Jeremiah 51 - Zanniat Bible

Babylon Vumah A dang Thukhanhnak

¹ Bawipa in, “Babylon le a minungte vumah siatsuahtu khuahu hlengruai ing.

² Khuahu in fanghi a hmut bangin Babylon siatsuahtu tuhin ramdang mi hlat tuh ing. Ciami siatsuahhnak nia a hleng fangin nuamhmuncang in tawng tuhai amahte ram heh kolh sio in a bawn hnuaah zangtak tuh i.

³ A ralkapte conkiang sai can pe mah ih. Amahte thir angki sil can khai pe mah ih. Tlangval i tiin aisu khai zuah mah ih. Amahte ralkap a veksen in rek tu sio ih.

⁴ Maliam tuhai amahte khuate ai lampui ah thi tlang tuh i.

⁵ Israel ai a Thianghlim Kaimah vumah sual zo napui Bawipa, Cungnungber Pathian kaimah in Israel le Judah mite tu zangtak lai lo ing.

⁶ Babylon an tlan tu sio ih. Luat tuhin tlan tu ih. Babylon sualhnak manin rekhnak tuar nuam mah ih. A vumah phuzul ai a tuar tuh zah in cawh ing.

⁷ Babylon tu i kut songai sui khuat, laivum pumpuhluk a riruaitu bang i. Mi phuncang in a zu ding ai amahte thinlung molh zo sio i.

⁸ Babylon tu mangrinlo in tlu ai hnawmral zo sio i. Kap tu dekdo ih. A hmaihma mat tuhin si, si sah tu ih, A cak leh khai i thai pang i.

⁹ Ciata ai a umtu ramdang mite in, ‘Babylon bawm tum napui khua hnua ze zo i. Hlum ngasing khaw kin ram le kin khua ah tlung ngasing. Pathian ai a hathnak hmuahhmuah thawn Babylon tu cawh ai hnawm zo sio i,’ ti i,” tiin ti i.

¹⁰ Bawipa in, “I minungte in ‘Bawipa in kin dikcanghnak larruai zo i. Feh ngasing khaw Bawipa kin Pathian ai thil bawnhnak tu Jerusalem mi hnenah rel ngasing ih,’ tiin au tlang i,” ti i.

¹¹ Bawipa in Babylon siatsuah a tum manin Media kumpibawite sopaw i. A Biakinn hnawmruai manin ciatihin phuzul tuh i. Ralkapte hotu ralbawi in, “Ning conkiang a sandir in tat tu ih. Ning lum awh tu ilai ralring tu lep ih!

¹² Babylon khuakulhhnak vingpui tawng tuhin lingruaihnak bawn tu ih. Ral kiltu hlat bet tu ih. Kilkhawltu dah tu ih. Ral bawhtu tuh hlat tu ih!” ti i. Bawipa in Babylon mite vumah bawn tuh ing a tihnak tu bawn zo i.

¹³ Khia ramah runti tampui le sumsaw tampui um i; ikhalselai can nai nawn lo i; a nunhnak ri tu sat zo i.

¹⁴ Cungnungber Bawipa in Babylon tawng tuhin minung tam ngaingai, sirsing zah hlat tuhai ral nehhnak thawn au tuh i, tiin amah nunhnak sal in thukham zo i.

Pathian Thangphathnak La

¹⁵ Bawipa in laivum heh a huham in bawn i; A fimhnak in laipua heh semsuah ai, van khai pharh i.

¹⁶ Amah ai thupehnak in van ah khuari i; Van hamtong in khuanim koih i. Ruah lakah vantlingtleleuh ruai ai, A thil dahhnak inn in hlivua kuat i.

¹⁷ Ciami a hmu fangin minung tu, zaikhai ling lo ai mivoi bang i. Milim bawntute tu, thinpit le lungsia in um i. Zaimantifangin amahte bawnhnak khuavangte tu nunhnak nai lo i, a lim ian i.

¹⁸ Zaihnak inkhai hnempuihnak nai lo ai, zohsuam tlak i; hnawmral tuh sek i; Bawipa a kawi fangin!

¹⁹ Jacob ai Pathian tu ciatihbang ilo i; Amah tu zaizongza a bawntu i. Israel mite tu amah bul ai tuhin a rilhnak mite i; Amah ai hming tu Cungnungber Bawipa i.

Bawipa Ai Sobul

²⁰ Bawipa in, “Babylon, nang tu i sobul isi; Ral i tawnghnak ralthuam isi. Miphun le ukhnak tampui seuhnak ah na hmang ing.

²¹ Siphuh le a totute seuhnak ah, Siphuhleng le a mawngtute seuhnak ah

²² Nupang le pasal rekhnak ah, Mino le upa rekhnak ah, Fenu le tlangval rekhnak ah,

²³ Tuukhal le a tuute rekhnak ah, Lovaitu le a lailethnak kawlpawte rekhnak ah, uktu le bawite rekhnak ah,” ti i.

