Joel 3 - Zanniat Bible

Miphunte Thukhan Tuh I

¹ Judah le Jerusalem mibawngpha in i bawn nia le can ah,

² miphunte hmunkhat ah kokhawm tuhai, Bawipa ai Thukhanhnak Horkuam ah fehpui tuh ing. Kaimah miphun Israel tumrul in amahte thukhan tuh ing. Zaimantifangin i minungte amahte ram song ṭen ah piak sio ai i ram heh khan dun sio i.

³ I minungte tu camciafung duk in zem dun i. Ciahlaiah pasal naupang le nupang naupang sal tuhin zuar ai amahte ngahhnak paisa in taksazuar leng ai zu ding tuhin zu lai i.

⁴ Kaimah caah ziang i si ning Tyre le Sidon le Filistin ramte? I vumah phuzul tum i sim? I vumah zaital phuzul thilhnak nai i si? Nai le i sikhaw hat ngai le a rang ngai in ning thil bawnhnak ning lu vumah letruai tuh ing.

⁵ Zaimantifangin i sui le ngun le i hlawnthil songlawi pawl tu ning biakinn ah thiar sio i si.

⁶ Judah le Jerusalem mite tu amahte ram an lamhlapui ah fehpui ai Greek mite hnenah zuar i si.

⁷ Ikhalselai ning zuarhnak hmun ahcen kaimah in forh tuhai ciami hmun heh zam tuh i. Ning thil bawnhnak tu ning lu vumah letruai tuh ing.

⁸ Ning fanu le fapate Judah mite hnenah zuar tuhai anite in lamhlapui ai a ummi Saba mi hnenah zuarh tuh i. Bawipa in rel zo i.

⁹ “Hemi thu tu miphun hmuahhmuah hnenah than tu ih; Raltawng tuhin ralring tu ilai Ning ralkapte tho tuseh. Raltawng tuh hmuahhmuah hmunkhat ah tawk dun in feh tuseh.

¹⁰ Ning lovaihnak tuhmuite tu ralvang ah deng tu ih; Ning thingkak cephnak cehrepte tu faite ah bawn tu ih. Mi ṭawnṭai ber inkhai tawng tu ve seh.

¹¹ Rang ngai in suak tu ih, A hiangai miphun hmuahhmuah, Ciata ah taikhawm tu ih,” ti i. Aw Bawipa, na ralkapte, raltawng tuhin kuat tu.

¹² “Miphun hmuahhmuah in raltawng tuhin suak tuseh; Bawipa ai Thukhanhnak Hmunrawn ah feh tuseh. Zaimantifangin miphun hmuahhmuah thukhan tuhin ciata ah to tuh ing.

¹³ “Rong khawm cu ihang, vangkawn suah tu ih; Kawi tu ih, cabit hmet tu ih. Cabit hmethnak khur dim i, ralca bel let i. Amahte sualhnak a roh ngai i.

¹⁴ Mi thawng tampui um i, Thukhanhnak Hmunrawn songah. Thukhanhnak Hmunrawn ah Bawipa ai nia nong zo i.

¹⁵ Ni le hlapui tu thim i. Arsite tleu nawn lo i.

Pathian In A Minung Hmuifu Pe Tuh I

¹⁶ Bawipa tu Zion in huk tuh dumdo i; Jerusalem an a aw suah tuh i. Ciafangin lai le van hlin tuh sek i; Ikhalselai a minung caah Bawipa tu a buan hmun i; Israel caah amah tu himhnak hmun i.

¹⁷ “Ciatihin kaimah heh Bawipa ning Pathian ing ti khiah ling tuh i si; Kaimah Mual Thianghlim Zion ai a umtu ing! Jerusalem tu khua cianghlim i tuh i; Ramdangmi aisu inkhai, Jerusalem khua song fon thil tuh lo i.

¹⁸ Cia nia ahcen tlangsang in cabitti suak tuh i; Mual niu in kawlpawhnawi luang tuh i. Judah ram runti hmuahhmuah ah ti luang tuh i. Bawipa ai inn in cirhti suak tuhai, Sittim phairawn in ti ngah tuh i.

¹⁹ “Ikhalselai Egypt tu nelrawn ro ah cang tuhai, Edom ram tu ramkhing ah cang tuh i. Zaimantifangin Judah ramah thil poimawh bawn ai, Mawh nai lo thisan suakruai manin i.

²⁰ Ikhalselai Judah ramah kumzangza in minung laileng tuh i; Jerusalem ah catloin minung um tuh i.

²¹ Thisan man heh kaimah in phuzul tuh ing; Bawipa kaimah heh Zion Mual ah um tuh ing,” ti i.