Job 1 - Zanniat Bible

Job Le A Innsang

¹ Uz tihnak ramah mi pakhat um ai a hming tu Job i. Job tu Pathian biatu le a rinsantu i. Ani tu mipha i ai thil sual zaikhai bawn hiam lo i.

² Fapate pasarih le fanute pathum a nai hlaiah,

³ tuute thawng sarih; kalaukte thawng thum; kawlpawte thawng khat le laakte za nga nai i. Hnenum tampui khai nai ai Nisuah lam hmuahhmuah ah milian ber i.

⁴ A fapate in a sonson in rong aih puai bawn de ai hmunkhat ah rong ai tlang de i; a farnute khai sawm de i.

⁵ Puai bawn ben fangin a thangha zingniu in Job tu tho ai a fapate cianghlimhnak tuhin hibawlhnak sel de i. Tumtek hrimhnak um loin Pathian zohsuam ai sual pang fangin ti lau manin ciatihin bawn ṭiode i.

Pathian Le Satan Pondunhnak

⁶ Bawipa ai hmaiah vancungmite suak tlang nia a hleng fangin Satan khai amahte lakah tel ve i.

⁷ Ciafangin, Bawipa in, “Akon lamin kawi isi?” tiin Satan heh zawt i. Satan in, “Laivum pumpuhluk, suk le so i vakhnak hmun an kawi ing,” tiin ti i.

⁸ Bawipa in, “I cengpa Job khiah hmu aw sim? Laivum pumpuhluk ah amah bangtu mipha le rinsantlak aisu khai um lo i. Kaimah i bia ai thil sual zaikhai bawn lo i,” tiin ti i.

⁹ Ciafangin Satan in, “Zaikhai ngah hlah selai na bia nuam ni hang im?

¹⁰ Amah ituseh, a innsang ituseh, a naihnak hmuahhmuah tianin huphim ai kilkhawl sah isi. Thil a bawnhnak hmuahhmuah vumah hmuifu pe ai sumhnam na pehnak tam ze ai a ramah dim sio i.

¹¹ A naihnak hmuahhmuah heh lang sah sek silai na hmai rori ah cuk na cam tuh dek ngawn i,” tiin ti i.

¹² Bawipa in Satan hnenah, “Na tihnak bangin pha i. A naihnak hmuahhmuah na kut songah um i. Amah Job ngawn siatsuah tuh lo isi,” tiin ti i. Cen Satan tu feh i.

Satan In Job Cu I

¹³ Vaikhat ah Job ai fate tu a upa ber pa inn ah rong aihnak puai bawn tlang teng fangin.

¹⁴ Mi pakhat thuphurtu a dawp kongin Job hnenah, “Kawlpawte thawn lai kin let lianglo teng fangin laakte tu amahte hiang hampa ai tlang murhmo laiah,

¹⁵ mangrinlo in Sebean mite in kin sim tlang ai kin sumhnamte hmuahhmuah kin sut sek i. Kaimah siarlo na hnenum hmuahhmuah rek berh i. Kaimah lek heh zualkotu in a tlan man fangfang ing,” tiin Job hnenah rel i.

¹⁶ Ciami pa ai pong a bo hlanah hnenum dang pakhat hleng lala ai “Na tuurual le na tuukhalte tlek in tlak ai a veksen thi sek i. Kaimah lek heh zualkotu in a tlan man fangfang ing,” tiin Job hnenah ti i.

¹⁷ A pong a ben hlanah hnenum dang pakhat dawp lala ai, “Chaldean mi damiah rualte bur thum in sim tlang ai kalauk hmuahhmuah lang sek hlaiah kaimah siarlo na hnenum dang hmuahhmuah rek berh i. Kaimah lek heh zualkotu tuhin tlan man ing,” ti i.

¹⁸ A pong rin a ben hlanah, hnenum dang pakhat kawi lala ai, “Na fanu le na fapate na fapa upa ber inn ah rong ai puai a bawn laitak ah,

¹⁹ nelrawn in hlisia zuang ai a inn sawn lio manin a songai umtu minung hmuahhmuah thi sek i. Kaimah lek heh zualkotu in a tlan man fangfang ing,” tiin Job hnenah ti i.

²⁰ Ciafangin Job tu tho ai a lungsia in a hnikpon zik i. A sam met sek ai laipua lakah bok in,

²¹ “Kawngkolh in i te ai kawngkolh in i thi tuh i. Bawipa in i pe ai tunin lang leh i. A hming thangphat in um tuseh,” tiin ti i.

²² A hnenah hebang thil hleng napui Job in Pathian mawhhluk lo ai Pathian hmaiah sual lo i.