Johan 18 - Zanniat Bible

Jesuh Pomhnak

¹ Hetihin Jesuh saw a ngen ben hnuaah hnuahlunte thawn suak tlang ai Kidron tihnak rawn niu ralkhat ah feh tlang i. Ciata ah vuandum pakhat um ai Jesuh le a hnuahlunte tu ciami vuandum songah lut i.

² Cia vuandum khiah Jesuh le a hnuahlunte tawk dun dehnak imanin a zuartu Judas in a konteng ah um i ti ling i.

³ Ciamanin cia vuan ahcen Judas khiah Rome ralkap bur khat, suangbawi upa le Farasite ai hlathnak Biakinn kiltu palikte thawn, ralthuam keng ai maikhuat le maifar thawn feh tlang i.

⁴ Jesuh in a vumah zaibang thil hleng tuh i, ti a ling cia sio manin hmaiah suak ai, “Aisu si i si?” tiin zawt i.

⁵ Anite in, “Nazareth mi Jesuh,” ti tlang i. Jesuh in, “Kaimah ing,” ti i. A zuartu Judas tu a hiangah ding i.

⁶ Jesuh in, “Kaimah ing,” a tihnak za fangin khel lamah let ai laipua lakah sawn tlang i.

⁷ Jesuh in, “Aisu si i si?” tiin zawt lala i. Anite in, “Nazareth mi Jesuh ti thotho i.

⁸ Jesuh in, “Kai ing,” tiin ning rel zo ing. Kaimah i si ile i sikhaw midang tu fehruai tu ih,” tiin ti i.

⁹ Hetihin a tihnak tu, “I Pa, i kut songah na pehnak tu pakhat khai i pairuaihnak um lo i,” a tihnak a khimruaihnak tuhin i.

¹⁰ Simon Peter in a kenghnak ralvang phok ai Suangbawi Sang salpa ai kiahhan lam bil tawng lio in sat i. Cia sal pa hming tu Malchus i.

¹¹ Jesuh in Peter hnenah, “Na ralvang a kawng songah thun leh tu! I Pa ai i pehnak tuarhnak khuat heh ding tuh loin i ruat isim?” tiin ti i.

Annas Hmaiah Jesuh Fehpui I

¹² Cen Rome ralkapte in amahte hotu ralbawi le Judah mi palikte thawn Jesuh heh pom ai; a pen hnuaah,

¹³ hmasaber ah Annas hnenah fehpui i. Annas tu cia kum ai Suangbawi Caiaphas nupui ai pa i.

¹⁴ Caiaphas tu mizapui caah mi pakhat thi pha sawn i tiin Judah hotute hnenah ruathnakpetu khiah i.

Peter In Jesuh Pheh I

¹⁵ Simon Peter le a dang hnuahluntu pakhat in Jesuh hlun kawm i. Cia hnuahluntu heh Suangbawi Sang thawn ling dun ngai mi i ai Jesuh hlun ai Suangbawi Sang ai tualvan ah feh i.

¹⁶ Ikhalselai Peter tu kotka pualam ah um i. Cen ciami hnuahluntu khiah let ai kotka kiltu nu a pon hnuaah Peter lutpui i.

¹⁷ Kotka kiltu nu in, “Khia pa tu a hluntu lakah tel ve ilo im?” tiin Peter khiah ti i. Peter in, “I hlah ing,” ti i.

¹⁸ Khua sik manin hnenumte le kiltu palikte in maihol in maipual sep tlang ai ding kongin mai aai tlang i. Peter khai feh ve ai amahte hnenah ding in mai aai ve i.

Suangbawi Sang In Jesuh Thu Zawt I

¹⁹ Suangbawi Sang in Jesuh tu a hnuahlunte ai thu le a thuzirhhnak thute zawt dekdo i.

²⁰ Jesuh in, “A lar ngai in mizapui hnenah thu rel ṭiode ing. Mi tampui tai khawm hmun synagogue ah le Biakinn pui ah thuzirh ṭiode ing. A thupniu in ziang thu khai rel awng lo ing.

²¹ Ciatih inapui zaimanin thu i zawt i si? I thurelhnak a lingtute zawt tu sawn. I relhnak ling tlang sio hlen i,” tiin ti i.

