Johan 16 - Zanniat Bible

¹ “Ning sanghnak in ning tlu tuh loin he thu heh ning rel ing.

² Synagogue in ning hnawt tuh i; aisusu inkhai ningmah rek tuh heh Pathian na ruaih ai ruat can hleng tuh i.

³ Mi in ciatih bangin ning vumah bawn tuh i, zaimantifangin Pa ling lo ai kaimah khai i ling lo i.

⁴ Ikhalselai tunai panin ning rel cia ing, zaimantifangin ning vumah bawn ngaingai fangin kin rel cia awng zo ti khiah ling tuh i si. “Ning hnenah i um manin a hampan in he thu heh ning rel lo ing.

Rauhla Thianghlim Naperhnak

⁵ Tun tu i hlattu hnenah feh tuh ihang ing; ikhalselai aisu inkhai akonah feh tuh isi tiin i zawt lai lo i si.

⁶ Hetih ai ning rel manin ning thinlung tu lungsiahnak in dim i.

⁷ Ikhalselai thutak in ning rel ing: feh lengkhaw ning caah pha sawn i, zaimantifangin feh hlah lengkhaw ning hnenah Bawmtu kawi tuh lo i. Ikhalselai feh lengkhaw ani tu ning hnenah hlat tuh ing.

⁸ Cen a hleng fangin laivum mite hnenah sualhnak thu amahte ruatdan khelhhnak, thudik a ruatdan khelhhnak le Pathian thukhanhnak thu amahte ruatdan a khelh zia pawl khiah larruai tuh i.

⁹ Sualhnak thu amahte ruatdan khelh i, zaimantifangin kaimah i sang lo manin i.

¹⁰ Thudik amahte ruatdan khelh i, zaimantifangin i Pa hnenah kaimah feh tuhai i hmu tlang tuh nawn lo manin i.

¹¹ Cen thukhanhnak thu ahkhai amahte ruatdan khelh i, zaimantifangin laipua uktu bawi heh thukhan cia zo manin i.

¹² Ning hnenah rel tuh tampui nai ing, ikhalselai tunah hih ben cawk tuh lo i si.

¹³ Ikhalselai Rauhla a hleng fangin tu Pathian thutak a larruaitu a imanin thutak hmuahhmuah ah ning hoi tuh i. Zaimantifangin amah thuthu in zaikhai pong tuh lo ai; a hleng tuhlai thute khai phuang tuh i.

¹⁴ Amah in songlawihnak pe tuh i, zaimantifangin i relciahnak khiah lang tuhai ning hnenah phuang tuh i.

¹⁵ I Pa ai naihnak hmuahhmuah heh kaimah ai i, ciamanin Rauhla in i pehnak lang tuhai ning hnenah phuang tuh i, tiin i tihnak i.

Lungsiahnak Le Lungawihnak

¹⁶ “Can a rai hlanah i hmu tuh nawn lo i si; cen can comniu hnuaah i hmu leh tuh i si,” tiin Jesuh in ti i.

¹⁷ A hnuahlunte hrekkhat in, “Ciami tu a sullam ziang ini? Cammalak songah i hmu tuh nawn lo i si, cen a rai hlanah i hmu leh tuh i si, tiin kin ti i. Cen ‘Pa hnenah kaimah feh tuh i imanin,’ ti inkhai kin ti fawn i.

¹⁸ ‘A rai hlanah,’ tihnak tu ziang a ti nuamhnak ini tur? A rel nuamhnak heh lingthiam tlang hrimhrim lo ising!” tiin pakhat le pakhat ti dun tlang i.

¹⁹ A hnenah anite in thu a zawt nuam khiah Jesuh in ling ai anite hnenah, “Kai in ‘Can a rai hlanah i hmu tuh nawn lo i si,’ cen can tlawmniu a rai hnuaah i hmu leh tuh i si,’ i ti manin ningte pakhat le pakhat thu zawt dun tlang isim?

²⁰ Thu ngai in ning rel ing: ning tu kap tlang tuh napui lailung tu ang tuh i; lung ning sia tuh i, ikhalselai ning lungsiahnak tu lungawihnak cang leh tuh i.

²¹ Nupang in nau a nai dawn fangin naukai urhnak tuar i, ikhalselai nauniu a te ben fangin lailung vumah nau thar pakhat a suak manin a tuarhnak hmuahhmuah hai leh sek i.

²² Ciatih bangin ning khai i tuh ve i si; tun tu lung ning sia tlang i, ikhalselai kaimah in ning hmu leh tuhai ning thinlung tu anghnak in dim tuh i; cia anghnak tu aisu inkhai ning sut thil tuh nawn lo ihang.

²³ Cia nia a hleng fangin tu zaikhai i zawt tuh nawn lo i si. Thutak ning rel ing: I hming in ning ngenhnak hmuahhmuah i Pa in ning pe tuh i.

²⁴ Tun tian i hming in zaikhai ngen awng lo i si. Ngen tu ih ngah tuh i si; ciatihin ning anghnak tu khim tuh i.

Lailung Neh Zo Ing

²⁵ Tun tian tu he thute i rel fangin santehhnak lek hmang ing. Ikhalselai santehhnak hmang nawn loin cangkheng in Pa ai thu i relhnak can hleng tuh i.

²⁶ Cia nia a hleng fangin a hnenah i hming in ngen tlang tuh i si; ningmah tumrul in ning ngen sah tuh ing tiin ning rel lo ing;

²⁷ zaimantifangin i Pa amah rori in ning it i. Ning in i it tlang ai Pathian hnenin i hleng khiah sang zo manin i Pa in ning it i.

²⁸ Kai tu Pa hnenin kawi ai lailung ah hleng ing. Tun tu lailung hlum tuh hang ai Pa hnenah feh tuh ing,” tiin ti i.

²⁹ Cen a hnuahlunte in a hnenah, “Tun tu santehhnak telh loin cangkheng in kin rel manin,

³⁰ zaizongza lingtu isi, ti na ling zo i ing; ciamanin thu na zawt hnelhno kul nawn lo ihang. Ciami in Pathian hnenin a kawitu isi, ti kin sangruai zo i,” tiin ti tlang i.

³¹ Jesuh in, “Tun in i sang ngaingai aw i sim?

³² Ning veksen in ning piak tuh sio ai ning inn ṭen ah tlung tuh i si; kaimah lek niu i zam can hleng tuh i; tunin hleng zo ihang. Ikhalselai Pa i hnenah a um manin kaimah lek ngaingai tu ilo ing.

³³ Kaimah thawn ning pehzomhnak thawmin muanghnak ning ngah thil tuhin he thu heh ning rel ing. Lailung in harsa tuarhnak ning pe tuh i. Ikhalselai ral pha tu ih; lailung heh neh zo ing!” tiin ti i.