Johan 6 - Zanniat Bible

Jesuh In Mi Thawng Nga Rongdo I

¹ Cia hnuaah Jesuh tu Galilee Tili khat lam ralah feh i. Cia Tili tu Tiberias Tili ti inkhai ko i.

² ngaihsunurkul a bawnhnak in miur tampui a cakruaihnak khiah hmu tlang zo manin miburpui in amah khiah hlun tlang i.

³ Jesuh tu mual vumah honkai ai ciata ah a hnuahlunte thawn to tlang i.

⁴ Kansuak Puai tihnak Judah mite ai puai tu nong ihang.

⁵ Cen Jesuh in khua a cuan fangin miburpui amah hnen kawi tlang murhmo khiah hmu ai Philip hnenah, “Minung he hmuah aih tuhin akonan rong lai tuh ising?” tiin zawt i.

⁶ Hetihin a zawthnak tu Philip a cu nuam manin i; a ngaingai in tifangin ziang bawn tuh ing ti ling cia zo i.

⁷ Philip in, “Mi pakhat in a tlawmniu ṭen co tuhin rin mi hezah aih tuhin ngun tangka zahnih man lai inrin tham tuh lo i,” tiin ti i.

⁸ A hnuahluntu ve midang pakhat, Simon Peter ai nau Andrew in,

⁹ Heta ah naupang pakhat um ai barley sang hlom nga le nga pahnih nai i. Ikhalselai minung hezah ca ahcen zaikhai rel tlak lo i,” tiin ti i.

¹⁰ Jesuh in, “Mizapui tu toruai tu ih,” tiin a hnuahlunte rel i. Ciata ah hampa tampui i. Ciatihin mizapui khiah to ai amahte veksen in mi thawng nga dung i.

¹¹ Jesuh in sang heh lang ai Pathian hnenah anghnak thu a rel hnuaah a totute hnenah zem i. Nga khai ciatih thotho in zem ai mizapui in amahte ai ben zah in ai tlang i.

¹² Rong ai ben fangin a hnuahlunte hnenah, “A valhnak khiah khul tusek ih; tlawmniu bangkhai lon lak tuh lo ising,” tiin ti i.

¹³ Ciatihin a valhnak khul tlang fangin barley sang hlom nga songin misenpui in ai tlang hnuaah a tanghnak bawm hlaihnih khul tlang i.

¹⁴ Jesuh ai bawnhnak ngaihsunurkul tu misenpui in hmu tlang fangin, “Laivum ah kawi tuh i, tihnak prophet tu amah rori i,” tiin ti tlang i.

¹⁵ Mizapui in amahte kumpibawi ah bawn tuhin khengkhebel in i pom tlang tuh i,” ti khiah Jesuh in ling i; ciamanin mual vumah amah niu lek feh i.

Ti Vumah Jesuh Vak I

¹⁶ Zan lam fangin Jesuh ai hnuahlunte tu tili lamah feh tlang ai,

¹⁷ lawng songah a to tlang hnuaah tili khat lam ral, Capernaum khua lamah let tlang leh i. Zan khuathim zo ai Jesuh tu amahte hnenah hleng lai lo i.

¹⁸ Cialak fangin khuahu roh ngai in zuang ai tilep tho dekdo i.

¹⁹ Lawng cawk tlang ai peng thum peng li a feh fangin Jesuh tu tili vumah vak in amahte lamah a kawi zianzo khiah hmu ai lau tlang ngai i.

²⁰ Ikhalselai Jesuh in, “Lau mah ih! Kaimah ing!” tiin ti i.

²¹ Cen Jesuh tu ang ngai in amahte lawng ah kairuai ai amahte feh nuamhnak hmunah a rai hlanah hleng tlang i.

Mipui In Jesuh Si Tlang I

²² A thangha fangin tili khat lam ral ai a umtu mizapui in ciata ah lawng pakhat ian um i, cia lawng songah Jesuh um lo ai a hnuahlunte ian feh tlang i, ti khiah ling tlang i.

²³ Tiberias in a hlenghnak lawng dangdang tepawl khai Bawipa in anghnak thu a rel hnuaah mizapui ai sang a aihnak hmun hiang tili kamah hleng tlang i.

²⁴ Ciata ah Jesuh le a hnuahlunte um lo i, ti khiah mizapui in hmu fangin ciata ai lawngte to in Jesuh si tuhin Capernaum ah feh tlang i.

