Johan 5 - Zanniat Bible

Tili Kamai Miur Cakruaihnak

¹ Cia hnuaah Jesuh tu Jerusalem ah Judah biahnak puai pakhat um ai feh i.

² Jerusalem khua Tuu Kotka tihnak hiangah tili pakhat um ai a kamah hlam panga um i. Ciami tili tu Hebrew in Bethzatha tiin ti i.

³ Cia hlam songah miur tampui zau tlang bial i. Hrekkhat tu mitcaw, hrekkhat tu kawngbai le hrekkhat tu a ze mite i.

⁴ (A cancan ah Bawipa ai vancungmi zuktolh de ai ti khiah hlinruai de i. Ciatihin ti a hlin sawng fangin tili songah a dawp hmasaber pawl heh amahte urhnak in cak de i. Ciamanin miurte in ti hlin tuh khiah iang tlang i).

⁵ Ciata ah mipa pakhat kum sawmthum le kum riat song urhnawm mi um i.

⁶ Ciata ah it ngiode khiah Jesuh in hmu fangin raipui ur zo i, ti khai ling i. Ciamanin Jesuh in, “Cak na nuam awm?” tiin zawt i.

⁷ Ciapa in, “Bawipa, ti a hlin fangin tili songah i nimtu tuh aisu khai um lo i. Tili songah tolh tuhin i zu laitak ah midang in i khel bengbo de i,” tiin ti i.

⁸ Jesuh in, “Tho tulai na ihphah lang in feh tu,” tiin ti i.

⁹ cia sawngpah ciami pa tu cak i; a ihphah lang ai feh i. Cia nia tu Sabbath nia i.

¹⁰ Ciamanin Judah mi hotute in cakhnak a ngahtu pa heh, “Tunnia tu Sabbath nia i ai na ihphah na phur heh kin Dan in daih lo i,” tiin ti tlang i.

¹¹ Ani in, “Kaimah i cakruaitu pa in na ihphah lang tulai feh tu, i ti hen!” tiin ti i.

¹² Anite in, “Ciatih ai na titu heh aisu i?” tiin zawt tlang i.

¹³ Ikhalselai cakhnak a ngahtu pa in Jesuh tu aisu i ti ling lo i, zaimantifangin ciata ah miburpui um tlang ai amahte lakah Jesuh feh zo teu i.

¹⁴ Leh hnuaah ciami pa tu Jesuh in Biakinn songah tawk ai, “Siktu! Tun tu na cak zo i; ciamanin sual nawn mahang. Ciahlahle na vumah thil sual amam hleng tuh i,” tiin ti i.

¹⁵ Cen ciami pa tu feh ai Judah mi hotute hnenah, “I cakruaitu tu Jesuh i,” tiin rel i.

¹⁶ Sabbath nia ah mi cakruai manin Jesuh tu ralcai ai harsahnak pe tlang i.

¹⁷ Jesuh in a hnenah, “I Pa tu naper ṭiode ai kaimah khai naper kul ve ing,” tiin ti i.

¹⁸ Ciatihin a ti manin Judah mi hotute tu thinraw tlang ai amah khiah rek tuhin tum tlang amam i; Sabbath a hnawmcan lek zolo in Pathian heh i Pa i, a ti manin Pathian tlukin bawn dun i tiin ruat tlang i.

Fapa Ai Thunaihnak

¹⁹ Ciamanin Jesuh in anite hnenah, “Thutak ning rel ing: Fapa in amah niu in zaikhai bawn thil lo i. A Pa ai bawnhnak a hmuhnak ian bawn i. Pa ai bawnhnak heh Fapa inkhai bawn ve i.

²⁰ Zaimantifangin Pa in a Fapa heh it ai a bawnhnak hmuahhmuah khiah hmuh sio i. Hemi tahin bawn tuh a thawmlian sawn khiah hmuh tuhlai ai ngaihsun ning ur tuh i.

²¹ Pa in mithi thoruai ai nunhnak a pe bangin Fapa inkhai a daih mite pohpoh hnenah nunhnak pe ve i.

²² Pa in aisu hnen ahkhai thukhanhnak bawn lo i. Fapa hnenah thukhanthilhnak pe zo i.

²³ Ciamanin Pa a upattu hmuahhmuah in Fapa khai upat tu ve seh. Aisu khai Fapa a upat lotu in a hlattu a Pa khai upat ve lo i.

