Jeremiah 33 - Zanniat Bible

Umlamhnak Thukham A dang

¹ Kumpibawi inn kiltute khan songah thawng i toh laiah Bawipa ai thu tu a vel hnihhnak kaimah hnenah hleng i.

² Lailung a semtu, a bawntu le a umhnak hmunai a tungdingtu Bawipa in i hnenah rel i. A hming ah Bawipa tihnak in,

³ “I ko tulai na awi tuh ing. Na ling lohnak thil khuaruahhar le ngaihsunurkul na rel tuh ing.

⁴ Bawipa kaimah, Israel ai Pathian in Jerusalem innte le Judah ram kumpibawi inn tu ral in kulh ai tawng dekdo manin min tuh sio i tiin rel ing.

⁵ Mihrek in Babylon mite tu tawng tuh ve i; ikhalselai ani in i thinrawhnak le i thintokhnak in i siatsuah tumhnak mite ai luang thawn innte khiah dimruai tuh ing. Hemite in thilsual bawn manin he khuapui tu zangtak zo ing.

⁶ Ikhalselai he khuapui le a minungte tu cakruai leh tuhai phawkruai tuh virver ing. Anite hnenah hlamuanghnak le daphnak a semkhim in hlengruai tuh ing

⁷ Judah le Israel tu khangsoruai tuhai a hlan bangin dingruai leh tuh ing.

⁸ Anite sualhnak le kaimah vumai anite sualhnakte tu somciang tuhai amahte sualhnak le ralthohnak khiah ngaithiam tuh ing.

⁹ Jerusalem tu kaimah caah anghnak, hmaihngalhnak le zartohnak a hampui i tuh i. Jerusalem mite caah thilpha i bawnhnak le he khuapui hrangah khangsohnak i hlengruaihnak tu laivum miphunte in ling tlang fangin lau tuhai hlawng tlang tuh i,” tiin ti i.

¹⁰ Bawipa in, “Mi in he hmun heh nelrawn ram bang i, mihing ituseh, ramsa ituseh um lo i tiin ti i. I, dik i. Judah khuate le Jerusalem khuasong lampuite tu khing riprep ngaingai i. Minung le ramsa zaikhai um lo i. Ikhalselai he hmunah,

¹¹ lungawi aipuang thawm le mocang puai ai authawm tu za leh tuh i si. Mite in kaimah Biakinn ah anghnak hibawl sel tuhin la sa kongin a kawihnak thawm za tuh i si. Anite in, ‘Cungnungber Bawipa hnenah anghnak pe tu ih, Zaimantifangin ani tu pha i; a ithnak tu kumzangza in kho i,’ ti tuh i. Hemi ram tu a hlan bangin khangsoruai tuh ing. Kaimah Bawipa in rel zo ing,” tiin ti i.

¹² Cungnungber Bawipa in, “Hemi ram nelrawn thawn a bangdunhnak le minung le ramsa a um lohnak ram heh sumhnam lenghnak ram cang leh tuhai ciata ah tuukhalte in amahte tuu khal tuh i.

¹³ Tlang vum ramai khuate, tlangham ram le Judah ram hlang lamah, Benjamin ram song le Jerusalem hiang khua cik niuniu ah le Judah ram khuate ah tuukhalte in amahte tu siar leh tuh dekdo i. Kaimah Bawipa in rel zo ing,” tiin ti i.

¹⁴ Bawipa in, “Israel le Judah mite hnenah i thukham i khimruaihnak can hleng tuh i.

¹⁵ Ciafangin amahte kumpibawi tuhin David ai tesinfa mifel pakhat ril tuh ing. Ciami kumpibawi in he ram songah thildik le thilpha bawn tuh i.

¹⁶ Judah mi le Jerusalem mite tu o tuhai lungmuang in um tuh i. Hemi khuapui tu, “Bawipa kin nunohnak,” ti i tuh i.

¹⁷ Israel kumpibawi tu David ai tesinfa i tuh ngio ai,

¹⁸ I na ruaihtu le maitai hibawlhnak seltu le sangvut le hibawlhnak dangdang seltu tuhin Levi phun songin suangbawi i tuh ngio i, tiin kaimah Bawipa in thukham ing,” ti i.

¹⁹ Bawipa in i hnenah,

²⁰ “Sun le zan tu amah tikcucan niu ah um tuh ngio in anite thawn thukhamhnak bawn zo ing. Ciami thukhamhnak tu bal thil tuh nawn lo i.

²¹ Ciabang thotho in a tesinfate in kumpibawi cang tuh ngio in i sal pa David thawn thukhamhnak bawn ai kaimah na ruaihtu i tuh ngio in Levi phun suangbawite thawn thukhamhnak bawn zo ing; he thukhamhnak tu bal thil tuh nawn lo i.

²² I sal pa David ai tesinfate le Levi phun suangbawite tu karhzairuai tuh diamdo ai, van ai arsi le tifingriat kamai runsiat a siar cawk lo bangin siar cawk tuh ve lo i,” tiin ti i.

²³ Bawipa in i hnenah,

²⁴ “Hemite in i rilciahnak innsangte pahnih Judah le Israel heh hnawl zo i, tiin rel hnelhno heh za aw sim? Cen i minung Israel le Judah mite tu nautat ai miphun ah rin siar nawn lo i.

²⁵ Ikhalselai kaimah Bawipa in sun le zan thawn thutiamhnak bawn ai lai le van ai umdan uktu tuhin dante khai bawn ing.

²⁶ Hemi thilte a bawntu ing ai Jacob ai tesinfate le i na ruaihtu David thawn i bawnhnak thutiamhnak khiah khoruai tuh ing. Abraham, Isaac le Jacob ai tesinfate uktu ah David ai tesinfa pakhatkhat ril tuh ing. I minungte vumah ninghiohnak nai tuhai mi nainung cangruai leh tuh ing,” tiin ti i.