Jeremiah 48 - Zanniat Bible

Moab Ram Hnawm Tuhhnak

¹ Cungnungber Bawipa, Israel ai Pathian in Moab ram thu ah hetihin i rel i: “Nebo khuate tu a ninghio kul i! A khuapui hnawmral zo i! Kiriathaim khua tu lang zo i; A vingpui bal zo sio i; Mite tu mualpho in um i.

² Moab ram songlawihnak bo zo i; Ralte in Heshbon khua lang zo i; Moab miphun siatsuah tuh sio in ngaisung i. Madmen khua tu khing tuh ruahro i. Ralkapte in cil tuh dekdo i.

³ Horonaim mite tu, ‘Siatsuahhnak, Thisan luanghnak,’ tiin au i!

⁴ “Moab tu hnawm zo i; Naupang kaphnak awthawm tu ngai tu ih!

⁵ Anite aihnak thawmvang khiah ngai tu ih, Lampui tluan in sak lamah Luhith tian thang i. Lungsia thinpemhnak awthawm khiah ngai tu ih, Hlang lamah Horonaim tian thang i.

⁶ “Rang ngai in ning luathnak tuhin tlan tu ih. Nelrawn ai laak lau ngai bangin tlan tu ih,’ ti i.

⁷ “Aw Moab, na hathnak le na lianhnak rinsan isi; Ikhalselai tun tu mi nehhnak na cang tuh ihang. Na khuavang Khemosh tu saltanghnak hmunah feh tuh ve i. A bawite le suangbawite thawn.

⁸ Khua pakhat khai hnawmral loin luat tuh lo i. Phairawn le zawllai tianin hnawm tuh sio i. Kaimah Bawipa in rel zo ing.

⁹ Moab caah lungphum bir tu ih, A rai hlanah hnawm tuh sio ihang. A khuapuite tu khuarop ah cang tuh sio i. Aisu khai um leh tuh nawn lo i.”

¹⁰ Bawipa ai naper ah a dauzaltu heh cukcamhnak tuar tuseh! Mi a sat lotu le a rek lotu heh cukcamhnak tuar tuseh!

Moab Khuate Siatsuahhnak

¹¹ Bawipa in, “Moab tu him ngai le dap ngai in um ngio i. Ral pomhnak tuar awng lo i. Moab tu bel pakhat in a dang pakhat ah thleng betbohnak cabitti bang cang awng lo i. Aisu inkhai phorh lohnak a cangce bangin dahhnak cabitti bang i. A rim hnawm awng lo ai a ur ngio cabitti bang i.

¹² “Ikhalselai tun tu mi hlat tuhai Moab tu a bung sekhnak cabitti bangin a bung sekhnak can hleng tuh i. A cabitti bung tuh sek ai a bel tu vut sek in seu tuh sio i.

¹³ Cen Israel mite in a rinsanhnak amahte khuavang Bethel tu a khim lo le zakthipui tlak in a ling bangin Moab mite inkhai amahte khuavang Khemosh heh a khim lo le zakthipui tlak in ling tuh i.

¹⁴ “Moab mite, zaimanin miralpha le raltawng thiam i ing tiin puarthau i si?

¹⁵ Moab le a khuate tu siatsuahhnak tuar tuh sio i; Amahte tlangval pha ber pawl khai rek berh i. Kai tu kumpibawi ing. Cungnungber Bawipa ing. Kaimah in rel zo ing.

¹⁶ Moab ramai bawngsiahnak nia nong zo i, A hnawmral nia hleng cing tuh i.

¹⁷ “Hemi miphun caah kap tu ih, A hiangai umtute, A hmingthanghnak a lingtute khai kap tu ih. ‘A thawmlian a mi ukhnak bo zo i, A songlawihnak le a hathnak um nawn lo i,’ ti tu ih.

¹⁸ Ningmah Dibon khua mite, Ning songlawihnak hmun an tolh tu ilai laivut lakah to tu ih. Moab siatsuahtu hleng zo i. A bawhkulhte hnawmborh pumhnak ah cang zo i.

¹⁹ Ningmah Aroer khua ah a umtute, Lampui hiangah ding in iang tu ih; Amahte khua a hlumtute heh zawt tu ih; Zaibang thil hleng i ti zawt tu ih.

²⁰ ‘Moab tu tlu zo i,’ tiin ning rel tuh i; ‘Amah caah kap tu ih, mualpho in um zo i; Moab tu hnawm zo sio i, Arnon Runpui tluanah than tu ih,’ ning ti tuh i.

²¹ “Tlang vumai a umtute vumah thukhan nia hleng zo i. Ciamite tu Holon, Jahzah, Mephaah,

²² Dibon, Nebo, Beth Diblathaim,

²³ Kiriathaim, Bethgamul, Bethmeon,

²⁴ Kerioth le Bozrah khuate i. A hla ituseh, a nong ituseh, Moab ramai khua hmuahhmuah vumah thukhanhnak hleng tuh i.

