Jeremiah 5 - Zanniat Bible

Jerusalem sualhnak

¹ Aw Jerusalem mite, Ning khuasong lampui dunghlun ah dawp tu betbo ilai, Khua dang tang in sik tu ih. Dawr bawnhnak hmunte tianin si tu ih! Dikcanglairelhnak a situ le thil dik a bawntu, Mi pakhat tal tawk nitur i sim? Hmu le i sikhaw Jerusalem tu Bawipa in ngaithiam tuh i.

² Bawipa ai hming sal in thukham dun napui ning ponghnak bangin tu tum lo i si.

³ Bawipa ai sihnak tu thudik i. Ning vit napui zai nam lo i si. Ning fon dek napui zaikhai hlun ning nuam cuang lo i. Milungruh i si ai ning sualhnak in let ning nuam cuang lo i.

⁴ Cen i thinlung in, “Hemite tu mifarah le mi lungmolh, thu ling lote i! Amahte Pathian ai dan ling tlang lo i, A daihhnak khai bawn ben tlang lo i.

⁵ Thunaitu upa hnenah feh tuhai thu rel tuh ing; Anite tu Pathian dan ling ai, a Bawipa ai dikcanghnak khai ling hlen i,” tiin ruat ing. Ikhalselai amahte veksen in Bawipa ai thunaihnak tu el tlang ai a thupehnak tu hlun nuam tlang lo i.

⁶ Ciamanin tupui songah chintit in dawp tuh i; Nelrawn ai mehleng in hlikhlai tuh dekdo i. Tlavangte khai amahte khua songah vak tuh dekdo i. Sumpua ah a suak fangin sahrang in hlikhlai tuh dekdo i. Zaimantifangin amahte sualhnak tam ze ai, tun le tunin Pathian zam de i.

⁷ Bawipa in, “Zaimanin na minungte ai sualhnak tu ngaithiam tuh ing? Kaimah hnenin tlan ai Pathian ngaingai a ilomi khuavangte bia zel i. Rong kham ngai in cawm ing; Ikhalselai kangkawm sualhnak bawn ai, Amahte can heh hlotlaute hnenah hmang i.

⁸ Anite tu phatak ngai ai cawmhnak siphuh cang hur bang i; A innhnen pa ai nupui sualpui tuh lek hiam i.

⁹ Hebang thilsual a bawn manin, cawh tuh lo ing maw? Hemi bang miphun vumah heh aisu in phuzul loin um thil tuh i?

¹⁰ I minungte ai cabit kuang sat tuhin a ralte hlat tuh ing. Ikhalselai a bo sek hlanlo siatsuah tuh sek lo i. A kakte sat tuhin rel tuh ing, Zaimantifangin a kakte tu kaimah ai ilo i.

¹¹ Judah mi le Israel mite in i engsan zo i; Kaimah Bawipa in rel zo ing,” ti i.

Bawipa In Israel Hnawl I

¹² Bawipa tu a minungte in zaikhai siar lo ai, “Zaikhai bawn tuh lo ngawn i; bawngsia khai tawk tuh lo ising; Raltawng le rian tlung khai tuar tuh lo ising,” ti tlang i.

^13-14 Cen, “Prophette tu zaikhai ilo i, hlivua bang ian i; Bawipa hnenin a hlenghnak thurel tuh zaikhai nai lo i,” tiin ti i. Cungnungber Bawipa Pathian in, “Jeremiah, i minungte in hebang ai pong manin a ka songai i dahhnak i thu khiah mai bangin cangruai tuh ing. Hemi minungte tu zanthing bang i tuhai mai in kang tuh sek i,” ti i.

¹⁵ Aw Israel mite, ram hlapui an miphun phunkhat ningmah tawng tuhin Bawipa in koih i. Miphun hlun le miphun hat ngai i ai amahte pon ning ling lohnak le amahte anka ning cing lohnak mite i.

¹⁶ A conkiang ralkapte tu mihat bikbik i ai ninghiohnak nai loin mi rek de i.

¹⁷ Ning lo rong ituseh, ning inn rong ituseh, ai tuh sio ai ning fanu le ning fapate khai rek tuh sek i. Ning tuurual le ning kawlpawrualte khai rek tuh sek ai ning cabit kuang le ning thaihmin kungte khai vawng tuh sek i.

¹⁸ Bawipa in, “Ciabang tian a hleng inkhai i minungte tu siatsuah tuh sek lo ing.

¹⁹ Hemi bangin zaimanin i vumah thil bawn i si? tiin zawt fangin, Jeremiah phatak niu in rel tu: Kaimah i zam ai amahte ram songah heh miphun dang ai khuavang bia ai ruaih manin amahte ram lo ah, miphun dang ruaihtu ah cang tuh i,” ti i.

Pathian In A Minungte Ralringruai I

²⁰ Bawipa in Jeremiah hnenah, “Jacob ai tesinfate le Judah mite hetihin rel tu.

²¹ Phantakniu in ngai tu ih, ningmah mivoi le mitawte, mit nai napui zaikhai hmu thil lomi, bil nai napui zaikhai za thil lomi,

²² Kai tu Bawipa ing. Zaimanin i kihzah tlang lo i si? Zaimanin i hmaiah hlawng derdo lo i si? Tifingriat cingkim ah siatnawi a dahtu, ti in zaikom inkhai kan thil tuh loin a dahtu ing. Tilep heh suk le so ah sep tuh i. Ikhalselai a kamai siatnawi pualam ah lan thil lo i. Tilep khai tho tuh i, ikhalselai pah thil tuh awng lo i.

²³ Ikhalselai ning tu thinlung ruh le engsanhnak thinlung ian nai i si, i zangtak ai i zam tlang zo i si.

²⁴ Fur ruah le khal ruah siruai ai kumsiar rongkhawm can ning pe napui upathnak pe tuhin rin i ruat awng lo i si.

²⁵ Ning sualhnak in ning caah thilpha tuh khai heh tisual sek i.

²⁶ “I minung lakah hrokhrawl mite um i. Mi in vaniu awk tuhin thangtoh ai a bawh bangin anite in minung awk tuhin thang thawn mi bawh i. Mi awk tuhin thangtoh i.

²⁷ Sazul pa in a inn ah vaniu a dimruai bangin misualte in amahte inn songah mi rokhnak thilri in dimruai i. Ciaman milian le thunai ngai in a canghnak khiah!

²⁸ Ciamanin nainung le rong kham in um ai a thauhnak khiah! Amahte thilsual bawnhnak tu bo nia nai lo i. Nu le pa nai lo ngakṭah farah hnenah amahte covo pe awng lo i; nauneh mite vumah dikcanglairelhnak thawn nung awng lo i.

²⁹ “Ikhalselai hebang thil bawn tlang manin kaimah Bawipa in cawh tuh ing. Hemi miphun vumah phuzul tuh ing.

³⁰ Hemi ramah mangbang kihkul le tihikkul thil bawn i:

³¹ Prophette in thudonrel i; prophette ai thupehnak bangin suangbawite in mi uk ai i minung aisu inkhai el lo i. A tawphnak can a hleng fangin akontih in um leh tuh i?” tiin ti i.