Johan 11 - Zanniat Bible

Lazarus Thi I

¹ Bethany khua ai a umtu Lazarus tihnak pa tu urkual in um i. Bethany tu Mary le a unu Martha umhnak khua i.

² Hemi Mary tu Bawipa ke ah yihmui burh ai a sam in a nawttu awng nu khiah i. A urtu Lazarus tu a hmingpa i.

³ A unau in Jesuh hnenah, “Bawipa, na ithnak mi na rualpa ur i,” tiin thucah i.

⁴ Ciami heh Jesuh in a za fangin, “Hemi urhnak tu Lazarus thi tuhhnak urhnak ilo i. Hemi urhnak tu Pathian songlawihnak larruai tuhin le Pathian Fapa ai songlawihnak a ngah tuhin khai i,” tiin ti i.

⁵ Jesuh in Martha le a nau nu le Lazarus heh it ngai i.

⁶ Ikhalselai Lazarus ur i ti thu a ling hnuaah ciami a umhnak ah a hlai in ni hnih um bet i.

⁷ Cen a hnuahlunte hnenah, “Judea ah feh leh ngasing,” tiin ti i.

⁸ A hnuahlunte in, “Sayapa, tun bai niu ah misenpui in ciata ah lungto in na sep tum tlang zo i; tun feh leh tuh isim?” tiin ti tlang i.

⁹ Jesuh in, “Nikhat ah nazi hlaihnih um ilo im? Aisu khai sun khuavar ah a vaktute tu bah awng lo i, zaimantifangin laivum ai a ummi tleuhnak hmu manin i.

¹⁰ Ikhalselai khuathim songah vak lekhaw bah i, zaimantifangin tleuhnak nai lo i,” tiin ti i.

¹¹ Ciami a rel ben fangin, “Kin rual Lazarus tu mitmu zo i; ikhalselai kaimah feh tuhai phawr tuh ing,” tiin ti i.

¹² A hnuahlunte in, “Bawipa, mitmu lekhaw cak leh tuh i,” ti tlang i.

¹³ Jesuh in a rel nuamhnak tu Lazarus thi i, tihnak khiah i ai a anite cenin a mitmu menma i ti rel vuah i, tiin ruat tlang i.

¹⁴ Ciamanin Jesuh in fiang ngai in rel ai, “Lazarus thi zo i;

¹⁵ Ikhalselai ning caah ning sang thil tuhin a hnenah i um lo heh i ang i; tho tu ilai a hnenah feh tuh ising,” tiin ti i.

¹⁶ Thomas (Faphir ti ai kohnak) in hnuahluntu a rualpuite hnenah, “Sayapa thawn thi tlang tuhin feh ngasing,” tiin ti i.

Jesuh Tu Tholehhnak Le Nunhnak I

¹⁷ Jesuh hleng fangin Lazarus phum hnua ni li zo ihang.

¹⁸ Bethany tu Jerusalem an peng hnih khim deuh lo i ai,

¹⁹ Judah mi tampui tu a hmingpa ai thihsan mite Martha le Mary topui tuhin kawi tlang i.

²⁰ Jesuh a kawi lai i, ti Martha in a za fangin amah hmuak tuhin feh i, ikhalselai Mary tu inn ah um i.

²¹ Martha in Jesuh hnenah, “Bawipa, heta ah um ta silai i hmingpa tu thi tuh lo napui i!

²² Ikhalselai tunin rin Pathian in na ngenhnak tu na pe tuh i, ti ling ing,” tiin ti i.

²³ Jesuh in, “Na hmingpa tu nung leh tuh i,” tiin Martha heh ti i.

²⁴ Martha in, “I, ni hnuataber nia ah tho leh tuh i ti ling ing,” tiin sawn i.

²⁵ Jesuh in a hnenah, “Kai tu tholehhnak le nunhnak ing. Aisu khai i sangtu heh thi khalselai nung tuh i.

²⁶ Aisu khai kaimah songah a nungmi le i sangtu heh thi tuh nawn lo i. Hemi heh sang aw sim?” tiin zawt i.

²⁷ Martha in, “I, Bawipa, nang tu lailung ah a hleng tuhhnak Pathian ai Fapa Messiah i si ti na sang ing,” tiin ti i.

Jesuh Kap I

²⁸ Ciatihin a rel hnuaah Martha tu let ai a thupniu in a nau Mary ko i. “Sayapa heta ah um acia na van nakhaw,” tiin ti i.

²⁹ Ciami tu Mary in a za fangin suak ai hmuak tuhin rang ngai in feh i.

³⁰ Jesuh tu khua songah hleng lai lo i; Martha ai a tawkhnak hmunah um lai i.

³¹ Mary topuitute le hnenumte tu Mary suak ai rang ngai in a feh khiah hmu fangin hlun tlang ve i. Hlan ah kap tuh i tiin ruat tlang i.

