Jeremiah 49 - Zanniat Bible

Ammon Vumah Bawipa Thukhanhnak

¹ Amon ramai thuah Bawipa in hetihin i rel i, “Israel mite a konteng ah i? Amahte ram humtu aisu khai um lo im? Zaimanin Gad ram tu Molech khuavang a biatute langruai ai khurruai i?

² Ikhalselai Rabbah khuapui ai a umtute in raltawnghnak thawmvang za can hlengruai tuhai amahte khuapui hnawmral tuhai khuatenaute ziam rori in tai tuh sio i. Ciafangin amahte sutciahnak ram tu Israel mite in sut leh tuh i.

³ Aw Heshbon mite, kap in rung tu ih! Ai khua tu bo zo i! Aw Rabbah nupangte, kap in rung tu ih! Buri hnikpon sil tu ilai mithi ngai in um tu ih! Vakvai in suk le so ah dawp tu ih! Ning khuavang Molech tu a suangbawite le a bawite thawn ralpom mi sal ah cang tuh i.

⁴ Ningmah rinsantlak lote, zaimanin tluangkhawng dekdo i si? Ning hathnak bo zo i. Zaimanin ning hathnak ring in aisu inkhai kin tawng ngam tuh lo i, tiin ti i si?

⁵ Ning cingkim in tihikkul suakruai tuh ing. Ning veksen in tlan tuh sio i si. Aisu khai luat nuam in tlan tlang tuhai ning ralkapte a kokhawmtu aisu khai um tuh lo i si.

⁶ “Ikhalselai hnuata lamah Ammon ram tu nainung in cangruai leh tuh i. Kaimah Bawipa in rel zo ing,” tiin ti i.

Edom Vumah Bawipa Thukhanhnak

⁷ Cungnungber Bawipa in Edom thu ahhetihin rel i: Edom mite tu thudik ruat ben nawn lo im? Amahte in thuruah ngenhnak mite in ziang bawn tuh rel ben lo im? Amahte fimhnak hmuahhmuah bo zo sio im?

⁸ Aw Dedan mite, her tu ilai tlan tu ih, relh tu ih! Esau ai tesinfate hnawmcan tuh ing, zaimantifangin anite i cawhhnak can hleng zo i.

⁹ Mi in cabit thai a loih fangin a kuang vumah tlawmniu tal val i; rukote in zan ah mi a rok fangin a daihhnak thil ian lang i.

¹⁰ Ikhalselai Esau ai tesinfate tu kawngkolh in dah ing; amahte relhhmun inkhai phorh ai relh thil nawn lo i. Edom mite hmuahhmuah pairal sio zo i. Mi pakhat khai tang nawn lo i.

¹¹ Nu le pa nai lo ngakṭahte kaimah hnenah hlum tu ih, kilkhawl tuh ing. Ning hmaitongte inkhai i ring thil tuh i.

¹² “Cawhhnak a tuar tuh lo pawl inrin cawhhnak khuat ding lekhaw cawh loin luat tuhin ruat dun i sim? Ihlah! Ciami khuat tu ding tuh tengteng i si!

¹³ Kaimah rori in Bozrah khuapui heh mi hmuh rori ah tihikkul le ramkhing ah cang tuh i. Khuatenau hmuahhmuah kumzangza in hnawmral tuh i. Kaimah Bawipa in rel zo ing,” ti i.

¹⁴ Kaimah in, “Aw Edom, Bawipa hnenin thu ngah ing. Miphunte in a ralkapte nangmah tawng tuhin ralring tuhin palai hlat zo i.

¹⁵ Bawipa in ning ṭawnṭairuai tuhai aisu inkhai ning upat tuh lo i.

¹⁶ Na hngalhnak heh na zawltu i. I kih ngawn i na tihnak bangin aisu inkhai na kih lo i. Lungkhukua sangpui le tlang sangpui phundir ah um i si; muvanlai tlukin hmunsang ah na um inrin Bawipa in na duk tuh teu i. Bawipa in rel zo i,” ti ing.

¹⁷ Bawipa in, “Edom vumah a hleng tuh siatsuahhnak tu roh tuh ze ai a hiangai a vaktu hmuahhmuah multing tuhai kih tuh i.

¹⁸ Sodom le Gomorrah vumah le a hiangai khuate vumah a hlenghnak thil kihkul heh Edom vumah hlengruai tuh ing. Cia hmunah minung aisu khai um leh tuh nawn lo i. Kaimah Bawipa in rel zo ing.

