Jeremiah 6 - Zanniat Bible

Ralte In Jerusalem Kulh Tlang I

¹ Aw Benjamin mite, himhnak hmunah tlan tu ih, Jerusalem an tlan tu ih! Tekoa ah thirhlung tum tu ilai Beth Haccherem ah mai in lingruaihnak larruai tu ih. Harsahnak le hnophnak tu sak lamin hleng tuh i.

² Zion khuapui, a mawi a nal zirzer khiah siatsuah tuh sek i.

³ Ciata ah a ralkapte thawn kumpibawite zancam tuh i. Khuapui cingkim ah amahte riahbuk sa tuhai amahte nuamhmuncang ah zancam tlang tuh i.

⁴ Ciamite in, “Jerusalem tawng tuhin ralring tu ih, sun ah tawng tuh i ing,” tiin au tuh i. Ikhalselai, “Khuahnua zo i, khuahnua zo ai khuathim dawn ihang.

⁵ Zan khuathim lakah tawng tuhai khuapui kulhhnak vingpuite bal tuh sek i ing,” ti leh tuh i.

⁶ Cungnungber Bawipa in hemi kumpibawite hnenah Jerusalem khuasong thingkungte vawng tuhin le Jerusalem tawnghnak hrangah laipawng tiang tuhin thupe i. Bawipa in, “Hemi khuapui tu naunehhnak in a dim manin cawh tuh ing.

⁷ Tikhur in ti a thar put ṭio bangin he Jerusalem khuapui an thilsual a thar suak ṭiode i. Vitdunhnak le siatsuahhnak in dim ai he khuapui songah urhnak le hmaihma lek hmu ing.

⁸ Aw Jerusalem mite, hemi harsahnak heh ning ralringhnak tuhin cang tuseh. Ciahlahle kaimah in ning zam tuhai ning khuapui tu aisu khai um nuam lohnak nelrawn ah bawn tuh ing,” tiin ti i.

Mitawngcai Israel

⁹ Cungnungber Bawipa in kaimah hnenah, “Israel tu cabit thai momret in a loihhnak cabit vuan kolh bangin kolh tuh ve i. Ciamanin can a um laiah na osuak ben zah in o tu,” tiin i ti i.

¹⁰ Ciafangin kaimah in, “Amahte hnenah pong in ralringhnak thu rel napui aisu in i ngai nuam tuh i? Mi lungruh pawl i ai amahte bil hu in nangmah ai thu rin na ngai nuam lo i; Amahte hnenah phuang tuhin na relhnak rin hnih i san tlang menma i.

¹¹ Amahte vumah na thinrawhnak tu i songah mai bangin ko ve ai dapthen in um thil nawn lo ing Bawipa,” tiin ti ing. Ciafangin Bawipa in kaimah hnenah, “I thinrawhnak tu lampui ai naupangte vumah le a bur ai laileng minote vumah burh tu. Nupui le pasalpuite khai a pom hnuaah fehpui tuh sio ai nutar le patarte khai zuah tuh lo i.

¹² Amahte innpuite midang kut ah hleng tuhai amahte lo le nupuite khai midang hnenah pe i tuh i. Hemi ram mite heh cawh tuh sio ing.

¹³ Hemi ram mite aisusu khai a cik a lian in a dikcang loin tangka ngah tuh tum tlang i. Prophet le suangbawite inrin mi zawl i.

¹⁴ I minungte ai hmaihma tu a vun hiat menma ah ruat ai, “Pha hlen i, pha hlen ngawn i,” ti tlang i. A pha sio khai i fawn lo i.

¹⁵ Hebang ningdulkul thil bawn manin zakthi tang thiam tlang awm? Thiam lo i! Zakthihnak zaikhai nai tlang lo i. A mithmai khai san lo i! Ciamanin midang bangin a roh ngai in tlu tuh i. Kaimah in i cawh fangin tu a tawphnak tuh ihang. Kaimah Bawipa in rel zo ing,” tiin ti i.

Israel In Pathian Ai Lampui Hnawl I

¹⁶ Bawipa in a minungte hnenah, “Lamkhek ah ding tu ilai khuacuan tu ih. Hlanlai lampui le lampui pha ber akonah um i, tiin zawt tu ih! Ciami lampui in feh tu ilai lungmuang in um tuh i si,” ti i. Ikhalselai anite in, “Feh tuh lo i ing,” ti i.

¹⁷ Cen Bawipa in ralring pehnak thirhlung ngaitu tuhin a kiltu dah i. Ikhalselai anite cenin, “Ngai kin nuam tuh lo i,” ti i.

¹⁸ Ciamanin Bawipa in, “Aw laivum miphunte ngai tu ih! I minung vumah thil a hlenghnak heh ling tu ih!

¹⁹ Aw lailung, ngai tu! I thu ngai tlang lo ai i thuzirhhnak hnawl manin le hebang thil tumtek manin amahte vumah siatsuahhnak hlengruai tuhai cawh tuh ing.

²⁰ Sheba ram an hibawlhnak hrang rimhmui a kenghnakte le lamhlapui in yihmui rimur a kenghnakte tu zaikhai siar sah lo ing. Amahte pehnak thil khai sang sah tuh lo ai hibawl a selhnak vum ahkhai i ang tuh cuang lo i.

²¹ Ciamanin hemite tu bahruai tuhai sawnruai tuh ing. Pa le fa khai hmunkhat ah thi kawm tuhai rualpui le innhnente khai thi tuh i,” tiin ti i.

Sak lam An Raltawnghnak

²² Bawipa in, “Sak lam ram an mi kawi i. Lamhlapui ai miphun hat ngai pawl raltawng tuhin pai thliahthlo i.

²³ Amahte conkiang le ralvangte awh ciazo i. Ninghiohnak le ngaihharhnak zaikhai nai loin kawi i. Amahte siphuh to ai a thawmvang tu tifingriat tilep awthawm bang i. Jerusalem tawng tuhin ralring zo i,” tiin ti i.

²⁴ Jerusalem mite in, “Ciami thawmvang khiah za zo ai kin kut tha khai zong sio i. Nupang nau nai bangin donharhnak le panhlahhnak in kin dim i.

²⁵ Hampalak lamah suak ngam tlang lo i ing; lampui ahkhai vak ngam lo i ing, zaimantifangin ralte ralthuam awh in kin cingkim ah tihikkul in dim i,” tiin ti i.

²⁶ Cen Bawipa in a minungte hnenah, “Buri hnikpon sil tu ilai vutkuang lakah lungsia in tal tu hnelhno ih. Ning fapa naihsun thi ai ning kah tuh bangin mithli far in kap tu ih, zaimantifangin ningmah tawng tuhin a kawitu ralte mangrinlo in ning tawng tuh ihang.

²⁷ Aw Jeremiah, thir na cu bangin i minungte heh cu tulai zaibang i ti sik tu!

²⁸ Amahte veksen in raltho nuam, mi thinlung ruh i ai, amahte thinlung tu thir le dar bangin a hak bikraw i! Nawhthuh ai pawl, nuamhmuncang ah mi hnophnak a thupniu in a reltute i!

²⁹ Pummai tu vam ngai napui thir ek tu ti thil nawn lo ihang, zul thil nawn lo i. I minungte ciangfai tuseh tiin cu thliahthlo le hmut thliahthlo heh a lovang i, tlak lo i; zaimantifangin misualralte tu lonhnak tuar cuang lo i.

³⁰ Anite tu thir hnawm ek bang ihang, zaimantifangin kaimah Bawipa in hnawl zo ing,” tiin ti i.