Babylon Cawhhnak

²⁴ Bawipa in, “Jerusalem vumah thilsual bawn manin Babylon le a minungte hnenah phu i zul khiah hmu tuh i si.

²⁵ Aw Babylon, nang tu laivum pumpuhluk a hnawmcantu tlangsangpui bang isi; ikhalselai Bawipa kaimah heh na ral ing. Na pom tuhai laipua lakah na lon tuhai vutkuang ah na cangruai hnuaah na zam tuh ing.

²⁶ Khuarop ah na cang tuhai na lungto pakhat tal khai inn sahnak ah hmang leh tuh nawn lo i. A kumzangza in nelrawn ah na cang lan tuh i. Kaimah Bawipa in rel zo ing.

²⁷ “Raltawng tuhin lingruaihnak thantar tar tu ih! Miphunte in ling tuhin thirhlung tum tu ih. Babylon tawng tuhin miphunte ralring tu ih. Raltawng tuhin Ararat ram, Minni ram le Ashenaz ramte sim tu ih. Raltawng hotu tuhin ralbawi pakhat ril tu ih. Khokhuak bur tampui bangin raltawnghnak siphuhte khai koih tu ih.

²⁸ Babylon tawng tuhin miphunte ralring tu ih. Media kumpibawite, amahte hotu le bawite, a ralkapte le amahte ukhnak ram hmuahhmuah ko tu sio ih.

²⁹ Laivum pumpuhluk tu hlawng ai hlin dekdo i. Zaimantifangin Babylon ram tu nelrawn ah cangruai ai aisu khai um lohnak ramkhing ah cang tuhin Bawipa in a tumtekhnak bawn zo i.

³⁰ Babylon ralkapte tu raltawng nawn loin amahte relhhmun ralkulh songah com i. Thinnau zo ai nupang bang cang zo i. Khuapui kotkate tu bal zo sio ai innte tu mai in kang diamdo i.

³¹ Babylon khuapui tu nuamhmuncang in bal betbo zo i, tiin Babylon kumpibawi rel tuhin thuthantu pakhat hnua pakhat dawp i.

³² Ralte in Runpui tanhnak hmun lang zo ai bawhkulhte heh mai in tai i. Babylon ralkapte tu uk thilh nawn lo ai suk le so ah vakvai tlang i.

³³ A rai hlanah ralte in sat tuh sio ai fangcilhnak hmunai fangcil bangin laipua lakah cil tuh dekdo i. Kaimah Cungnungber Bawipa, Israel ai Pathian in rel zo ing,” tiin ti i.

³⁴ Kumpibawi Nebuchadnezzar in, Jerusalem tu sat sek ai ai berh i. Ti dahhnak bel bangin lai sek i. Sahrang bangin thon sio i. A daihhnak ian lang ai, a dang tu lon sek i.

³⁵ Zion mite in, “Thisan kin luangruai manin, Babylon mite in tuar tuseh,” ti tuseh. Jerusalem mite in, “Harhnak kin tuar manin, Babylon mite cawhhnak tuar tuseh,” tiin ti tuseh.

Bawipa In Israel Bawm Tuh I

³⁶ Ciamanin Bawipa in Jerusalem mite hnenah, “Ning thu hlun tuhai ning vumah thilsual a bawnhnak manin ning ralte cawh tuh ing. Babylon ramai cirhti hnarte car ruai tuhai runpuite khai kangruai tuh ing.

³⁷ Khia ram khiah hnawmborh pumhnak bangin cangruai tuhai hampalak ramsa umhnak ian in cang tuh i. Sik ngam loin cang tuhai a hmutu hmuahhmuah in tihik tlang tuh i.

³⁸ Babylon mite tu chintit bangin huk tuhai chintit dawnniu bangin ai tuh i.

³⁹ Mi pamhap pawl i awm? Rong aih puai bawn sah tuhai zu ri tuhai thinnuam in um tuh i. Mitmu tlang tuhai phawk tuh nawn lo i.

⁴⁰ Tuu faniu, me le tuucang a ro bangin rek tuhin fehpui tuh ing. Kaimah Bawipa in rel zo ing,” tiin ti i.

Babylon Ai Tuarhnak

⁴¹ Bawipa in Babylon thu ah hetihin rel i: “Laivum pumpuhluk ai porhhnak khuapui tu ral in lang zo i. Mi phuncang hmaiah Babylon tu tihikkul cang zo i.

⁴² Tipui in Babylon khuk zo ai tilep tu a vumah huk dekdo i.

⁴³ A dang khuate tu sik hiam lo cang ai aisu khai um nuam lohnak, a fon tuh vut rin hiam tuh lohnak, nelrawn car ah cang i.

⁴⁴ Babylon ai khuavang Bel tu cawh tuhai a ru awnghnak thilrite khirhruai tuh ing. Miphunte in bia tuh nawn lo i. Babylon kulhhnak vingpui tlu zo i.

⁴⁵ Israel mite, tlan tu sio ih. Nung ning nuam lekhaw a kihkul i thinrawhnak heh hlum tu sio ih.

