Johan 12 - Zanniat Bible

Jesuh Tu Yihmui Pawh I

¹ Kansuak Puai hlan ni ruk ah Jesuh tu thihhnak in a thoruailehsal mi Lazarus te inn ah feh i.

² Ciata ah amah ca zanfak suan tlang ai Martha in rong pe bawm i. Jesuh thawn cabuai ai rong aitute lakah Lazarus khai tel ve i.

³ Cen Mary in a phun pha roh le a man khung roh pawl yihmui thawl khat lang ai Jesuh ke ah a burh hnuaah a sam in nawt sah i. Ciami yihmui rim in inn song dim sio i.

⁴ Jesuh hnuahlunte lakai pakhat, Jesuh a zuartu tuh Judas Iskariot in,

⁵ “Zaimanin he yihmui tu tangka za thum in zuar selai cia tangka heh mifarahte sum sawn lo ini?” tiin ti i.

⁶ Hetih ai a rel fangin mifarahte a ngaihhar manin ilo i; ruko manin i sawn i. Tangka bawm amah in awh ai ciami tangka heh amah caah hmang de i.

⁷ Ikhalselai Jesuh in, “Hemi nu heh mawhhluk mah ih! I luang phum nia hrang a bawn tuhhnak bawn tuseh.

⁸ Mifarahte tu ning lakah um tuh ṭiode i; ikhalselai kai tu ning lakah um tuh ngio lo ing,” tiin ti i.

Lazarus Rek Tum Tlang I

⁹ Judah mi tampui in Bethany ah Jesuh um i, ti za fangin ciata ah feh tlang i. Jesuh hmu nuam lek ai zolo in Jesuh in hlan in a thoruailehsal mi Lazarus hmu nuam hrimhrim in feh tlang i.

¹⁰ Ciamanin Suangbawi upate in Lazarus khai rek tuh ve in ruat tlang i.

¹¹ Zaimantifangin Judah mi tampui in Lazarus manin amah suangbawi upate tu hnawlhnak tawk tlang ai Jesuh sawn sang tlang manin i.

Songlawi Ngai In Jerusalem Luthnak

¹² A thangha fangin Kansuak Puai ai a hlengtu miburpui in Jesuh tu Jerusalem ah kawi tuh i, ti khiah ling tlang i.

¹³ Ciamanin tuum hnah lang tlang ai a hmuak tuhin feh kong in, “Pathian thangphat tu ih! Bawipa ai hming in a hlengtu heh Pathian in hmuifu pe tu hram seh! Pathian in Israel kumpibawi heh Hmuifu pe tu hram seh!” tiin au tlang dekdo i.

¹⁴ Jesuh in laak niu pakhat hmu ai a vumah to i; Lai Thianghlim in:

¹⁵ “Aw Zion khuapui, Na thinlau mah; Na kumpibawi tu laak niu vumah to in a kawi laitak i,” tiin a tihnak bangin khim i.

¹⁶ A hnuahlunte in cialai ahcen he thu ai a sullam heh ling awng lo i. Ikhalselai Jesuh tu songlawihnak ai thoruai leh fangin amah thu ahhen Lai Thianghlim in hebang in rel awng ai amah caah hebangtluk in bawn i, ti khiah hih tlang leh i.

¹⁷ Jesuh in Lazarus tu hlan songin ko ai thihhnak in a thoruai laiah a hmu awngtu mi tampui in cia thu heh midang tampui rel tlang amam i.

¹⁸ Ciabangtluk ngaihsunurkul bawn i, ti khiah ling tlang manin miburpui in a hmuakhnak i.

¹⁹ Ciafangin Farasite in, “Ti cia bang tho sing, kham thil bang nawn hlah sing! Sik tu ih, lailung vum pumpuhluk in amah hlun bang berh hang! tiin pakhat le pakhat ti dun tlang i.

Greek Mite In Jesuh Si I

²⁰ Cia puai ah Pathian bia tuhin Jerusalem ah a fehtu mi tampui lakah Greek mite khai tel ve i.

²¹ Philip hnenah feh tlang ai, “Sayapa, Jesuh hmu kin hiam i,” tiin ti i. Philip tu Galilee peng Bethsaida khuami i.

²² Philip tu Andrew hnenah feh ai rel i; cen amahte pahnih in Jesuh hnenah feh kawm ai rel i.

²³ Jesuh in anite hnenah, “Mi Fapa ai songlawihnak a ngah can hleng zo ihang.

²⁴ Thutak ning rel ing: sangvut ci mukhat heh laipua songah cing in thi ta lo selai amah kel in tang ngio i. A thi ta hnua ian in ci tampui suakruai i.

²⁵ Ciatih bangin aisu khai amah ai nunhnak a ittu in a nunhnak sung tuh i; ikhalselai he laivum ah amah ai nunhnak a cimtu in kumkhua ca nunhnak kil khawl ngah i tuh i.

