Jeremiah 39 - Zanniat Bible

Jerusalem Lang I

¹ Zedekiah in Judah kumpibawi a cang awng kum kua kum, hla hra hla ah Babylon kumpibawi Nebuchadnezzar tu a ralkapte veksen thawn kawi tlang ai Jerusalem tawng i.

² Zedekiah in kumpibawi a cang awng kum hlaikhat kum, hla li hla, ni kua nia ah khua kulhhnak vingpui khiah bal ben i.

³ Jerusalem khuapui a lang fangin Babylon kumpibawi kuthnia ai tlangsuak upa hmuahhmuah kawi ai Kotka Lai tihnak ah to tlang i. Ciamite tu Nergal Sarezer, Samar Nebo, Sarsekhim le a dang Nergal Sarezer i.

⁴ Ciami khiah kumpibawi Zedekiah le a ralkapte in hmu fangin khuapui songin zan ah tlan tum i. Kumpibawi vuan song lampui in suak ai khuapui kulhhnak vingpui thuah hnih a pehtu kotka lampui in feh ai Jordan phairawn lampui in tlan tlang i.

⁵ Ikhalselai Babylon ralkapte in hnawh ai Zedekiah tu Jericho khua hiang zawllai ah pom i. Cen kumpibawi Nebuchadnezzar hnenah fehpui i. Nebuchadnezzar tu Hamath peng song Riblah khua ah um ai ciata ah Zedekiah ai thu khiah rel i.

⁶ Riblah khua ah Zedekiah ai fapate khiah a pa mithmuh ah Nebuchadnezzar in rek i; Judah ramsong bawi upate khai rek berh i.

⁷ Cia hnuaah Zedekiah mit phorh ai Babylon ah fehpui tuhin thir cikcin in khit i.

⁸ Ciatihin a bawn laitak ah Babylon ralkap dangte in kumpibawi inn le misenpui innte mai in tai ai Jerusalem khua kulhhnak vingpui khai bal sek i.

⁹ Hnuataber ah a ralkapte hotu ralbawi Nebuzaradan in Jerusalem khuapui songai a tang laitute le amah hnenai a tlantute khiah sal ah tang tuhin Babylon ah fehpui sio i.

¹⁰ Judah ramah farah ber pawl, thilri le loram zaikhai a nai lotute ṭan ai cabit vuan le lote pe i.

Jeremiah Suah I

¹¹ Cen kumpibawi Nebuchadnezzar in ralkap hotu ralbawi Nebuzaradan hnenah thupe ai,

¹² Jeremiah si tuhin feh tulai phatak niu in kilkhawl tu. Ziang harsahnak khai pe tuh lo isi. A daihhnak hmuahhmuah bawn sah tu,” tiin ti i.

¹³ Ciamanin Nebuzaradan in bawi dang Nebushazban le Nergal Sarezer le a dang bawi upa dangdangte kawi sio ai,

¹⁴ Kumpibawi inn kiltute umhnak inn ai dahhnak in i suah i. Kaimah humhim tuhin ṭuanvo a pehnak Ahikam ai fapa le Shaphan ai fasuan Gedaliah ai kuthnia ah i dah i. Ciatihin i miphunte lakah um ing.

Ebedmelech Ca Umlamhnak

¹⁵ Kumpibawi inn kiltute umhnak inn ah i dah laiah Hmualnaiber Bawipa, Israel ai Pathian in,

¹⁶ “Sudan mi Ebedmelech hnenah rel tu, ‘Bawn tuh ing i tihnak bangin he khuapui hnenah khangsohnak ilo in siatsuahhnak hlengruai tuh ing. Ciami can a hleng fangin a hmutu i tuh ve isi.

¹⁷ Ikhalselai kaimah Bawipa in nang tu na hup tuhai na kih mite hnenah pehnak tuar tuh lo isi.

¹⁸ Na humhim tuhai aisu inkhai na rek tuh lo i. Kaimah i rinsan zo manin na nunhnak tu him tuhai na luat tuh i. Kaimah Bawipa in rel zo ing,” ti ta tu,” tiin ti i.