Jeremiah 38 - Zanniat Bible

Tikhur Songah Jeremiah Hla I

¹ Mattan ai fapa Shephatiah, Pashhur ai fapa Gedaliah, Shelemiah ai fapa Jehukal le malchiah ai fapa Pashhur in misenpui hnenah,

² Bawipa ai ponkam i relhnak, “Hemi khuapui songai a tang mite tu ral kut in, ihlahle rong lo in, ihlahle urhnak in ning thi tuh i. Ikhalselai Babylon mite hnenah feh ai pum a petute tu rekhnak tuar tlang tuh lo i; amahte nunhnak tal tu zuah tuh i,” tiin i tihnak khiah za tlang i.

³ Cialek zolo in Bawipa ai a relhnak, “Hemi khuapui tu Babylon ralkapte kut ah pe tuhai lang tuh i,” a tihnak khai misenpui hnenah rel ing.

⁴ Ciami tlangsuak bawi upate tu kumpibawi hnenah feh ai, “Hemi pa tu rekhnak tuar kul i. Hetihin a ponghnak manin khuasong ralkapte tha nau tlang ai khuasong mi zongzong ca ahkhai thanauhnak cang sio i. Mipui bawm tum loin amahte ca ai harsahnak sawn daih i,” tiin ti i.

⁵ Ciafangin kumpibawi Zedekiah in, “Ciatih ilekhaw ning nuamhnak bangin bawn tu ih, ning kham thil lo ing,” tiin ti i.

⁶ Ciamanin i fehpui ai kumpibawi inn kiltute inn lakai a umtu kumpibawi ai fapa malchiah ai namkum songah rihual in i hla i. Namkum songah ti um lo i; nawngbek ian um ai ciami nawngbek songah i pil cuahco i.

⁷ Ikhalselai kumpibawi inn ai napertu Sudan mi tilretmi pa Ebedmelech in tikhur songah i hla khiah ling i. Cialai ah kumpibawi tu Benjamin Kotka tihnak ah thu a rel laitak i.

⁸ Ciata ah Ebedmelech khai feh ai kumpibawi hnenah,

⁹ “Aw kumpibawi pa, na kuthnia ai tlangsuakte ai a bawnhnak heh thil sual i. Jeremiah khiah namkum songah hla tlang ai ciata ah rong loin thi tuh tengteng i; zaimantifangin he khuapui songah rong um lo ihang,” tiin ti i.

¹⁰ Kumpibawi in Ebedmelech hnenah, “Nangmah le midangte pathum feh tu ilai Jeremiah khiah namkum songin a thi hlanah duk tu ih,” tiin thupe i.

¹¹ Ebedmelech tu midangte pathum thawn kumpibawi thilri dahhnak khan ah feh ai ponher le hnikpon hlun lang ai rihual i hlak i.

¹² Rihual in i ban ur tuh loin i ban hnia i zak ah ponher dan tuhin i rel i. Amahte relhnak bangin bawn ing.

¹³ Cen tikhur songin i duk tlang i. Cia hnuaah tu inn kiltute inn ah i dah i.

Zedekiah In Jeremiah Thuron I

¹⁴ Vaikhat ah kumpibawi Zedekiah in Biakinn ai a lut hmun kotka pathumhnak in i ko ai i hnenah, “Thu pakhat na zawt tuhai thudik i rel tuhin i daih i,” tiin i ti i.

¹⁵ Kaimah in, “Thudik na rel lengkhaw i rek tuh isi; ruathnak na pe lengkhaw zaikhai siar tuh cuang lo isi,” tiin ti ing.

¹⁶ Ciamanin kumpibawi Zedekiah in a thupniu in cukcam in thu i kham ai, “A nungmi Pathian hming sal in thu na kham ing; na rek tuh hrimhrim lo ing; na rek a nuamtute kut songah khai na pe tuh lo ing,” tiin i ti i.

¹⁷ Cen Cungnungber Bawipa, Israel ai Pathian ponghnak tu Zedekiah hnenah hetihin rel ing; “Babylon kumpibawi kuthnia tlangsuakte hnenah pe dun lesikhaw na nunhnak tu na zuah tuhai he khuapui heh a ziam tianin tai tuh lo i. Nangmah le na innsangte tu ning him tuh i.

¹⁸ Ikhalselai pe dun hlahle sikhaw he khuapui heh Babylon kut ah pehnak tuar tuhai a ziam tianin tai tuhai nang khai na luat tuh lo i,” tiin ti ing.

¹⁹ Ikhalselai kumpibawi in, “Babylon mite hnenah a tlantu kin ram song minungte i lau i. Amahte kut songah i hlen lekhaw i reem tlang tuh rori i,” ti i.

²⁰ Ciafangin kaimah in, “Amahte kut songah pehnak tuar tuh lo isi. Bawipa ai ponkam sawn heh phatak niu in ngai tu tiin na ngen ing. Ngai lesikhaw zaizongza pha tuh i, na nunhnak khai na zuah tuh i.

²¹ Ikhalselai anite hnenah pe dun na nuam hlah lekhaw ziang cang tuh i ti khiah Bawipa in larhnak i hmuruai zo i.

²² Ciami larhnak ahcen Judah kumpibawi inn ai a tanghnak nupang hmuahhmuah heh Babylon kumpibawi kuthnia ai tlangsuakte hnenah hoi tuh sio khiah hmu ing. Amahte vak kongin ponghnak khiah ngai tucuk: “Kumpibawi tu a rualpui pha pawl in hoisual zo i. A vumah thu nai ze i. Tun tu a ke heh nawngbek songah phum zo i. A rualpuite in hlum berh i, ti tlang i,” tiin rel ing.

²³ Ciahlaiah, “Na nupuite le na fate hmuahhmuah heh Babylon mite hnenah fehpui tuh sio ai nangmah khai anite kut songin na luat tuh lo i. Babylon kumpibawi in thawng ah na hla tuhai he khuapui heh a ziam tianin tai tuh i,” tiin ti ing.

²⁴ Ciafangin Zedekiah in, “Hetih ai thu kin ruahdunhnak heh aisu khai lingruai malaw. Ciatihin na nunhnak khai lau tuh um tuh lo i.

²⁵ Nangmah thawn thu kin ruat kawmhnak heh bawite in za lekhaw na hnenah kawi tuhai thu kin relhnak heh na zawt tuh i. Rel sio lesikhaw na rek tuh lo i ing, tiin na tiam tuh i.

²⁶ Thawng songah i kuat leh in i thi siang hram malaw, tiin ngen ing,’ ti tu menma law,” tiin i ti i.

²⁷ Tlangsuakte khai kawi tlang ai thu i zawt ngaingai i. Ikhalselai kumpibawi ai i tiamhnak bang cekci in rel ing. Anite in zaikhai bawnthilhnak dang nai cuang lo i. Zaimantifangin kumpibawi thawn thu kin ruahdunhnak khiah a lingtu aisu khai um lo i.

²⁸ Kumpibawi inn kiltute inn ah i dah ai Jerusalem a lang nia tianin ciata ah i dah i.