Jeremiah 50 - Zanniat Bible

Babylon Lang Tuh I

¹ Bawipa in Babylon khuapui le a minungte thu ahhetihin rel i:

² “Miphun zongzong hnenah he thu rel tulai than tu zianzo law. Thantar bawn tulai thusap tu; Dapthen in umpui mah. Babylon tlu zo i; A khuavang Marduk tu khoi zo sek i! Babylon ai milimte tu a vut in rial zo i.

³ “Sak lam in miphun phunkhat Babylon tawng tuhin kawi zo ai Babylon tu ramkhing ah cangruai zo i. Minung le sumhnamte tlan tuh sio ai minung aisu khai um tuh lo i,” ti i.

Israel Lethnak Tuh

⁴ Bawipa in, “Ciami can a hleng fangin Israel le Judah mite kawi tuhai Kaimah, amahte Pathian heh kap kongin i si tuh i.

⁵ Zion fehhnak lampui zawt tuhai ciami lampui in kawi tuh i. Kumzangza hrangah thukhamhnak kaimah thawn bawn tuhai zaikom inkhai bal tuh nawn lo i.

⁶ “I minungte heh tuukhaltute in tlangsang hampalak ah a pairuaihnak tuu bang i. A paimi tuu bangin mual pakhat hnua pakhat vakvai ai amahte inn rin ling nawn lo i.

⁷ A hmutu hmuahhmuah in tawng ai rek i. Amahte ralte in, “Amahte simhnak tlimniu le a pupate ai umlamhnak amahte Bawipa hnenah sual manin hebang thil kin bawnhnak heh kin sual lo i,’ ti i.

⁸ “Aw Israel mite, Babylon an tlan tu ih. Hemi ram heh hlum tu ih! A tlan hmasabertu cang tu ih!

⁹ Sak lam ai a ummi miphunte sopaw tuhai Babylon tawngruai tuh ing. Hemi ram tawng tuhin suak tuhai neh tuh ngaingai i. Sakap thiam ngai pawl i ai conkiang in hmuisung fangin khelh awng lo mite i.

¹⁰ Babylon tu sim tuhai a simtute in amahte daihhnak hmuahhmuah sut tuh sio i. Kaimah Bawipa in rel zo ing,” tiin ti i.

Babylon Tluhnak Tuh

¹¹ Bawipa in, “Aw Babylon mite, i miphun sim i si. Ciafangin lungawi aipuang in um i si. Fang rialtu kawlpawcang bangin le a vak kongin a aitu siphuh cang bangin vak i si.

¹² Ikhalselai ningmah khua, khuapui thawmlian khiah zakthi le mualpho in um tuh i. Babylon heh miphun hmuahhmuah lakah a ṭawnṭai ber ah cang tuh i. Ramcar le ti um lo hmun nelrawn ah cang tuh i.

¹³ I thinrawhnak manin Babylon ah minung aisu khai um tuh lo i. Khuarop ah cang tuhai a hiangai a vaktu hmuahhmuah mangbang le khuaruahhar in um tuh i.

¹⁴ “Conkiang saithiam pawl, Babylon tawng tuhin ralring tu ilai kulh tu sio ih. Ning conkiang thawn Babylon khiah sai tu ih. Zaimantifangin Bawipa kaimah vumah sual i.

¹⁵ Babylon khuapui cingkim in raltawng audan in au tu ih. Babylon sung zo i! Khua kulhhnak vingpui tu bal ai min sio zo i. Babylon mite vumah phuzul ing. Amahte vumah ning phuzul tu ilai midang a bawn awng bangin anite vumah bawn tu ve ih.

¹⁶ Hemi ram songah hlaici cing thil maseh; rongkhawm tikhai um maseh. Ramdangmi a um awngtute in Babylon a tawngtu ralkapte kih tuhai amahte khua le ramah let tuh i,” tiin ti i.

Israel Lethnak Tuh

¹⁷ Bawipa in, “Israel mite tu chintit ai hnawhhnak le piakruaihnak tuu bang i. Hmasa ah Assyria Kumpimangbawi in nem ai hnuata ah Babylon kumpibawi Nebuchadnezzar in amahte ruh hmuah khiah tumtawng in kial sah sek i.

¹⁸ Ciamanin kaimah Cungnungber Bawipa, Israel ai Pathian in Assyria Kumpimangbawi i cawh awng bangin kumpibawi Nebuchadnezzar le a ram khiah cawh tuh ing.

¹⁹ Israel mite tu amahte ramah tlungruai tuh ing. Karmel Mual le Bahan ramai pohnak rongte ai tuhai Epharaim ram le Gilead ramte an suakhnak rong tu amahte duhzah in ai tlang tuh i.

²⁰ Ciami can a hleng fangin Israel ramah sualhnak um tuh lo ai Judah ramah thilpha lo um tuh lo i. Zaimantifangin amahte nun i zuahhnak mite tu amahte sualhnak ngaithiam tuh sio ing. Kaimah Bawipa in rel zo ing,” ti i.

Babylon Vumah Pathian Ai Thukhanhnak

²¹ Bawipa in, “Merathaim mite le Pekod mite tawng tu ih. Rek tu ilai siatsuah tu sio ih. I thupehnak bangin bawn tu ih. Kaimah Bawipa in rel zo ing.

²² Hemi ramah raltawnghnak thawm thang ai siatsuahhnak a roh ngai in um i.

²³ Sobul bang Babylon an laivum pumpuhluk heh parh sek in seu i. Ikhalselai ciami sobul tu ek zo sek i! Hemi ram vumai a hlenghnak thil hmu fangin mi zongzong mangbang tlang i.

