Job 2 - Zanniat Bible

Satan In Job Cu Lehthio I

¹ Bawipa ai hmaiah vancungmite khawm tlang can cu lehthio ai Satan khai anite hnenah tel ve lala i.

² Ciafangin Bawipa in, “Akonan kawi isi?” tiin zawt i. Satan in, “Laivum pumpuhluk suk le so ah i vakhnak hmun an kawi ing,” tiin sawn i.

³ Bawipa in, “I cengpa Job heh hmu aw sim? laivum ah amah bangtu mipha le rinsantlak aisu khai um lo i. Kaimah i bia ai thil sual zaikhai bawn lo i. Ziang thula um lopui in Job tu, ‘Siatsuah tuh ing,’ tiin i zawl manin lung na khimpui ing; Ikhalselai Job tu a hlan bang thotho in rinsantlak in nung hlen i,” tiin ti i.

⁴ Satan in, “Aisu bang minung ita inkhai amah ai nunhnak tahin a naihnak hmuahhmuah hnawl sawn i.

⁵ A taksa heh tuahmawh ngaingai silai hmaiton rori in cuk na cam tuh i,” tiin sawn i.

⁶ Ciamanin Bawipa in, “Na tihnak bangin cang tuseh. Na kut songah um i. Ikhalselai amah tu rek tuh lo isi,” tiin Satan khiah ti i.

⁷ Satan tu Bawipa ai umhnak an feh ai Job ai taksa pumpuhluk ah, a sip in a kehmur tian, uihlut masia poruai diamdo i.

⁸ Ciafangin Job tu feh ai vutkuang lakah to kongin a hmaihma heh belpai keh thawn khuat phuahpho i.

⁹ A nupui in a hnenah, “A hlan bangin rinsantlak in um lai thotho isim? Zaimanin Pathian heh cukcam in thi sawn lo isi!” tiin ti i.

¹⁰ Ciafangin Job in, “Nupang voi bangin pong na sikhaw! Pathian in thil pha kin pe fangin lung kin awi i. Zaimanin harsahnak kin hnenah a hlengruai fangin phuncam tuh hnelhno ising?” tiin ti i. Hebang in tuar napui Pathian hnenah pongsia kam khat bangkhai pong lo i.

Job Rualpuite Kawi Tlang I

¹¹ Job ai rualpuite pathum tu Teman khua an Eliphas, Shuah ram an Bildad le Naamah ram an Zophar i. Job ai rimsu harsa tuarhnak khiah za fangin a hnenah leng ai lungsiapui tuhin le hnem tuhin feh tlang i.

¹² Vanghla in hmu fangin Job heh lingthiam tlang nawn lo i. Job i ti ling ngah fangin lungsia in kap tlang ve ai hnikpon zik in laivut khiah van ah hlip ai amahte lu ahkhai phulh tlang i.

¹³ Cen laipua lakah ni sarih le zan sarih song to tlang ai a tuarhar zia a hmu fangin aisu inkhai kam khat tal bangkhai pong tlang lo i.