Jeremiah 28 - Zanniat Bible

Jeremiah Le Prophet Hananiah

¹ Ciami kum, Zedekiah kumpibawi a cang kum lihnak, hla nga hla ah Gibeon khuami Azzur ai fapa prophet Hananiah in Biakinnpui songah thu i rel i. Suangbawite le misenpui za thai in,

² Cungnungber Bawipa, Israel Pathian ai ponkam tu hetihin i rel i: “Babylon kumpibawi ai hathnak huham hnawmcan zo berh ing.

³ Kum hnih songah kumpibawi Nebuchadnezzar in Babylon ah a thiarhnak sio Biakinn thilri bungbelte tu letpui tuh sio ing.

⁴ Babylon ah sal tuhin pomhnak Judah kumpibawi, Jehoiakim ai fapa Jehoiachin tu Judah mite thawn hmunkhat ah letpui tuh ing. I, Babylon kumpibawi ai hathnak tu siatsuah tuh sek ing. Kaimah Bawipa in rel zo ing,” tiin ti i.

⁵ Ciafangin suangbawite le Biakinn songai a dingtu misenpui za thai in Hananiah hnenah,

⁶ “I rori i; Bawipa in ciatihin bawn tu hram seh! Sal tuhin pomhnak mi zongzong le amahte thiarhnak sio Biakinn thilrite tu na relhnak bangin khim ngaingai selai he ramah letpui sio selai i daih ze i!

⁷ Ikhalselai na hnenah le misenpui hnenah i ponghnak heh ngai tucuk!

⁸ Hmasa prophette, nang le kai hlanai thu a reltu prophette tu miphun tampui vumah le a thawmlian kumpibawi ukhnak vumah raltawnghnak, rian tlung le urhnak hleng tuh i, tiin rel awng i.

⁹ Ikhalselai daphnak le remhnak um tuh i, tiin a reltu prophet tu a thurelhnak a khim ngaingai fang ian in Bawipa ai hlathnak prophet i, tiin ti tuh i,” tiin ti ing.

¹⁰ Cen Hananiah in i hawng ai bathnak hak heh lang ai a ekruai sek hnuaah,

¹¹ misenpui za thai in, “Kumpibawi Nebuchadnezzar in miphun lianpui hawng vumah a bathnak tu he bangin ekruai tuh ing, tiin Bawipa in ti i. Kum hnih songah bawn tuh i,” ti i. Cen hlum teu ing!

¹² Cia hnuaah Bawipa in kaimah hnenah,

¹³ Hananiah hnenah feh ai hetihin rel tuhin i ruai i: “Bawipa in thing ai bawnhnak hak tu ekruai ben thai pang isi; ikhalselai ciami tumrul in thir hak bawn tuh ing.

¹⁴ Cungnungber Bawipa, Israel ai Pathian in he miphunte vumah thir hak bat tuhai Babylon kumpibawi Nebuchadnezzar ai na ruaih tuh i. Kaimah Bawipa in hampalak ramsa tianin Nebuchadnezzar na ruaihtu ah bawn tuh ing, ti i,” tiin rel ing.

¹⁵ Ciatihin Hananiah rel ai hetihin bet fawn ing, “Ngai tu, Hananiah! Nang tu Bawipa ai hlathnak ilo si. Hemite in thudon sang tuhin forh hnelhno isi!

¹⁶ Bawipa in nangmah heh hnawmcan tuhin Bawipa amah rori in rel zo i. Bawipa ralcai tuhin misenpui hnenah na ponghnak manin tun kum a bo hlanah na thi tuh i,” tiin ti ing.

¹⁷ Hananiah tu ciami kum hla sarih hla ah thi ngaingai i.