Jeremiah 34 - Zanniat Bible

Zedekiah Hnenah Thucahhnak

¹ Babylon kumpibawi Nebuchadnezzar, a ralkapte le a kuthnia ai a umtu miphun hmuahhmuah ai ralkapte in Jerusalem le a hiangai khuate a tawng laitak ah Bawipa ai thu tu i hnenah hleng i.

² Bawipa, Israel ai Pathian in Judah kumpibawi Zedekiah hnenah feh in hetihin rel tuhin i ruai i, “Kaimah Bawipa in he khua tu Babylon kumpibawi kut ah pe tuhai ani in a ziam tian mai in tai tuh i.

³ Na luat tuh lo i; na pom tuhai Babylon kumpibawi kut ah pehnak tuar tuh isi. Hmaiton in amahte khiah hmu tuhai pon dun tuh isi; cen Babylon ah feh tuh isi.

⁴ Zedekiah, na hnenah i ponghnak heh ngai tu! Raltawnghnak ahcen na thi tuh lo i.

⁵ Dapniu in na thi tuh i; na hlanah kumpibawi a cangtu na pu le na pate thi ai a phum fangin rimhmui a tai bangin nangmah ca ahkhai rimhmui tai tuh i. Na kah tlang tuhai, ‘Kin kumpibawi thi e,’ ti tlang tuh i. Kaimah Bawipa in rel zo ing,” tiin ti i.

⁶ Ciami thu tu Babylon kumpibawi ralkapte in,

⁷ Jerusalem khua a tawng lakah kumpibawi Zedekiah rel ing. Babylon ralkapte in Lakhish le Azekah khuate khai tawng dekdo i; he khuate pahnih tu a tangsun Judah kulhhnak Judah khuapuite i.

Salte Zawl Tlang I

⁸ Kumpibawi Zedekiah le Jerusalem mite in aisu inkhai kinmah ai miphun Israel mite lala heh sal tuhin zua nawn hlah sing ih;

⁹ Hebrew salte tu nupang ituseh, pasal ituseh luat tu sio seh, tiin lungkhimhnak bawn i.

¹⁰ Mipui le a hotute amahte veksen in lungkhim ai salte hlat sio ai sal tuhin pom leh tuh nawn loin lungkhim sio i. Amahte lungkhimhnak bangin hlat sio i.

¹¹ Ikhalselai amahte thin thleng in pom sio ai sal tuhin bawn lala i.

¹² Ciafangin Bawipa,

¹³ Israel ai Pathian ponkam tu misenpui hnenah rel tuhin i hnenah hleng i; “Egypt ram saltanghnak in ning pupate o ai i luatruai awng fangin anite thawn thukhamhnak bawn i ing.

¹⁴ Hebrew sal in kumruk song na ruaihtu a um fangin a kum sarihhnak ahcen luatruai tuh i si, tiin rel ing. Ikhalselai ning pupate in i thu ngai awng lo i, i relhnak khai ngai tlang awng lo i.

¹⁵ Tunbai ah ning thinlung thleng ai i lungawiruaitu thil bawn tlang i si. Ning veksen in ning phunpui Israel salte khiah hlat tuh sio in lung ning khim ai, kaimah i bia hmun Biakinn songah kaimah mithmuh ah thukhamhnak bawn tlang i si.

¹⁶ Ikhalselai ning thin thleng lala ai kaimah thangsiahnak thil bawn lala i si. Ning veksen in ning daihhnak bangin ning hlatciahnak salte tu pom ai sal tuhin bawn lala i si.

¹⁷ Ciamanin kaimah Bawipa in i thu hlun lo i si, tiin ning ti ing. Ning phunpui Israel mite tu luatruai lo i si. Pha i, ning khai luathnak ning pe tuh ing: Raltawng le rian tlung le urhnak a phunphun in thithaihnak ning pe tuh ing. Ning vumai i bawnhnak in laipua vumai minung hmuahhmuah tihik thai in bawn tuh ing.

^18-19 Judah ram le Jerusalem khuasong bawite, kumpibawi inn ai bawite, suangbawite le hotu hmuahhmuah in kawlpawcang lu khat ro ai a tlamhmat in khan le ciami kawlpaw pum tlam hnih karlak in vak in kaimah thawn thutiamhnak bawn i. Ikhalselai ciami thutiamhnak tu bal ai hlun tuh tihnak khai hlun lo i. Ciamanin kawlpawcang vumah kin bawn bangin hemite vumah bawn tuh ve ing.

²⁰ Anite a rek hiamtu ralte hnenah pe tuhai amahte luang tu vaniu le ramsate in ai tuh i.

²¹ Judah kumpibawi Zedekiah le a kuthnia ai tlangsuakte khai anite rek nuamtute hnenah pe tuh ing. Nangmah tawng loin a comtu Babylon ralkapte ai kut ah pe tuh ing.

²² Ciami ralkapte hnenah thupe tuhai he khuapui ah let tuh i. Tawng tuh i, neh tuhai mai in tai tuh i. Judah khuate tu aisu khai um lohnak nelrawn bangin bawn tuh ing. Kaimah Bawipa in rel zo ing,” tiin ti i.