⁴⁶ Ning zahnak thawmvang manin lau mah ih. Ning thin khai nau mah ih. Kumsiar in thu dangdang, ram songah rekdunhnak le kumpibawi pakhat le pakhat tawngdunhnak thu thang i.

⁴⁷ Ciamanin Babylon i hnawmcanhnak can hleng tuh i. Ram pumpuhluk tu zakthi le mualpho in dah tuhai a minungte tu rekhnak tuar tuh i.

⁴⁸ Sak lam in siatsuah tuhin a kawitu minungte kut songah Babylon a tlu fangin lai le van ai ummi zaizongza khiah lungawi in au tlang tuh dekdo i.

⁴⁹ Laivum pumpuhluk ah minung tampui Babylon an thiruai i; tunah Babylon tu Israel mite tampui a thiruai manin tlu tuh ve ihang. Kaimah Bawipa in rel zo ing,” ti i.

Babylon Ai Israel Mite Hnenah Pathian Thucah

⁵⁰ Bawipa in Babylon ai a minungte hnenah, “Thihhnak in ning luat zo i! Tun feh tu ih! Zaikhai iang mah ih! Ning khua le ning ram tu a hla ze napui Bawipa kaimah heh i ling tu ilai, Jerusalem khai hih tu ih!

⁵¹ Ning in ‘Zakthi le mualpho in um zo i ing. Ramdang mite in Biakinn song hmun thianghlim pawl tu lang zo sio ai zaikhai ti thilhnak nai lo i ing,’ ti i si.

⁵² Ciamanin ning rel ing: Can hleng tuhai Babylon milimte siatsuah tuh sek ing. Maliamtute tu ram songah au in rung tlang tuh i.

⁵³ Babylon tu van ah kai ben in a kho ngai ral ṭanghnak ralkulh ralving sa ben khalselai ciami siatsuahtu tuhin mi hlat tuh thotho ing. Kaimah Bawipa in rel zo ing,” tiin ti i.

Babylon Siatsuah Tuhhnak

⁵⁴ Bawipa in, “Babylon an kaphnak aw le, ram song siatsuahhnak manin lungsia kaphnak thawm khiah ngai tu ih.

⁵⁵ Babylon tu siatsuah ai a thawmvang naihnak tu vit ai dap sek i. Ralkapte in a huk thliahthlo tilep bangin nem ai, Cawm ngai in au kongin tawng i.

⁵⁶ Babylon siatsuah tuhin kawi i; A ralkapte pom tlang i; A conkiangte ek sek i; Mihrokhrawl a cawhtu heh kaimah ing; Babylon vumah phuzul tuh ing.

⁵⁷ A ram uktute, a mifimte, a hotute le a ralkapte tu zu riruai tuh ing. Mitmu tlang tuhai phawk leh tuh lo i. Kaimah kumpibawi in rel zo ing. Cungnungber Bawipa ing.

⁵⁸ Aicankul ngai Babylon ai vingpui tu, laipua vumah min tuh sio i. A sang ngai kotkate tu, mai in kang tuh sio i. Miphunte ai naperhnak tu zaikhai ilo i; Amahte rimsuhnak hmuahhmuah, mai ai kang tuhhnak ian i. Cungnungber Bawipa Kaimah in rel zo ing,” ti i.

Jeremiah Thucahhnak Tu Babylon Ah Kuat I

⁵⁹ Kumpibawi Zedekiah a bawmtu pakhat tu Seraiah i. Seraiah tu Neriah ai fapa, Mahsaiah ai fasuan i. Zedekiah tu Judah kumpibawi a ṭuan kum lihnak ah Babylon ah feh ai a hnenah Seraiah khai feh ve i. Ciafangin Seraiah hnenah thucah i.

⁶⁰ Babylon vumah ituseh, Babylon caah thu dangdang ituseh, laibu songah ngan ing. Siatsuahhnak a hleng tuhhnak hmuahhmuah ngan sio ing.

⁶¹ Cen Seraiah hnenah, “Babylon na hleng fangin he laihnahzual songai i nganhnak hmuahhmuah heh misenpui hnenah siar tu tengteng law.

⁶² Cen Bawipa hnenah, ‘Aw Bawipa, he hmun heh siatsuah in kumzangza in ramkhing ah cang tuhai a nungmi thil, minung ituseh, ramsa ituseh, um tuh lo i, tiin rel zo isi,’ tiin sawngen tu.

⁶³ Cen Seraiah, he laibu heh misenpui hnenah na siar ben fangin nangmah rori in lungto thawn pencih tulai Euphrates Runpui songah lon tu.

⁶⁴ Na lon fangin, ‘Hetih bangin Babylon vumah khim tuh i. Ti songah phum tuhai suak leh tuh nawn lo i. Cungnungber Bawipa in siatsuahhnak tu Babylon vumah hlengruai tuh i,’ tiin ti tu,” ti ing. Jeremiah ai ponkam tu he hmuah i.