²⁵ Moab ai a ki tu sathnak tuar sio ihang; A hat ngai a ban khai tat sek zo i. Kaimah Bawipa in rel zo ing.

Moab Tu Zakthi In Um Tuh I

²⁶ Bawipa in, “Moab khiah riruai tu ih, zaimantifangin kaimah tawngcaitu i. Moab tu amah ai awk lakah tal in leu tuhai mi in hnihsan tuh i.

²⁷ Aw, Moab, hnihsahnak menma in Israel na hmang awnghnak khiah hih aw lai sim? Ruko pom ai hnawmcan bangin Israel hnawmcan awng khiah!

²⁸ Moab ramai a umtute, ning khuate hlum tu ih! Feh tu ilai khukua lakah um tu ih. Khukua hiangah bu a satu khurote bangin um tu ih.

²⁹ Moab tu a hngal ze i. A minungte a hngaldan, a puardan le thinlianhnak le zai bangin ruat dun i ti ling sio ing.

³⁰ Bawipa kaimah rori in a hngalhnak ling sio ing. A puarthauhnak tu zaikhai ilo i; a thil bawnhnak khai a rai awk tuh lo i.

³¹ Ciamanin Moab ram song mi zongzong le Kir Heres mite caah i mithli far tuh i.

³² Jazer mite ca tahin ur deuh in Sibmah mite caah kap tuh ing. Aw Sibmah khua, Tipui Thi le Jazer tian a hlenghnak cabit kuang bang isi. Ikhalselai tun tu khal can ai na thai le na thai tuhhnak hmuahhmuah khai hnawm zo sek i.

³³ Lungawihnak le thinnuamhnak tu Moab rampha songin lang sah tuh sio i. Cabit rialhnak hmun an cabitti luang tuh nawn loin phit sio ing. Cabit bawntu le lungawi in a autu um nawn lo i.

³⁴ Heshbon le Elealeh khua mite kap ai, amahte kaphnak aw tu Jahaz tian thang i. Zoar khua mite inkhai za tlang ai, Horonaim le Eglath Shelishiyah khuate tian thang i. Nimrim Runpui rin kang zo sio i.

³⁵ Moab mite tu khuavang biahnak hmunah maitai hibawlhnak sel thil loin le a khuavangte hnenah aphnak pe thil loin kham tuh ing. Kaimah Bawipa in rel zo ing.

³⁶ Ciamanin titilu tum kongin mithi phumhnak lasatu bangin Moab le Kir Heres mite caah i thinlung mithli far i, zaimantifangin a naihnak hmuahhmuah bo zo sio i.

³⁷ A veksen in amahte sam le khahmul met tlang i. A veksen in amahte ban sat ai buri hnikpon sil sio i.

³⁸ Moab ram songai inn vum hmuahhmuah ah le khuacang ai khua hnarpua ah mithi ngaihnak in dim i, zaimantifangin Moab tu aisu inkhai daih lohnak bel keh hnawmtam bangin khoi zo sio i.

³⁹ Moab tu hnawmcan zo sio i! Kap in au tu ih! Moab mualpho in um zo i. Hnawmborh pumhmun ah cang zo i. A hiangai miphunte in hnihsahnak menma in hmang i. Kaimah Bawipa in rel zo ing.

Moab Caah Luathnak Um Lo I

⁴⁰ Bawipa in hetihin rel cia i: Moab tu miphun phunkhat in mupui bangin a ko pharh in nem tuhai,

⁴¹ Khuate ituseh, bawhkulhte ituseh, lang tuh sio i. Ciami nia ahcen Moab ralkapte in nau nai dawn nupang bangin thinlau in um tuh i.

⁴² Kaimah vumah hngal ngai in um manin Moab tu siatsuah tuh sek ai miphun phunkhat cang tuh nawn lo i.

⁴³ Moab tu tihikhnak, khur thuk puipui le mi awktu thang in bawn i. Ciami tu Bawipa ai ponghnak i.

⁴⁴ Tihikhnak in a tlan tumtu heh khur songah tlok tuh i. Khur thuk songin suak ai a tlantute tu thang in awk tuh i. Zaimantifangin Bawipa in Moab siatsuah tuhin ni thiah zo i.

⁴⁵ Bawmtu nai lo raltlan mite le kumpibawi Sihon in a uk awnghnak Heshbon khuasong ah himhnak si tlang i. Ikhalselai mai in ciami khua tu kang sio i. Raltawng hiam ngai Moab mite ai ram le tlang sang puipui tu kang sio i.

⁴⁶ Moab mite tu ninghio kul i! Khemosh khuasia a biatute tu hnawmralhnak tawk ai a fanu le fapate tu ral pom thawngtohhnak ah cang zo sek i.

⁴⁷ Ikhalselai hmai lam tikcucan ahcen Bawipa in Moab khiah nainung ngai ah bawn leh tuh i. Hemi tu Bawipa ai ponghnak i ai Moab vumah khim tuh i.