Job 5 - Zanniat Bible

¹ “Job, ko tucuk! Na awitu aisu um nitur? Na zuan tuhhnak vancungmi pakhat tal um awm?

² Thinraw thliahthlo ai nung heh Mivoite rektu i. Iksikhnak tu thinlung tenau pawl hnawmcan de i.

³ Mivoite thinnuam ngai ai um hmu zo ing; Ikhalselai mangrinlo in a innsang tu cukcamhnak tawk i.

⁴ A fate tu humhimhnak tawk awng kel lo i; Thukhanhnak hmunah aisu inkhai anite ṭan in ding tuh lo i.

⁵ Mivoite ai lo rong tu rikam mite in ai tuh i; Hling lakai a pohnak rong tianin; Anite lianhnak tu tihaltute in lem tuh i.

⁶ Phatlohnak tu laipua songin po lo i; Harsahnak khai laipua songin a khanghnak ilo i.

⁷ Maipuak tu mai songin a suak de bangin, Minung vumai a hlenghnak harhnak tu amah minung lala in suakruai i.

⁸ Kai tu nang i inglai, Pathian lamah let tuh ing, I thu heh a hnenah hlenpui tuh ing.

⁹ Thilmak rohroh a bawnhnak tepawl tu ling thil tuh awng lo ising; Mangbangkul a bawnhnak tepawl tu bo nia um tuh awng lo i.

¹⁰ Laivum ah ruahsiruai ai loramte behruai i.

¹¹ I, milungnem a cawisangtu le lungsiatute hmuahhmuah hnenah anghnak a petu heh Pathian i.

^12-13 Mi leple pawl ai tumtekhnak tu siatsuah ai, Mifimte tu amahte khuakhanhnak in awkruai i. Ciatihin a bawnhnak zaibang ahkhai hlawhtling tuh cuang lo ai,

¹⁴ Sun khuavar ah rin zan khuathim song bangin vak tlang i.

¹⁵ Ikhalselai Pathian in mifarahte tu thihhnak in o ai, Mi hlawhsamte tu naunehhnak songin o i.

¹⁶ Mi rimsute hnenah umlamhnak pe i, Ikhalselai hrokhrawl mite tu vit ai a ka hup sah i.

¹⁷ Pathian ai nunthutiam mite tu mi lungawi i! Nun thu na tiam lekhaw lungsia mah.

¹⁸ Pathian in a tuahmawhhnak tu a mah lala in tuamhlawm i; A kut in maliam ai a kut lala in cakruai i.

¹⁹ Amah in harhnak phun ruk songin na o tuh i, Pa sarih songah khai phatlohnak zai inkhai na tong thil tuh lo i.

²⁰ Rian a tlung ita inkhai na thiruai tuh lo i; Raltawnghnak um inrin thihhnak ralvang songin na kham tuh i.

²¹ Mi ai relsiahnak songin Pathian in na hup ai, Hnawmcanhnak a hleng inkhai na him tuh i.

²² Thisan luanghnak le rikamhnak hmu tuh sio napui, Hnihsan tuh menma ai, Sahrang khai kih tuh lo isi.

²³ Na lovaihnak ah lungto um tuh lo ai, Sahrangte thawn khai rualrem niu in um tuh isi.

²⁴ Na ponhlam songah muang niu in um tuhai, Na tuute na sik fangin khai him tlang liang khiah hmu tuh isi.

²⁵ Na tefate tu tam tuh roh i, laipua ai hampa zah tuh i.

²⁶ Rong khawm can tian himniu ai a nungmi sangvut bangin, Kum raipui le san pha bik in na nung tuh i.

²⁷ Job, hemi thu heh kum raipui zir ai i linghnak i. Thudik i, ciamanin pom tuhang,” ti i.