²⁶ Aisu khai ituseh kaimah na ruaihtu in i hlun kul tuh hrimhrim ai i umhnak ah um tuh ve i. Cen aisu khai ituseh kaimah na ruaihtu heh i Pa in upathnak pe tuh i,” tiin ti i.

Jesuh In A Thi Tuh Thu Rel I

²⁷ Jesuh in, “Thin i cawl ze i; ziang rel nitur ing? ‘I Pa, he can heh i vumah hlengruai hram malaw,’ ti tuh ing maw? Ikhalselai he tuarhnak songah hleng tuhin laipua vumah i kawi sanhnak le hemi i ta lawnsi!

²⁸ Aw I Pa, na hming songloih tu,” tiin ti i. Cen van in aw thang ai, “Kaimah in songloih zo ai songloih lehsal tuh ing,” tiin ti i.

²⁹ Cia aw tu ciata ai a dingtu miburpui in za fangin mi hrekkhat in, “Khuari i,” tiin ti i; a hrekkhat in, “Vanmi ai ponhnak aw i,” ti i.

³⁰ Ikhalselai Jesuh in anite hnenah, “Hemi aw a thanghnak heh kaimah ca ilo i, ningmah ca sawn i.

³¹ Hemi lailung tu thukhanhnak a tuar can khim zo i; tunah he lailung uktu heh hnawthnak tuar tuh i.

³² Lailung vuman i hondang fangin mi zongzong i hnenah hoi tuh sio ing,” tiin ti i.

³³ Hetihin a ti fangin zaibang thihhnak tuar tuh i, ti khiah a larruaihnak i.

³⁴ Miburpui in, “Kin dan in Messiah tu kumzangza in nung tuh i, tiin rel i. Ciatih ilekhaw akontih in Mi Fapa tu hondang tuh i, tiin nang in ti isi? Hemi Mi Fapa tu aisu i?” tiin ti tlang i.

³⁵ Jesuh in, “Tleuhnak tu can comniu song ning hnenah um tuhlai i. Tleuhnak ning nai songah ning vakhnak lampui ah feh rih tu ih; ciatihin thimhnak in ning man tuh lo i; zaimantifangin khuathim songah a vaktute in akon lamah feh ising ti ling tlang lo i.

³⁶ Ciamanin tleuhnak ning nai laiah, tleuhnak ai minung ning cang thil tuhin, tleuhnak heh sang tu ih,” tiin ti i. Ciatihin Jesuh in a rel hnuaah suak ai amahte hmuh thilh lo hmunah relh i.

³⁷ A mithmuh rori ah ngaihsunurkul tampui bawn napui ani tu sang cuanglo i.

³⁸ Ciami tu prophet Isaiah in: “Bawipa, kin thurelhnak tu aisu in kin sang i? Aisu hnenah Bawipa in a huham larruai i?” tiin a ti awnghnak a khim tuhin i.

Mi In Sang Lo I

³⁹ Cen sang thil tlang thotho lo i, zaimantifangin Isaiah thotho in:

⁴⁰ “Pathian in anite mit cawruai ai, Thinlung khai pitruai i. Ciatih i lo fangin tu amahte mit in hmu pang tuhai, A thinlung in ling pang tuh i; I lam hoi pang tuhai, A cak khai cakruai pang tuh ing, tiin Pathian in ti i,” tiin rel lawnsi i.

⁴¹ Isaiah in hetihin a relhnak tu Jesuh songlawihnak hmu cia zo ai a thu khai rel cia zo manin i.

⁴² Ciatih imanin Judah mi hotu tampui in Jesuh tu sang i; ikhalselai Farasite in synagogue in kin suah pang fangin ti lau in Jesuh amahte sanghnak heh a lar ngai in rel ngam tlang lo i.

⁴³ Pathian hnenai songlawihnak ngah tahin minung hnenai songlawihnak ngah hiam sawn i.

Jesuh Ai Ponkam In Thukhanhnak

⁴⁴ Jesuh tu aw cawm ngai in, “Aisu khai kaimah i sangtu heh kaimah lek i sang lo i, i hlattu khai sang i;

⁴⁵ Aisu khai kaimah i hmutu in i hlattu khai hmu i.

⁴⁶ Aisu khai kaimah i sangtu in khuathim songah um thil tuh loin he laipua vumah tleuhnak in kawi zo ing.

⁴⁷ Aisu khai i thurelhnak za ai a hlun lotu heh kai in a thukhan tuh lo ing. Lailung thukhan tuhin kawi lo ing, nun o tuhin kawi ing.

⁴⁸ Aisu khai i hnawltu le i thurelhnak a pom lotu in thukhantu pakhat nai i. I ponghnak heh ni hnuataber nia ah thukhantu ah cang tuh i!

⁴⁹ Zaimantifangin kaimah thunaihnak huham ai i relhnak ilo i, i hlattu i Pa in i pong tuhhnak le i rel tuhhnak khiah thu i pehnak bangin rel ing.

⁵⁰ Cen i thupehnak tu kumkhua nunhnak i, ti ling ing. Ciamanin i relhnak heh i Pa in rel tuhin i ruaihnak i,” tiin ti i.