Johan 19 - Zanniat Bible

¹ Cen Pilat in Jesuh tu fehpui ai ralkapte vitruai i.

² Ralkapte in thingkak hling nai in lukhuk phiar ai khuruai i. Cen pon sannum silh i.

³ A hnenah feh tlang ai, “Judah Kumpibawi a nun sau tuseh,” tiin ti ai beng i.

⁴ Pilat tu suak lehthio ai mizapui hnenah, “Ngai tu ih! A vumah rek tlak sualhnak hmu lo ing, ti larruai tuhin ning hnenah fehpui tuh ing,” tiin ti i.

⁵ Ciatihin hling lukhuk khu in le pon sannum sil in Jesuh heh suak i. Pilat in anite hnenah, “Sik tu ih! Hemi pa heh amah ihang!” tiin ti i.

⁶ Suangbawi upate le Biakinn kiltu palikte in hmu fangin, “Thinglamteh ah rek tu! Thinglamteh ah rek tu!” tiin au tlang i. Pilat in anite hnenah, “Ningmah hlanlam in fehpui tu ilai thinglamteh ah rek tu ih! Kai cenin a vumah sualhnak hmu lo ing,” tiin ti i.

⁷ Cen Judah mite in, “Kin naihnak Dan bangin thi kul tuh rori i, zaimantifangin Pathian ai Fapa ing ti i,” tiin sawn i.

⁸ Ciami heh Pilat in za fangin a thinlau amam i.

⁹ A inn songah lut teu ai Jesuh tu, “A konteng in kawi isi?” tiin zawt i. Ikhalselai Jesuh in sawn lo i.

¹⁰ Pilat in, “I sawn tuh lo isim? Kaimah in na hlat thil le rek thilhnak thu nai ing ti ling lo isim?” tiin ti i.

¹¹ Jesuh in, “I vumah thu na naithilhnak heh Pathian in na pe manin i. Ciamanin nang tahin na kut ah i hlengruaitute heh sual sawn i,” tiin ti i.

¹² Ciami heh Pilat in a za fangin Jesuh hlatthilhnak lampui si i. Ikhalselai mizapui in, “Hemi pa hlat lesikhaw Rome kumpibawi ai rualpui ilo isi. Aisu khai ituseh kumpibawi ing a tiduntu heh Rome kumpibawi ai ral i,” tiin au tlang i.

¹³ Ciami ponkam heh Pilat in a za fangin Jesuh tu sumpua ah suahpui ai, “Lungtlep phah tualvan,” tihnak hmunai thukhantu tohnak ah to i. Cia hmun heh Hebrew pong in “Gabbatha” ti i.

¹⁴ Kansuak Puai tuh ni khat sam nia ah i ai sun dung ihang. Pilat in mizapui khiah, “Ning Kumpibawi heh sik tu ih!” tiin ti i.

¹⁵ Anite in, “Rek tu! rek tu! Thinglamteh vumah rek tu,” tiin au tlang dekdo i. Pilat in, “Ning kumpibawi he maw thinglamteh vumah rek tuh ing?” tiin zawt i. Suangbawi upate in, “Sizar siar lo kumpibawi dang nai lo i ing,” tiin ti tlang i.

¹⁶ Cen Pilat in Jesuh tu rek tuhin amahte kut songah pe i. Ciatihin Jesuh tu fehpui i.

Thinglamteh Ah Jesuh Khen I

¹⁷ A thinglamteh phur in suak ai “Luruh Hmun,” tihnak hmunah hleng i. Cia hmun tu Hebrew pong in “Golgotha” ti i.

¹⁸ Ciata ah Jesuh tu thinglamteh ah khen i. A dang pasalte pahnih khai khen tlang ve ai amahte karlak ah Jesuh heh tar i.

¹⁹ Pilat in laingan ai thinglamteh vumah tarruai i. Cia lai a nganhnak tu, “Nazareth mi Jesuh, Judah Kumpibawi,” ti i.

²⁰ Jesuh tarhnak hmun tu khuapui in hla lo manin ciami lai heh mi tampui in siar tlang i. Hebrew pong, Laṭin pong le Greek pong in nganhnak i.

²¹ Suangbawi upate in Pilat khiah, “Judah Kumpibawi,” ti loin ‘Judah Kumpibawi ing, ti i,’ tiin ngan tu,” ti tlang i.

²² Pilat in, “I ngan zohnak tu i nganhnak bangin um tuseh,” tiin ti i.

