Jeremiah 52 - Zanniat Bible

Jerusalem Tluhnak

¹ Zedekiah tu Judah kumpibawi a cang fangin kum kul hluankhat i ai Jerusalem an kum hlaikhat uk i. A nu ai hming tu Hamutal i ai Libnah khua ai umtu Jeremiah ai fanu i.

² Kumpibawi Jehoiakim bang thotho in kumpibawi Zedekiah khai Bawipa vumah sual i.

³ Bawipa tu Jerusalem mi le Judah mite vumah a thinraw ai a mithmuh lohnak hmunah hnawt sek i. Babylon kumpibawi Nebuchadnezzar tawng nuam in Zedekiah tu raltho i.

⁴ Nebuchadnezzar tu a ralkapte thawn feh ai Zedekiah kumpibawi a canghnak kum kua kum, hla hra hla, ni hra nia ah Jerusalem tawng i. Khuapui pualam ah riahbuk sa ai, ciami khuapui kulhhnak pualam in a cingkim in laipua tiang ai,

⁵ Zedekiah kumpibawi a cang kum hlaikhat kum tianin kulh i.

⁶ Cia kum hlaikhat kum, hla li hla, ni kua nia ah rian tlung a roh ze manin khuasong mite zaikhai aih tuh nai nawn lo i.

⁷ Cen khua kulh vingpui bal ai a min hnuaah Babylon ralkapte in Jerusalem khuapui kulh liang napui Judah ralkapte tu zan khuathim lakah tlan sio i. Kumpibawi vuan lakin feh ai vingpuite pahnih a pehtu kotka lampui in feh ai Jordan phairawn lamah tlan i.

⁸ Ikhalselai Babylon ralkapte in kumpibawi Zedekiah hnawh ai Jericho khua hiang zawllai ah pom ngah i; a ralkapte in hlum sio i.

⁹ Cen Zedekiah tu kumpibawi Nebuchadnezzar hnenah fehpui i. Cialai ah Nebuchadnezzar tu Hamath ram Riblah khua ah um ai ciata ah Zedekiah ai thu khiah rel sah i.

¹⁰ Nebuchadnezzar in Riblah ah Zedekiah ai fapa pakhat a pa mithmuh rori ah rek i; Judah ram bawi dangdang khai rek i.

¹¹ Cia hnuaah Zedekiah ai mitfang phorh ai thir cikcin in khit ai Babylon ah kuat i. Babylon ah Zedekiah tu a thi nia tianin thawng songah um i.

Jerusalem Biakinn Siatsuah I

¹² Nebuchadnezzar in Babylon kumpibawi a canghnak kum hlaikua kum, hla nga hla, ni hra nia ah, kumpibawi hnenah ruathnakpetu le ralkap hotu ralbawi Nebuzaradan khiah Jerusalem khua songah lut ai,

¹³ Biakinn le, kumpibawi inn le Jerusalem khua songai bawi upate ai inn hmuahhmuah mai in tai sio i.

¹⁴ A ralkapte in khuapui kulhhnak vingpui bal sek i.

¹⁵ Cen Nebuzaradan in Jerusalem ai a tangtu minungte, kutzungthiamte le Babylon ralkapte hnenah a relhtute hmuahhmuah Babylon ah fehpui sio i.

¹⁶ Cen Judah ramah mifarah ber pawl le thilri zaikhai a nai lo mite khiah hlum ai lo napertu tuhin le cabit vuan vaitu tuhin dah i.

¹⁷ Babylon mite in Biakinn songai a umhnak dar ai bawnhnak khuamte le lengte seu sek ai dar tikuang lianpui khai hnawmruai sek i. A dang dar ai bawnhnak thilri hmuahhmuah Babylon ah phur sio i.

¹⁸ Cen hlengpuite, puleng thianfai fangin hmanghnak vutkuang khawlhnak hlengte, maivarhnak maikhuat ai khuamte, hibawlhnak sel fangin sathi donghnak maihumte, rimhmui tai fangin hmanghnak hlengkumte le Biakinn songai hmanghnak dar thilthuam hmuahhmuah khai lang sio i.

¹⁹ Sui le ngun ai bawnhnak thilri hmuahhmuah khai lang sio i; pakankumte, mailing tawihnak hlengte, hibawl fangin sathi khawlhnak maihumte, vutkuang dahhnak hlengte, maikhuat khuamte, rimhmui taihnak hlengte le cabitti hibawlhnak sel fangin cabitti bunghnak maihumte khai lang sio i.

²⁰ Kumpibawi Solomon in dar ai bawnhnak thilrite: khuamte pahnih, lengte, tikuang lianpui le tikuang dotu kawlpawcangte hlaihnih tu cuai teh thilh tuh loin rit i.

^21-22 Khuamte pahnih tu a bang dun i; pakhat tu pi kul hluan sarih sang ai pi hlairiat lian i; a song kua ai a thir tu pi thum sah i. Khuam hmurah dar ai bawnhnak lubol um ai pi sarih le hrek sang i; a cingkim ah tale thai cuang ai mawiruaihnak um ai a veksen in dar ai bawnhnak i.

²³ Ciatihin mawiruaihnak tale thai tu khuam lu pakhat ah zakhat um ai ciami songah sawmkua le paruk tu laipua in hmu thil i.

Judah mi Babylon Ah Fehpui I

²⁴ Ciahlaiah Babylon ralkap hotu ralbawi Nebuzaradan in Suangbawi Sang Seraiah le Suangbawi Sang sangtu suangbawi Zephaniah le Biakinn ai bawi lian puipui pathumte khiah thawng toh tuhin fehpui sek i.

²⁵ Khuapui songai ralkapte hotu ralbawi pakhat, khuapui songai a tang laimi kumpibawi ruathnakpetu songin minung pasarih, ralkap zung ai laibu awhtu le ralbawi sangtu pakhat le mi upa deuhdeuh minung sawmruk khai fehpui i.

²⁶ Nebuzaradan in Hamath ram, Riblah khua ai a umtu,

²⁷ Babylon kumpibawi hnenah fehpui i. Ciata ah Babylon kumpibawi in vitruai ai rekruai i. Ciatihin Judah mite tu amahte ram an saltanghnak ramah fehpui i.

²⁸ Nebuchadnezzar in sal tuhin a fehpuihnak minung laibu tu a hnia lamai bangin i: Kumpibawi a canghnak kum sarih kum ah minung thawng thum le kul hluan thum;

²⁹ A kum hlairiat kum ah Jerusalem an minung za riat le sawmthum le pahnih;

³⁰ Kum kul hluanthum kum ah minung za sarih le sawmli le panga; amahte veksen in minung thawng li le zaruk Nebuchadnezzar in hoi sio i.

³¹ Evilmerodach tu Babylon kumpibawi a cang kum ah Judah kumpibawi Jehoiachin vumah ninghiohnak a nai manin thawng in suah i. Ciatihin a suah heh Jehhioakhin thawng toh tuhin a hoi hnua kum sawmthum le kum sarih kum, hla hlaihnih hla, ni kul hluannga nia ah i.

³² Evilmerodach in Jehoiachin heh phatak niu in sik ai Babylon ai thawng a to ve mi kumpibawi dangdang hnenai upat a pehnak tahin tam sawn in upathnak pe i.

³³ Ciatihin Jehoiachin tu phatak niu in sik ai a thawngtohnak hnikpon thlengruai ai a nun song hmuahhmuah kumpibawi cabuai ah rong airuai i.

³⁴ A nun song nisiar in a kulhnak lai tuhin Babylon kumpibawi in Jehoiachin khiah tangka pe ṭiode i.