Jesuh Tu Nunhnak Sang I

²⁵ Jesuh tu tili khat lam ralah hmu fangin misenpui in, “Sayapa, zaikom fangin heta ah hleng isi?” tiin zawt i.

²⁶ Jesuh in, “Thutak ning rel ing: “Ningmah in ngaihsunurkul i bawnhnak ning lingthiam manin i si tlang lo i si, sang kham ngai in ning ai tlang manin i.

²⁷ A hnawm thai rong caah naper mah ih; ikhalselai kumkhua nunhnak rong caah per tu ih. Ciami rong tu Mi Fapa ai ning pe tuhhnak i, zaimantifangin Pathian in a vumah a lungkhimhnak tacik khen zo i,” tiin ti i.

²⁸ Ciamanin anite in, “Pathian in bawn tuseh ti kin daihsahhnak bawn tuhin ziang bawn tuh i ing?” tiin zawt tlang i.

²⁹ Jesuh in, “Pathian in bawn tuseh ti ning daihsahhnak tu a hlat mi pa sang tuh khiah i,” tiin ti i.

³⁰ Anite in, “Kin mit in hmu ai na sangthilhnak tuhin zaibang ngaihsunurkul bawn tuh isi? Ziang i na bawn tuhhnak tu?

³¹ Lai Thianghlim songah ‘Aih tuhin vancung in sang pe i,’ tiin a um bangin kin pupate in nelrawn ramkhing ah khiah manna sang ai tlang awng i,” tiin ti tlang i.

³² Jesuh in, “Thungai ning rel ing: Moses ai ning pehnak tu vancung sang ngaingai ilo i. I Pa cenin vancung sang ngaingai ning pe i.

³³ Zaimantifangin Pathian ai pehnak sang cenin vancung in zuktolh ai laivum mite nunhnak a petu pa i,” tiin ti i.

³⁴ Anite in, “Bawipa, ciami sang heh kin pe tu ṭio law,” tiin ngen tlang i.

³⁵ Jesuh in anite hnenah, “Kai tu nunhnak sang ing. I hnenah a kawitu heh rikam tuh awng lo i; i sangtu heh tihal tuh awng lo i.

³⁶ Cen i relciahnak bangin a hmu cenin i hmu tlang zo napui i sang ning nuam lo i.

³⁷ I Pa ai i pehnak hmuahhmuah aisu khai i hnenah kawi tuh i. I hnenah kawitute tu aisu khai hnawl tuh lo ing.

³⁸ Zaimantifangin vancung in i zuktolh fangin kaimah ai daihhnak bawn tuhin tolh lo ing, i hlattu ai daihhnak bawn tuhin tolh ing.

³⁹ Cen i hlattu ai daihhnak tu hemi i: I pehnak hmuahhmuah khiah pakhat khai paitiar loin, ni hnuataber nia ah amahte veksen in thoruai tuh sio ing.

⁴⁰ Zaimantifangin i Pa ai daihhnak tu Fapa khiah hmu ai a sangtu hmuahhmuah kumkhua nunhnak ngah tuh khiah i. Cen ni hnuataber nia ah thoruai leh tuh ing,” tiin ti i.

⁴¹ “Kai tu vancung in hlenghnak sang ing,” a ti manin Judah mizapui tu phuncam tlang murhmo i.

⁴² Ciamanin, “Hemi pa heh Joseph ai fapa ilo im? A nu le a pate tu kin ling siohnak mi i! Akontih in vancung in hleng ing,” tiin ti thil hnelhno ini tur? tiin ti tlang i.

⁴³ Jesuh in, “Cam murhmo mahang ih!

⁴⁴ I hlattu pa in i hnenah kuat hlah lekhaw aisu khai i hnenah kawi thil tuh lo i; ciatih ai i hnenah a kawitute tu ni hnuataber nia ah nunhnak ah thoruai tuh ing.

⁴⁵ Prophette in, ‘Aisusu khai Pathian in zirh tuh i,’ tiin ngan awng i. Aisusu khai Pa ling ai a hnenah a zirtu in i hnenah kawi i.

⁴⁶ Hetihin i tifangin aisusu khai Pa khiah hmu zo i, tihnak ilo i; Pathian hnenin a hlengtu pa ian heh Pa a hmutu i.

⁴⁷ Thutak ning rel ing: a sangtu in kumkhua nunhnak nai i.

