Johan 17 - Zanniat Bible

Jesuh In A Hnuahlunte Ca Sawngen I

¹ Jesuh in he thu a rel ben fangin van lam honcuan ai, “I Pa, a can hleng zo ihang. Fapa in songlawihnak na pe thil tuhin na Fapa hnenah songlawihnak pe tu hram law.

² Fapa hnenai na pe cia zo mi zongzong hnenah kumkhua nunhnak a pe thil tuhin laivum miphun hmuahhmuah vumah thunaihnak pe zo i si.

³ Ciami kumkhua nunhnak tihnak tu nangmah ian Pathian taktak isi ti ling le na hlat mi Jesuh Khrih ling khiah i.

⁴ Naper na pehnak per zo sio ai na songlawihnak tu laivum ah larruai zo ing.

⁵ Ciamanin aw i Pa, lailung na bawn hlanah nangmah thawn songlawihnak i nai awnghnak khiah tunah na mithmuh ah i pe tu hram law!

⁶ Hemi laivum in na kohnak mite hnenah na hming larruai zo ing. Ciamite heh nangmah ai i ai i hnenah na pehnak mite i. Na thu hlun tlang ai,

⁷ tun tu i hnenah na pehnak hmuahhmuah heh na hnenin a hlenghnak i ti khai ling tlang i.

⁸ Na pehnak na thu khiah kaimah in rel ai anite in pom tlang zo i. Na hnenin a kawitu ing ti thutak ling tlang taktak ai na hlathnak mi ing ti khai sang tlang zo i.

⁹ “Amahte caah sawngen i. Lailung caah sawngen lo ing, ikhalselai na pehnak mite caah sawngen ing, zaimantifangin nangmah ai minungte i.

¹⁰ I naihnak hmuahhmuah heh nangmah ai i ai na naihnak hmuahhmuah khai kaimah ai i; cen amahte songin i anghnak lar i.

¹¹ Cen tunah na hnenah kawi tuh ing; kai tu laivum ah um tuh nawn lo ing. Ikhalselai anite tu laivum ah um tuhlai i. A thiangmi i Pa, nangmah le kaimah heh pakhat kin i bangin laivum ai a um lai mite tu pum khat cangthilhnak tuhin i hnenah na pehnak na hming ai huham in huphim tu law.

¹² Amahte hnenah i um laiah nangmah ai i pehnak na hming ai huham in hup ing. Lai Thianghlim songai umhnak khim tuhin a pairal cia tuhhnak mi pakhat ti siar lotu mi pakhat khai pairal lo i; kaimah in hup sio ing.

¹³ Tun tu na hnenah kawi tuh ihang ing; laivum ah he thute i relhnak tu i anghnak khiah amahte thinlung songah semkhim liang in a nai thil tuhin i.

¹⁴ Kai tu he laivum ai ilo bangin anite khai he laivum ai i ve lo i; ciamanin na thu tu amahte hnenah i rel fangin laivum in amahte a cimhnak i.

¹⁵ Amahte khiah he laivum in lang tuhin na ngen lo ing, ikhalselai mihrokhrawl pa ai hnenin huphim tu law tiin na ngen ing.

¹⁶ Kai tu laivum ai ilo bangin anite khai laivum ai i ve lo i.

¹⁷ Anite tu thutak in nangmah ai cangruai tu; na ponkam tu thutak i.

¹⁸ Kaimah khiah laivum ah i hlat bangin anite khai kaimah in hlat ve ing.

¹⁹ Anite khai thutak in thiangruai thil tuhin kaimah khai thiangruai dun ve ing.

²⁰ “Amahte ca ian sawngen lo ing; amahte thurelhnak za ai kaimah i sangtu tuh pawl ca ahkhai ngen ing.

²¹ Amahte veksen in pakhat cang thil tuhin sawngen ing. I Pa, nang tu kaimah songah um ai kaimah khai na songah i um bangin anite khai kin songah um tu ve seh. Nangmah in i hlat heh laivum in i sang thil tuhin anite tu pakhat ah cang tuseh.

²² Nang le kai tu pakhat kin i bangin anite khai pakhat ah cang thil tuhin nangmah ai i pehnak songlawihnak khiah anite khai pe ve ing.

²³ Anite tu pakhat taktak i ai ciatihin laivum in nangmah ai hlathnak mi ing ti ling thil tuhin le kaimah i it bangin anite khai it isi ti ling tuhin kai tu amahte songah um ai nang tu i songah um isi.

²⁴ “Aw i Pa, nangmah pehnak i songlawihnak heh anite in hmu thil tuhin nangmah in anite heh i kut songah i pe zo isi. Anite tu kaimah umhnak poh ah um ve selai ti i daih i; zaimantifangin laivum semsuah hlanin i it zo isi.

²⁵ A dikcangmi i Pa, nang tu laivum in na ling lo i, ikhalselai kai cenin na ling ai anite in nangmah in i hlat khiah ling i.

²⁶ Anite hnenah na hming heh kaimah in phuang zo ai, i vumah ithnak na naihnak heh amahte songah um thil tuh ve in le kaimah khai amahte songah um thil tuh ve in na hming heh phuang tuh betbo lai ing,” tiin sawngen i.