²³ Ralkapte in Jesuh tu thinglamteh vumah a khen ben fangin a hnikpon lang ai pakhat ṭen in co tuhin tlam li in zik tlang i. Cen kutzung khuihnak tel loin takhnak angkifual lang i.

²⁴ Ralkapte in, “Hemi angki fual tu zik tuh lo ising. Aisu in co tuh i, ti linhnak ah camciafung duk tlang sawn ngasing,” tiin ti tlang i. Hetihin thil a canghnak tu Lai Thianghlim in: “I hnikpon tu anite khan ai, I angki caah camciafung duk tlang i,” tihnak a khim tuhin i. Ciabang rori in ralkapte in bawn tlang i.

²⁵ Jesuh ai thinglamteh hiangah a nu le a nu ai naunu le Clopas ai nupui Mary le Mary Magdalene ding tlang i.

²⁶ Jesuh in a nu le a ithnak hnuahluntu pa ciata ah a ding tlang khiah hmu ai a nu hnenah tu, “Ani tu na fapa i,” tiin ti i.

²⁷ Cen a hnuahluntu pa hnenah, “Amah heh na nu i,” tiin ti i. Cia ai panin hnuahluntu pa in Jesuh ai nu tu a inn ah umruai i.

Jesuh Thi I

²⁸ Jesuh in zaizongza khim zo sio i, ti ling i; Lai Thianghlim songai a umhnak khim tuhin, “Ti i hal i,” tiin ti i.

²⁹ Ciata ah cabitti thur bel khat um ai ciami cabit thur songah ponher nim tlang ai hissop fung hmur ah pen in Jesuh tu a ka ah mat i.

³⁰ Jesuh in ciami cabitti heh tep ai, “Khim zo sio i,” ti i. Cen a lu ut ai a haihawh bo i.

Jesuh Nak Dawt I

³¹ Cen Judah mi hotute tu Pilat hnenah feh tlang ai thinglamteh vumai a rekhnak mite ai ke ek sah tuhin le a luangte khai lang tuhin ngen tlang i. A ngen nia tu ni nga nia i, Zaimanin ngen ini tifangin a rekhnak luangte tu Sabbath nia ah thinglamteh vumah tar tuhlai heh daih tlang lo i; cia Sabbath nia tu a thianghlim hlaice i lawnsi manin i.

³² Ciamanin ralkapte feh ai Jesuh thawn hmunkhat ai rekhnak pakhat pa ke ek sah le cia hnuaah pahnihhnak pa ai ke khai ek sah i.

³³ Ikhalselai Jesuh hnen a hleng fangin thi zo i, ti khiah hmu ai anite in a ke ek sah lo i.

³⁴ Ralkap pakhat in Jesuh ai nak khiah faipui in dawt ai thi le ti suak i.

³⁵ Ciami a hmutu pa amah rori in a ponghnak i ai ning sang thil tuhin i. A relhnak heh a dikmi i ai amah inkhai thudik rel ing ti khiah ling i.

³⁶ Hetih ai thil a canghnak tu Lai Thianghlim songah, “A ruh pakhat khai ek tuh lo i,” ti ai a umhnak khiah a khim tuhin i.

³⁷ Cen Lai Thianghlim hmundang ah, “Amahte dawthnak khiah sik tlang tuh i,” ti inkhai um i.

Jesuh Phum I

³⁸ Cia hnuaah Arimathea khuami Joseph in Jesuh luang lang tuhin Pilat hnenah ngen i. Joseph tu Jesuh hnuahluntu pakhat inapui Judah hotute khiah a lau manin a thupniu in hlun zianzo i. Pilat in Jesuh luang khiah lang thil isi, a ti manin Joseph in lang i.

³⁹ Jesuh tawk tuhin zan lai ah a feh awngtu Necodemas khai Joseph hnenah feh ve ai yihmui pawng zakhat tluk, mura yihmui le cinghnai roihhnak khiah keng i.

⁴⁰ Amahte pahnih in Jesuh ruang khiah lang kawm ai Judah mite ai mithi phumdan bangin yihmui thawn pon ngo nemniu in tuam i.

⁴¹ Jesuh rekhnak hmunah vuandum pakhat um ai cia vuan songah aisu khai phum awng lai lo hlan thar pakhat um i.

⁴² Sabbath nia hleng dawn hang ai cia hlan tu a nong niu lawnsi manin Jesuh ai luang khiah ciata ah phum kawm i.