Johan 3 - Zanniat Bible

Jesuh Le Nikodemas

¹ Judah mi hotu pa pakhat, a hming ah Necodemas tihnak um i; ani tu Farasi mi i.

² Zankhat tu Jesuh hnenah feh ai Jesuh hnenah, “Rabbi, nang tu Pathian ai hlathnak saya isi, ti na ling ing ngaihsunurkul na bawnhnak tepawl heh Pathian tel lo selai aisu inkhai bawn thil tuh lo i,” tiin ti i.

³ Jesuh in, “Thungai in na rel ing: aisu khai te lehsal ‘hlah lekhaw Pathian ukhnak hmu thil tuh lo i,” tiin ti i.

⁴ Nikodemas inkhai, “Akontih in patling cia heh te lehsal thil tuh i? A nu ai pum songah lut in vel hnih te lehsal heh cang thil hrimhrim lo i,” tiin sawn i.

⁵ Jesuh in, “Thutak ning rel ing: aisu khai tidap le Rauhla in te lehsal hlah lekhaw Pathian Ukhnak songah lut thil tuh lo i.

⁶ Minung heh taksa lamin tu a nu le a pate songin tehnak i; ikhalselai Rauhla lamah tu Rauhla ai tehnak i.

⁷ Te lehsal kul i, i ti fangin ngaihtam mah.

⁸ Hlivua tu a nuamnuam in zuang i; a thawm za i si, ikhalselai a konteng in hleng ai akon lamah feh tuh i, ti ling lo i si. Rauhla ai tehnak khai ciabangpah i,” tiin ti i.

⁹ Nikodemas in, “Akontih in ciami tu cang thil tuh i?” tiin zawt i.

¹⁰ Jesuh in, “Nang tu Israel mite lakah zirhtu saya pakhat inapui hemi rin ling lo isim?

¹¹ Thungai in na rel ing: kin tu kin linghnak rel ai kin hmuhnak than i ing; ikhalselai aisu inkhai kin thurelhnak pom ning nuam lo i.

¹² Kaimah in he laivum thula na rel ai i sang lo isi; ciatih lekhaw akontih in vancung thula na rel fangin sang thil tuh isi?

¹³ Vancung in a tolhtu Mi Fapa siarlo aisu khai vancung ah a kaitu um lo i,” tiin ti i.

¹⁴ “Moses in nelrawn ah khuam vumah dar rul a tar bangin Mi Fapa khai tarhnak tuar tuh ve i;

¹⁵ ciatihin amah a sangtu hmuahhmuah kumkhua nunhnak ngah tlang tuh i.

¹⁶ Pathian in lailung a it ze manin a Fapa naihsun pe ai amah a sangtu hmuahhmuah thi loin kumkhua nunhnak co tuh i.

¹⁷ Zaimantifangin lailung vumah Pathian in a Fapa a hlat fangin lailung thukhantu tuhin hlat lo i, lailung otu tuhin hlat i.

¹⁸ Aisu khai Fapa a sangtu heh thukhanhnak tawk tuh lo i; ikhalselai a sang lotu heh Pathian ai Fapa naihsun a sang lo manin thukhan zo i.

¹⁹ Thukhan tihnak tu he tih in i: laivum ah tleuhnak kawi i, ikhalselai mite in tleuhnak tahin thimhnak daih sawn i; zaimantifangin amahte bawnhnak a pha lo manin i.

²⁰ Aisu khai thil sual a bawntu in tleuhnak hua ai tleuhnak songah khai kawi tuh lo i, zaimantifangin a thil sual bawnhnak lar pang tuh lau i.

²¹ Ikhalselai a dikmi a bawntu in tleuhnak songah kawi ai a bawnhnak heh Pathian daihhnak hlun in bawn i, ti khiah cia tleuhnak in larruai i,” tiin ti i.

Jesuh Le John

²² Cia hnuaah Jesuh tu a hnuahlunte thawn Judea peng ah feh tlang ai amahte hnenah camkhat song um ai baptisma khai pe i.

²³ John inkhai Aenon tihnak, Salim in a hla lohnak hmunah, baptisma pe ve i, zaimantifangin ciata ahcen ti tampui um i. Mi tampui a hnenah kawi tlang ai baptisma pe i.

²⁴ Hemi tu John thawng a toh hlanai a canghnak i.

²⁵ John ai hnuahlunte hrekkhat le Judah mipa pakhat tu cianghlimdunhnak thu ah thu el dun i.

²⁶ Ciamanin John hnenah feh tlang ai, “Sayapa, Jordan Runpui in nisuah lamah nangmah thawn a um awngtu pa heh hih lai ilo sim? A thu na rel dehnak khiah! Tunah baptisma pe ve hnelhno ai mi tampui a hnenah feh tlang i,” tiin ti tlang i.

²⁷ John in, “Pathian pehnak siar loin aisu inkhai zaikhai cohnak nai thil tuh lo i.

²⁸ Kaimah rori in, ‘Kai tu Messiah ilo ing; a hlanai a hleng cia mi ing,’ tiin i relthilhnak tu ningmah i si.

²⁹ Hoimi mothar tu a hoitu tlangval pa ai i; ikhalselai mohoitu tlangval pa ai rualpui, ding ai aw thawm a ngaitu pa tu, tlangval pa ai aw a za fangin ang ngai i. Cia anghnak heh kaimah ai i ai i anghnak tu a semkhim i.

³⁰ Ani tu khangso tuhai kai tu i ṭumsuk tuh i,” tiin ti i.

Vancung An Zuktolhtu Pa

³¹ Vum lamin a hlengtu heh mi zongzong tahin lian sawn i. Laivum ai a umtu heh laivum ai i ai lailung vum thula rel i; ikhalselai vancung in a hlengtu cenin zaizongza vumah um i.

³² Amah in a hmuhnak le a linghnakte rel napui aisu inkhai a thu pom lo i.

³³ Ikhalselai aisu khai ituseh a thu relhnak a pomtu cenin ciatih ai a pomhnak in Pathian heh a dikcang i, ti khiah khoruai i.

³⁴ Pathian ai hlatmi incen Pathian thu phuang i, zaimantifangin Pathian in a rauhla a semkhim in a hnenah pe i.

³⁵ A Pa in a Fapa tu it ai zaizongza a kut songah pe i.

³⁶ Fapa a sangtu in kumkhua nunhnak nai i; Fapa ai thu a eltu in nunhnak nai tuh lo ai Pathian ai thinrawhnak tuar tuh i.