³² Jesuh umhnak ah Mary hleng ai Jesuh a hmu sawng fangin a keham ah a khuk caicin ai, “Bawipa, heta ah um ta silai i hmingpa thi tuh lo napui i!” tiin ti i.

³³ Jesuh in Mary le a topuitute khai kap tlang khiah a hmu fangin a thin ur ai a lung zul i.

³⁴ “A konteng ah phum i si?” tiin zawt i. Anite in, “Bawipa, kawi tulai sik tu,” tiin ti tlang i.

³⁵ Jesuh kap i.

³⁶ Mizapui in, “Lazarus heh it ze lawmlam i!” tiin ti tlang i.

³⁷ Ikhalselai mi hrekkhat in, “Mitvai pa khua hmuruai ilo im? Lazarus heh thi loin zaimanin bawn ve lo ini?” tiin ti tlang i.

Lazarus Nung Leh I

³⁸ Jesuh tu a lungsia kongin hlanah feh i. Ciami hlan heh khukua i ai hlankua ka heh lungtlep pakhat in sin i.

³⁹ Jesuh in, “Lungtlep thawn tu ih,” tiin thupe i. Mithi pa ai farnu Martha in, “Bawipa, uih tuh zo i. Kin phumhnak ni li khim zo i!” tiin ti i.

⁴⁰ Jesuh in a hnenah, “Nangmah in sang peupeu lesikhaw Pathian songlawihnak hmu tuh isi, tiin na rel zo ilo ing maw?” tiin ti i.

⁴¹ Cen lungtlep heh thawn tlang i. Jesuh in vum lam sik ai, “I Pa, i relhnak na ngai manin anghnak thu na rel ing.

⁴² ponghnak i ngai sah ṭiode ti ling ing, ikhalselai heta ai a umtute in kaimah heh na hlathnak ing ti sang thil tuhin amahte manin hetih ai na relhnak i,” tiin ti i.

⁴³ Ciatihin a rel hnuaah aw cawm ngai in, “Lazarus, suak tu!” tiin au i.

⁴⁴ Lazarus tu, a kut le a ke luang tuamhnak in tuam ai a hmai khai tuam sio i; ciatih ai a funhnak thawn suak peupeu i. Jesuh in, “Hawk sah tu ilai feh tuseh!” tiin ti i.

Jesuh Rek Tuhin Phiar Tlang I

⁴⁵ Mary topui tuhin a hlengtu Judah mi tampui in Jesuh ai thil bawnhnak hmu fangin amah tu sang tlang i.

⁴⁶ Ikhalselai mi hrekkhat tu Farasite hnenah let ai Jesuh ai thil bawnhnak heh rel sio i.

⁴⁷ Ciamanin Farasite le suangbawi upate tu Councilte thawn tawk dun tlang ai, “Akontih in bawn tuh ising? Hemi pa ai ngaihsunurkul a bawn betbo heh sik tu ih!

⁴⁸ Hetihin sik menma lesingkhaw mi zongzong in ani tu sang tuhai ciafangin Rome acuzah thunaitute in kin Biakinn le kin miphun siatsuah tuh sek i,” tiin ti tlang i.

⁴⁹ Amahte lakah mi pakhat, Caiaphas tihnak, cia kum ah Suangbawi Sang a ṭuantu in, “Ning voi ze i!

⁵⁰ Mi tampui ca mi pakhat thi heh miphun pakhat pumpui ai hnawmral sek tahin pha deuh i, ti ling lo i sim?” tiin ti i.

⁵¹ A ngaingai in tifangin ciatihin a ponghnak tu a lungsuak in ponghnak ilo i; cia kum tu amah Suangbawi Sang a i bangin Judah miphun tumrul in Jesuh thi tuh i, tiin prophet bangin a relciahnak i.

⁵² A thi tuhhnak tu amah ca lek ilo in nuamhmuncang ah a piak siotu Pathian minungte pumkhat ah khawm tuhhnak inkhai i.

⁵³ Cia nia ai panin Judah mi hotute in Jesuh rek tuhin phiar tlang ihang.

⁵⁴ Ciamanin Judea peng ah Jesuh tu mizapui hmuh in khual tlawng nawn lo i; ciata in suak ai ramkhing hiangai umhnak Epharaim tihnak khua ah feh ai ciata ah a hnuahlunte thawn um tlang i.

⁵⁵ Judah mite ai Kansuak Puai can nong hang ai mi tampui tu puai bawn hlan cianghlimdunhnak bawn tuhin khuatenau in Jerusalem ah feh tlang diamdo i.

⁵⁶ Anite in Jesuh si tlang i; Biakinn songah taikhawm tlang ai pakhat le pakhat, “Akontih in ruat tlang i si? Puai hmunah kawi peu ni im?” tiin zawt dun i.

⁵⁷ Suangbawi upa le Farasite in, “Jesuh umhnak a lingtu um le i sikhaw kin pomthilhnak tuhin kin rel tu ih,” tiin thuthan i.