Jeremiah 36 - Zanniat Bible

Baruch In Biakinn Ah Laihnahzual Siar I

¹ Josiah ai fapa Jehoiakim Judah kumpibawi a cang kum lihnak ah Bawipa in i hnenah,

² “Laihnahzual lang tulai Israel le Judah le miphun hmuahhmuah ai thula i relhnak heh a veksen in ngan tu sio law. Josiah kumpibawi a cang awng laiah na hnenah a hmasaber i ponghnak in tunnia tian i relhnak hmuahhmuah ngan tu sio law.

³ Judah mite vumah siatsuahhnak hlengruai i tumhnak heh za ai amahte nuncan thleng thil pang selai! Ciatihin anite sualhnak le phat lohnak pawl ngaithiam tuh napui ing!” tiin ti i.

⁴ Ciamanin Neriah ai fapa Baruch khiah ko ai Bawipa in kaimah hnenah a ponghnak hmuahhmuah ngan tuhin auh ing. Baruch in laihnahzual songah khum sio i.

⁵ Cen kaimah in Baruch hnenah, “Kai tu Biakinn songah feh thilhnak thu ngah nawn lo ing.

⁶ Ciamanin nangmah feh tuhin na daih ing: hmai lam rong na ul sal can fangin feh tu. Hemi laihnahzual khiah cawm ngai in siar tulai ciatihin Bawipa in kaimah hnenah pong ai kaimah in na auhhnak hmuahhmuah heh misenpui in za tuh sio i. Mi zongzong le amahte khua ṭen in a kawitu Judah mite inkhai a za thai sio hmun an siar tu.

⁷ Bawipa hnenah sawngen tlang ai amahte nuncan pha lohnak hlumhnak ahkhai cang thai pang i. Zaimantifangin he minungte vumah Bawipa in a kihkul a thinrawhnak le a thintokhnak hlengruai tum i,” tiin ti ing.

⁸ Neriah ai fapa Baruch in i relhnak bang rori in Biakinn songah Bawipa ai ponkam khiah siar i.

⁹ Jehoiakim Judah kumpibawi a canghnak kum ngahnak hla kua hla ah Bawipa ai mithmai pha co nuam in mite tu rong ul tlang leh i! Jerusalem khua songah a umtu le Judah ramsong khuapui an a kawitu hmuahhmuah in rong ul tlang i.

¹⁰ Cen mi zongzong in thu a ngai tlang laitak ah i relhnak tu laihnahzual songai bangin amahte veksen in Baruch in siar sio i. Ciatihin Biakinn songah siar ai ciami khan ai sungṭuan Shaphan ai fapa Gemariah ai khan in siar i. A khan tu vumta khan Biakinn ai Kotka Thar tihnak hiangah i.

Bawite Hmaiah Baruch In Siar I

¹¹ Baruch in Bawipa ai ponkam laihnahzual a siarhnak khiah Shaphan fasuan Gemariah ai fapa Mikaiah in za i.

¹² Cen Mikaiah tu kumpibawi inn, sungṭuan ai khan ah bawite a taikhawm lakah feh i. Sungṭuan Elishama, Shemiah ai fapa Delaiah, Akbor ai fapa Elnathan, Shaphan ai fapa Gemariah, Hananiah ai fapa Zedekiah le bawi dangdang khai um i.

¹³ Baruch in misenpui hnenah a siarhnak thu khiah Mikaiah in a za bangin anite hnenah rel i.

¹⁴ Ciafangin bawite in Jehudi hlat i. Jehudi tu Nethaniah ai fapa i; Nethaniah tu Shelemiah ai fapa i; Shelemiah tu Kushi ai fapa i. Hlat tlang ai misenpui hnenah a siarhnak laihnahzual koih tuhin Baruch rel tuhin ruai i. Baruch in laihnahzual khiah koih i.

¹⁵ Bawite in, “To tulai laihnahzual heh siar tu,” ti i. Anite tihnak bangin Baruch in siar i.

