnak thu ning rel ing; ikhalselai ning tu ning pa ai ning relhnak khiah bawn i si,” tiin ti i.

³⁹ Anite in, “Kin pa tu Abraham i,” tiin ti tlang i. Jesuh in, “Abraham ai tesinfate ngaingai le i sikhaw a bawnhnak bang bawn tuh i si.

⁴⁰ Zaizongza i bawnhnak heh Pathian hnenin thutak i linghnakte ning relhnak i; ikhalselai ning incen a rek tuh ian i tum tlang i si. Abraham in ciabang thil zaikhai bawn lo i!

⁴¹ Ning tu ning bawnhnak heh ning pa ai bawnhnak i,” tiin ti i. Anite in, “Pathian amah ian heh kin Pa i ai kinmah heh a fa taktak i ing,” tiin ti tlang i.

⁴² Jesuh in anite hnenah, “Pathian heh ning Pa taktak iselai kaimah heh i daih tuh i si; zaimantifangin kaimah heh Pathian hnenin hleng ai tun heta ah um ing. Kaimah thuthu in kawi lo ing; amah in i hlat i.

⁴³ I relhnak heh zaimanin ling thil tlang lo i si? I thurelhnak heh tuar ben lo manin i si.

⁴⁴ Ning tu ning pa Satan ai fate i si; ning pa ai daihhnak hlun ning nuam ve i. A hampan in ani tu mirek i ai thutak lamah ṭang awng lo i, zaimantifangin ani tu a songah thutak um lo i. Ani in thudon a rel fangin amah ai dan hlun ve i, zaimantifangin ani tu thudonreltu i ai thudon hmuahhmuah ai paber i.

⁴⁵ Ikhalselai kai in thutak ning rel manin ning in i sang lo i si.

⁴⁶ Ningmah lakah sualhnak bawn isi, tiin i hmu bentu pakhat tal um aw i sim? Kaimah in thutak rel napui zaimanin i sang nuam lo i si?

⁴⁷ Pathian hnenin a hlengtu in Pathian ai ponkam ngai i. Ikhalselai ning tu Pathian hnenin a hleng mi ning ilo manin a thu ngai ning nuam lohnak i,” tiin ti i.

Jesuh Le Abraham

⁴⁸ Judah mite in Jesuh heh, “Nang tu Samaria mi i si ai na songah khuasia um i, kin ti fangin kin dik lo im?” tiin ti tlang i.

⁴⁹ Jesuh in, “Khuasia nai lo ing; kai in i Pa khiah songloih ing, ning in kai tu nau i tat tlang i si.

⁵⁰ Kaimah ca hmingphahnak si lo ing. Ikhalselai songlawihnak a situ pakhat um ai amah tu kaimah lam ṭang in thukhantu i.

⁵¹ Thutak ning rel ing: Aisu khai i thu a hluntu heh thi tuh awng lo i,” tiin ti i.

⁵² Anite in Jesuh tu, “Tun tu khuasia nai isi, ti kin fiang amam i! Zaimantifangin Abraham tu thi zo i, prophette khai thi zo sio i; ikhalselai nang in na thu a hluntute tu thi tuh lo i, tiin ti isi.

⁵³ Kin pa Abraham tu thi zo i; Abraham tahin lian sawn in ruat dun isim? cen prophette khai thi zo sek i; aisu ing tiin ruat dun isi,” tiin ti tlang i.

⁵⁴ Jesuh in, “Kaimah ai hmingthanghnak si lengkhaw ciami hmingthanghnak tu zaikhai i tuh lo i. Kai i songloihtu heh i Pa i ai ‘Kin Pathian i,’ ning tihnak rori i.

⁵⁵ Ning incen ling awng lo i si; ikhalselai kai cenin ling ing. Ani tu ling awng lo ing ti lengkhaw ningmah bang thotho in thudonreltu i tuh ing. Ikhalselai ani tu ling taktak ai a thu khai hlun ing.

⁵⁶ Ning pa Abraham tu i hleng tuhhnak tikcucan hmu nuam in umlam ngai i,” tiin ti i.

⁵⁷ Anite in, “Kum sawmnga rin na khim lai lo ikhaw akontih in Abraham tu hmu awng isi?” tiin ti tlang i.

⁵⁸ Jesuh in, “Thungai ning rel ing: Abraham a te hlan ahkhai um zo ing,” tiin ti i.

⁵⁹ Cen lungto khul ai sep tum tlang i, ikhalselai Jesuh tu relh ai Biakinn in tlan teu i.