²² Ciatihin a ti fangin ciata ai a umtu palik pakhat in Jesuh heh beng ai, “Suangbawi Sang hnenah zaimanin ciatihin pong ngam isi?” tiin ti i.

²³ Jesuh in, “I pongsualhnak um lekhaw i pongsualhnak heta ai a umtu hmuahhmuah hnenah rel tucuk! Ikhalselai i ponghnak heh a dikmi ilekhaw zaimanin in beng isi?” tiin sawn i.

²⁴ Ciatihin Annas in a penhnak hawk sah cuanglo in Jesuh tu Suangbawi Sang Caiaphas hnenah kuat i.

Peter In Jesuh Pheh Lehthio I

²⁵ Peter tu ciata ah mai aai in ding hlen lai i. Cialak fangin midangte in, “Nang khai he a hnuahlunte lakah pakhat i ve ilo sim?” tiin ti tlang i. Peter in, “I lo ing,” ti i.

²⁶ Suangbawi Sang hnenum lakah pakhat, Peter in a bil sathnak mi pa ai songkhat pa in, “Hemi Jesuh thawn vuandum songah na hmu vuah bang ing?” tiin zawt i.

²⁷ Ikhalselai Peter in, “Kaimah ilo ing,” ti thotho i. Ciafangin ar khuang i.

Pilat Hmaiah Jesuh Fehpui I

²⁸ Zingniu in Jesuh tu Caiaphas inn in Mangki bawi inn ah fehpui i. Judah mi hotute tu amahte dan bangin thianghlim niu in Kansuak Puai rong ai nuam tlang manin Mangki bawi inn song ahcen lut tlang lo i.

²⁹ Ciamanin Pilat tu suak ai anite hnenah, “Hemi pa heh ziang sualhnak nai heh i?” tiin zawt i.

³⁰ Anite in, “Sualhnak nai hlah selai na hnenah koih tuh lo i ing,” tiin sawn tlang i.

³¹ Pilat in anite hnenah, “Ciatih ilekhaw ningmah in fehpui tu ilai ningmah ai dan bangin a thu rel tu ih,” tiin ti i. Anite in, “Kin incen minung rek thilhnak thu nai lo i ing,” tiin ti tlang i.

³² Jesuh in zaibang thihhnak tuar tuh ing ti ai a relciahnak ponkam khim tuhin hetih bangin thil a canghnak i.

³³ Pilat tu a inn songah lut leh ai Jesuh heh ko i. “Judah Kumpibawi isim?” tiin zawt i.

³⁴ Jesuh in, “Hemi thu na zawthnak heh na lungsuak in i zawt maw, midang in i thu na rel manin i?” tiin zawt i.

³⁵ Pilat in, “Judah mi i vuah isim? I hnen na hlentute heh na miphun le suangbawite nakhaw! Na bawnhnak thil tu ziang heh i?” tiin ti i.

³⁶ Jesuh in, “I ukhnak ram tu he lailung ah ilo i; he lailung ah iselai Judah mi hotute kut songah hleng tuh loin i hnuahlunte in tawng tuh i. I ukhnak ram tu he lailung ah ilo i,” tiin ti i.

³⁷ Ciafangin Pilat in, “Kumpibawi ngaingai isim?” tiin zawt i. Jesuh in, “Nang in Kumpibawi isi, iti isi. Lailung ai i tesanhnak le i kawisanhnak tu thu pakhat ian i: ciami tu thutak rel tuh khiah i. Thutak songah a ummi hmuahhmuah in i thurelhnak khiah ngai tlang i,” tiin ti i.

³⁸ Ciafangin Pilat in, “Thutak tu ziang heh i?” tiin zawt i. Cen Pilat tu mizapui hnenah suak leh ai anite hnenah, “A vumah mawhhnak thu hmu lo ing.

³⁹ Ciamanin dan ning naihnak bangin Kansuak Puai ah thawngtotu pakhat ning hlat sah de ing. Judah Kumpibawi heh ning hlat sah inglai ning daih awm?” tiin zawt i.

Jesuh Rek Tuhin Relcat I

⁴⁰ Anite in, “Amah hlat kin nuam lo i! Barabbas hlat kin nuam i!” tiin au tlang dekdo i. Barabbas tu damiah awng i.