¹⁶ A siar ben fangin pakhat le pakhat thinlau in sik dun tlang ai, “Kumpibawi rel kul tuh ising,” tiin Baruch heh ti i.

¹⁷ Cen Baruch khiah, “Kin rel tucuk! Akontih in he hmuahhmuah ngan ben i si? Jeremiah in na auh im? tiin zawt i.

¹⁸ Baruch in, “Jeremiah in ponkam fangkhat khai pelh loin i auh ai he laihnahzual vumah laiti thawn ngan ing,” tiin ti i.

¹⁹ Ciafangin anite in, “Nang le Jeremiah tu relh kawm ning kul tuh i. Ning relhhmun khiah aisu khai rel mah ih,” ti tlang i.

Kumpibawi In Laihnahzual Mai In Tai I

²⁰ Bawite in laihnahzual tu sungṭuan Elishama khan ah dah ta ai kumpibawi khan ah feh in kumpibawi hnenah ciami thu khiah amahte veksen in rel sio i.

²¹ Cen kumpibawi in laihnahzual lang tuhin Jehudi hlat i. Jehudi in Elishama khan in lang ai kumpibawi le a hiangai a dingtute hnenah ciami laihnahzual khiah siar i.

²² Hla kua hla, khuasik cu i ai kumpibawi pa tu a khuasik cu inn ah maibel ai a semhnak mai aai in to i.

²³ Jehudi in siar ai laihmai hmai thum hmai li a siar ben fangin kumpibawi in vangniu in at ai mai songah, maibel songah tai i. Laihnahzual a veksen in a bo hlanlo mai songah tai betbo i.

²⁴ Ikhalselai kumpibawi ituseh, a kuthnia tlangsuakte ituseh, laihnahzual songai thula tu ling tlang sio napui lau hal tlang lo i, lungsia khai thiam tlang lo i.

²⁵ Elnathan, Delaiah le Gemariah in laihnahzual mai in tai tuh loin kumpibawi rel thliahthlo napui zaikhai siar lo i.

²⁶ Cen kumpibawi in kaimah le i sungṭuan Baruch pom tuhin thupe i. A ruaihnak mite tu kumpibawi ai fapa Jerahmeel, Azriel ai fapa Seraiah le Abdeel ai fapa Shelemiah i. Ikhalselai Bawipa in i thup i.

Jeremiah In Lai Dang Ngan I

²⁷ Kumpibawi Jehoiakim in Baruch i auhhnak laihnahzual heh mai in a tai sek hnuaah Bawipa in,

²⁸ Laihnahzual dang lakin hmasa laihnahzual songai a umhnak hmuahhmuah ngan leh tuhin i ruai i.

²⁹ Bawipa in kumpibawi hnenah hetihin rel tuhin i ruai i: “Laihnahzual tai zo isi; cen Jeremiah tu he ramah Babylon kumpibawi kawi tuhai he ram le he ram song minungte le sumhnamte siatsuah tuh i, tiin zaimanin ngan isi? tiin zawt zo isi

³⁰ Ciamanin kaimah Bawipa in tunah nang kumpibawi Jehoiakim na rel ing: David ukhnak ram heh na tesinfa aisu inkhai uk tuh awng lo i. Na luang tu khuapua ah lon tuhai sun ah nisa in em tuhai zan ah nai in tlak tuh i.

³¹ Ning veksen in ning bawnhnak sualhnak manin ningmah le ning tesinfate le na kuthnia tlangsuakte ning cawh tuh ing. Nangmah ituseh, Jerusalem mi le Judah mite ituseh, i ralringruaihnak zaikhai ning siar lo manin hlengruai tuh ing, tiin i rel cia hnawmralhnak ning veksen vumah hlengruai tuh ing,” tiin ti i.

³² Cen laihnahzual dang pakhat lang ai i laingantu Baruch hnenah pe ai i auhhnak hmuahhmuah ngan sio i. A hmasa laihnahzual songai a umhnak hmuahhmuah le a bang dun thu dang i auhhnak tepawl heh ngan sio i.