²⁴ Thutak ning rel ing: aisu khai i relhnak za ai i hlattu sang lekhaw kumkhua nunhnak nai zo i. Thukhanhnak tawk tuh lo i; ciatihin thihhnak in nunhnak ah lut zo i.

²⁵ Thutak ning rel ing: Mithite in Pathian Fapa ai aw za tlang tuh i; a zatu hmuahhmuah in nunhnak ngah can hleng tuhai tun inkhai hleng betbo zo i.

²⁶ Pa Ani tu nunhnak ai a hampui i; ciabang thotho in Fapa khai nunhnak ai hampui cangruai zo i.

²⁷ Cen Fapa tu Mi Fapa a imanin thukhanhnak thupe i.

²⁸ Hetih imanin ngaihsunur mah ih; mithi hmuahhmuah in a aw za ai,

²⁹ amahte hlan songin suakhnak can hleng tuh i: thil pha a bawntute tu nung tuhin tho leh tuh i; cen thil sual a bawntute tu lon tuhin tho leh tuh ve i,” tiin ti i.

Jesuh Ca Thulingtu

³⁰ Jesuh in, “Kaimah thuthu in zaikhai bawn thil lo ing. Thukhanhnak bawn lengkhaw Pathian ai relhnak bangin bawn ing; ciamanin i thukhanhnak tu a dik i, zaimantifangin i daihhnak bawn tum lo ing, i hlattu ai daihhnak ian bawn tum ing.

³¹ Kaimah in kaimah ai thu ian rel lengkhaw i thurelhnak tu a dikmi ngaingai i, ti thil tuh lo i.

³² Ikhalselai kaimah caah i thu a reltu tuh midang pakhat um ai i thu a relhnak tu a dik i, ti ling ing.

³³ John hnenah ning palaite hlat ai amah in thutak rel i.

³⁴ Hetihin i ti fangin lingpuitu minung nai kul ing, iti nuamhnak ilo i; ohnak ning ngahthilhnak tuhin i relhnak i.

³⁵ John tu a ko ai a tleumi maikhuat bang i; a tleuhnak songah can comniu ian ning ang tlang i.

³⁶ Ikhalselai kaimah ca thulingpuitu um ai John ai thu lingpuihnak tahin lian sawn i; ciami tu Pa ai i pehnak i thil bawnhnak tepawl i. Ciami i thil bawnhnak in Pa in i hlat i ti larruai i.

³⁷ Cen i hlattu i Pa khai kaimah ca i thu i lingpuitu i. A aw za awng lo i si, a hmuihmel khai hmu awng lo i si;

³⁸ cen a thurelhnak khai ning thinlung songah dah tlang lo i si, zaimantifangin a hlatmi pa sang tlang lo i si.

³⁹ Lai Thianghlim songah si i si; ciatihin ning sihnak tu he Lai Thianghlim song ahhen kumkhua nunhnak hmu tuh i ing, tiin ning ruat manin i. Hemi Lai Thianghlim tu kaimah ai thu a reltu i.

⁴⁰ Ikhalselai nunhnak ngah tuhin i hnen kawi ning nuam cuanglo i.

⁴¹ Minung hnenin thangphathnak ngah tuh si lo ing.

⁴² Ikhalselai zaibang minung i si ti ning ling ai ning thinlung songah Pathian ithnak zaikhai um lo i.

⁴³ I Pa hming thawn kawi napui khal ing khaw i cosang ning nuam lo i; ikhalselai mi pakhat a hming ian in kawi lekhaw amah sawn cosang tuh i si.

⁴⁴ Pakhat le pakhat hnenin porh le lawm ngah ning hiam roh i, ikhalselai amah ian Pathian a imi hnenin thangphathnak ngah tum tlang lo i si; ciatih imanin akontih in kai tu i sang thil tuh i si?

⁴⁵ Kai tu Pathian hmaiah kin mawhhluktu tuh i, tiin i ruat mah ih. A vumah umlamhnak ning naihnak ber Moses rori heh ning mawhhluktu tuh i.

⁴⁶ Moses sang ngah awng ngaingai ita i silai kaimah khai i sang tuh ve i si; zaimantifangin Moses in i thu ngan awng i.

⁴⁷ Ikhalselai amah ai nganhnak ning sang lo fangin tu, i relhnak heh akontih in sang thil tuh i si?” tiin ti i.