²⁴ Aw Babylon, kaimah i tawng isi. Ikhalselai na lin loin thangtoh ai ciami thang in na awk i.

²⁵ I ralthuam dahhnak inn hong ai i thinraw in i ralthuam khiah suah ing. Zaimantifangin a thawmlianber Cungnungber kaimah Bawipa in Babylon ah thil bawn tuh nai ing.

²⁶ Nuamhmuncang in tawng tu ilai rong a dahhnak innte tu bal sah tusek ih. Ning suthnak tepawl tu rong bangin pum in khawl tu bial ih. Amahte ram tu hnawm sah tusek ih.

²⁷ Ralkap hmuahhmuah rek tu ih. Rek tusek ih. Babylon mite a bo ihang. Cawhhnak a tuarhnak can hleng zo i,” tiin ti i.

²⁸ Babylon an raltlan a luattute Jerusalem ah hleng tlang ai, Bawipa ai Biakinn vumah thil a bawn sual awnghnak manin Babylon mite vumah Bawipa kin Pathian in zaibang phuzul i, ti khiah rel i.

²⁹ “Babylon tawng tuhin conkiang saithiam pawl rel tu ih. Li le thal a hmang thiamtu hmuahhmuah feh tu sio ih. Babylon khuapui khiah kulh tu ilai aisu khai luat maseh. Thil a bawnhnak bangin rulthun tu ih. Midang vumah a bawn awng bangin a vumah bawn thun tu ve ih; zaimantifangin Israel mite ai a Thianghlim Kaimah vumah hngal ngai in naper i.

³⁰ Ciamanin a tlangvalte khuapui lampui ah rekhnak tuar tuhai a ralkapte hmuahhmuah cia nia ah siatsuah tuh sek i. Kaimah Bawipa in rel zo ing.

³¹ “Babylon hngalhnak in na dim i; ciamanin Cungnungber Hmualnaiber Bawipa kaimah in na ral ing! kaimah ai cawhhnak can hleng zo ihang.

³² A puar ngai na ram tu sawn tuhai tlu tuh i; aisu inkhai na tho sah tuh lo i. Na khuate tu mai in tai tuhai a cingkim ai thil hmuahhmuah hnawmral tuh sio i,” ti i.

³³ Hmualnaiber Bawipa in, “Israel mite le Judah mite tu zohsuamhnak tuar i. Pom ai pakhat khai hlat loin kil liang i.

³⁴ Ikhalselai anite luangsuahtu tuh tu a hat ngai i; a hming tu Hmualnaiber Bawipa i. Amah rori in a thu khiah dingpui tuhai laipua vumah daphnak hlengruai tuh i. Ikhalselai Babylon mite hnenah tu hnaihnokhnak hlengruai tuh ing,” ti i.

³⁵ Bawipa in, “Babylon ah ralvang hleng i; Thihhnak tu a minungte, a miuktu le a mifimte vumah hleng i!

³⁶ Ralvang tu thudon reltu, a prophette vumah hleng i. Zaitluk mivoite i, Thihhnak tu a ralkapte vumah hleng i; zaitlukin tihikkul i.

³⁷ A siphuh le siphuhlengte siatsuah tu ih. A zawngfawmmi ralkapte vumah thihhnak hleng i; A ṭawnṭai zia khiah! A sumsaw le a hlawnthil siatsuah tu sio ih; Sut tu ilai rok tusek ih!

³⁸ A laipua le runtite khai car tu sio seh. Babylon tu a kihkul milimte umhnak ram i; A minungte lungmolhruai zo sek i.

³⁹ “Ciamanin Babylon tu khuavang le ramhuai le vaniu cianghlim lote ai umhnak ramah cang tuh i. Minung um tuh nawn lo i. Zaibang san ahkhai um tuh awng lo i.

⁴⁰ Sodom le Gomorrah kaimah in siatsuah ai a hiangai khuate i hnawmruai sio bangin Babylon vum ahkhai hleng tuh i. Cia hnuaah minung aisu khai um tuh nawn lo i. Kaimah Bawipa in rel zo ing.

⁴¹ “Sak lam ai amahte umhnak ram an minungte kawi i; A hla ngai le ram hat ngai hmun an. Raltawng tuhin kumpibawi tampui pai tlang cialep i.

⁴² Amahte li le thal le ralvangte vawh tlang i; Mi ninghio nai lo le mithinsia pawl i. Tifingriat khuahu thawm bang i, A siphuhte to fangin khiah! Raltawng tuhin ralring i, Babylon tawng tuhin!

⁴³ Babylon kumpibawi tu a kut zong sio i; Ciami thu a za fangin! Donharhnak le thinharhnak in dim i, Nau nai dawn nupang naukai ur bangin.

⁴⁴ “Jordan Run varkam tupui songin suak in sumhnam lailenghnak lenpal ai a suaktu chintit bangin Bawipa kaimah kawi tuhai mangrinlo in Babylon mite tu amahte khuapui an tlanruai tuh sio ing. Cen hotu tuhin i rilmi in amahte ram tu uk tuh i. Kaimah thawn santeh tuh aisu um i? Kaimah i zuam ngamtu aisu um i? I tawngcai ngamtu uktu aisu um i?

⁴⁵ Ciamanin Babylon khuapui siatsuah tuh i tumhnak le amahte minungte zaitlukin siatsuah tuh tum ing ti khiah ngai tu ih! Amahte fate khai duk tuh sek ai mi zongzong tihik tuh i.

⁴⁶ Babylon a tlu fangin a thawm cawm tuh ze ai laivum pumpuhluk hlin tuh sio i. Amahte thinlauhnak aw tu a dang miphunte in za tuh sio i,” tiin ti i.