⁴⁸ Kai tu nunhnak sang ing.

⁴⁹ Ning pupate tu nelrawn ramkhing ah manna sang ai napui khaw thi thotho i.

⁵⁰ Ikhalselai vancung in a hlenghnak sang a aitu hmuahhmuah thi tuh lo i.

⁵¹ Kai tu vancung in a hlenghnak sang nung ing. Hemi sang a aitu heh kumzangza in nung tuh i. I pe tuhhnak sang tu he laivum in nunhnak ngah thil tuhin i pehnak i taksa i,” tiin ti i.

⁵² Ciatihin a ti manin amahte lakah thinraw eldunhnak tianin suak ai, “Akontih in he pa heh kin aih tuhin a taksa kin pe thil tuh ini tur?” tiin ti tlang dekdo i.

⁵³ Anite hnenah Jesuh in, “Thutak ning rel ing. Mi Fapa taksa ai loin a thisan khai ding hlah le i sikhaw ning songah nunhnak nai tuh lo i si.

⁵⁴ Aisu khai i taksa ai in i thisan a dingtu in kumkhua nunhnak nai ai ni hnuataber nia ah nunhnak ah thoruai tuh ing.

⁵⁵ Zaimantifangin i taksa tu rong taktak i ai i thisan tu ding tuhhnak ngaingai i.

⁵⁶ Aisu khai i taksa ai in i thisan a dingtu heh i songah nung i; cen kaimah khai a songah nung ing.

⁵⁷ A nungmi Pa in i hlat ai amah manin kaimah khai i nung ve i. Ciabang pah in kaimah i aitu in kaimah manin nung tuh ve i.

⁵⁸ Vancung ai a hlenghnak sang tihnak tu hemi i; ning pupate tu sang ai tlang ai a rai hlanah thi tlang thotho i; vancung in a hlenghnak sang heh ciatih ilo i. Hemi sang a aitu cenin kumzangza in nung tlang tuh i.

⁵⁹ Hemi tu Capernaum khua ai synagogue songah a zirh lai ai a relhnak tepawl i.

Kumkhua Nunhnak Pongkam

⁶⁰ Amah a hluntu tampui in ciami thu za tlang ai, “A thuzirhhnak tu a har ze i! Aisu in ling thil tuh i?” tiin ti tlang i.

⁶¹ A hnenah rel lo napui ciami thu ah phuncam tlang murhmo i, ti khiah Jesuh in ling ai anite hnenah, “Hemi in ning thinlung buaihnak suakruai i awm?

⁶² Santehhnak ah Mi Fapa heh hlanai a umhnak hmunah a feh leh khiah hmu i silai akontih in ti tlang tuh i si?

⁶³ Nunhnak taktak a petu cenin Rauhla i; minung ai taksa tu santlai lo i. Ning hnenai i relhnak ponkam heh rauhla i, nunhnak khai i.

⁶⁴ Ikhalselai mi hrekkhat in sang lo i si,” tiin ti i. Jesuh in a hampan in aisu heh i sang lotu tuh i, ti le aisu heh i zuartu tuh i, ti khiah ling zo sio i.

⁶⁵ Cen Jesuh in, “Hetih imanin nakhaw Pa in i hnenah kawiruai hlah lekhaw aisu khai i hnenah kawi thil tuh lo i, tiin i relhnak i!” tiin ti i.

⁶⁶ Ciamanin Jesuh hnuahluntu mizapui tu let in hlum berh i.

⁶⁷ Ciamanin a hnuahlunte hlaihnih khiah, “Ning tang tlan ning nuam aw ve im?” tiin zawt i.

⁶⁸ Simon Peter in, “Bawipa, aisu hnenah feh tuh cuang i ing? Kumkhua nunhnak petu ponkam naitu tu nangmah isi!

⁶⁹ Cen tun tu Pathian hnenin a kawitu Mi Thianghlim isi ti khiah sang ai ling ngah ihang ing,” tiin ti i.

⁷⁰ Jesuh in, “Ning hlaihnih heh kaimah ai rilmi i si, ilo im? Ikhalselai pakhat tu Satan i,” tiin ti i.

⁷¹ Hetih ai a ti san mi tu Simon Iskariot ai fapa Judas khiah i. Zaimantifangin Judas tu hnuahluntu hlaihnih lakah a teltu inapui Jesuh zuartu tuh i.