¹⁹ Jordan Run varkam ah tupui songin suak in sumhnam lailenghnak lenpal ah a suaktu chintit bangin kaimah hleng tuhai mangrinlo in Edom mite tu amahte ram an tlanruai tuh ing. Cen hotu i rilmi in ram tu uk tuh i. Kaimah thawn ṭhim tuh aisu um i? Kaimah i zuam ngamtu aisu um i? I tawngcai ngamtu uktu aisu um i?

²⁰ Ciamanin Edom mite siatsuah tuh i tumhnak le Teman khuasong mite zaitlukin siatsuah tum ing ti khiah ngai tu ih! A fate khai duk tuh sek ai mi zongzong tihik tuh i.

²¹ Edom a tlu fangin tu a thawm cawm tuh ze ai laivum pumpuhluk khai hlin tuh sio i. Thinlauhnak authawm tu Agaba tikel tianin thang tuh i.

²² Mupui in ar a dawp bangin Bozrah tu ral in nem tuh i. Cia nia ah Edom ralkapte tu nau nai dawn nupang bangin thinlau in um tuh i,” tiin ti i.

Damascus Vumah Bawipa Thukhanhnak

²³ Bawipa in Damascus thu ah hetihin rel i: “Thusia za manin Hamath le Arpad khuasong mite tu donhar le thincawl in um i. Thinharhnak in tipui bangin khuk ai cawlumhnak ngah thil lo i.

²⁴ Damascus khua mite tu ṭawnṭai ngaingai ai thinlau in tlan i. Nau nai dawn nupang bangin mangbang vansang le harsa in um i.

²⁵ Khua nuam ngai le khua hmingthang ngai tu zam siohnak khua ah cang i.

²⁶ Cia nia ah a tlangvalte tu khua song lampui ah rekhnak tuar tuhai a ralkapte tu hnawmral tuh sio i.

²⁷ Damascus kulhhnak vingpuite tu mai in tai tuhai kumpibawi Benhadad innte tu a ziam tian mai in tai tuh sio ing. Kaimah Cungnungber Bawipa in rel zo ing,” tiin ti i.

Kedar Hin Le Hazor Khua Vumah Thukhanhnak

²⁸ Babylon kumpibawi Nebuchadnezzar ai nehhnak Kedar hin le Hazor ai ukhnak pengte thu ah Bawipa in hetihin rel i: “Kedar mite khiah tawng tu ilai nisuah lam hin khiah siatsuah tu ih!

²⁹ Amahte ponhlam le tuurualte, ponhlam ponzarte le ponhlam songai umhnak thilri hmuahhmuah sut tu sio ih. Amahte kalauk fehpui tu ilai misenpui hnenah, ‘Ning hiangai khuahacang ah thinlauhnak um i,’ ti tu ih.

³⁰ “Hazor mite, kaimah Bawipa in ralringhnak ning pe ing: Tlan tu ilai relh tu ih. Babylon kumpibawi Nebuchadnezzar in ning engsan in hetihin pong i:

³¹ “Kawi tu ih, kin him i tiin a ruattute tawng tuh ising. Amahte khuapui tu kotka nai lo i; tawh kalh ai khamhnak khai nai lo ai aisu inkhai kilkhawl lo i,’ ti i.

³² “Amahte Kalauk le kawlpawte lang tu ih! Sam comniu in a mettute tu nuamhmuncang ah piakruai tuhai nuamhmuncang in anite hnenah hnawmralhnak hlengruai tuh ing.

³³ Hazor tu kumzangza in hmunkhing ah bawn tuhai mehleng lek umhnak ah cang tuh i. Cia hmunah aisu khai um tuh nawn lo i. Kaimah Bawipa in rel zo ing,” ti i.

Elam Vumah Bawipa Thukhanhnak

³⁴ Zedekiah tu Judah kumpibawi a cang sawng fangin Elam ram thu ah Cungnungber Bawipa in i hnenah rel i:

³⁵ “Elam ram a hatruaitu conkiang saithiam pawl tu rek tuh berh ing.

³⁶ Nuamhmuncang in Elam vumah khuahu zuangruai tuhai nuamhmuncang ah minungte tu piakruai tuh ing. A minung raltlan mite a hleng lohnak ram pakhat khai um tuh lo i.

³⁷ Amahte rek a tumtu a ralte khiah lau tuhai Elam mi thinlung ah kihhnak thinlung umruai tuh ing. I thinraw in Elam mite tu siatsuah tuhai amahte ci i hmitruai lai hlanlo anite tawngtu tuhin ralkapte hlat tuh ing.

³⁸ Amahte kumpibawite le hotute pairalruai tuhai amahte tohnak hmunah i kumpibawi tohkham dah tuh ing.

³⁹ Ikhalselai hnuata lamah Elam mite tu mi nainung cangruai leh tuh ing. Kaimah Bawipa in rel zo ing,” tiin ti i.