Jeremiah 27 - Zanniat Bible

Jeremiah In Kawlpaw Hak Awr I

¹ Josiah ai fapa Zedekiah tu Judah kumpibawi a cang sawng fangin Bawipa ai ponkam kaimah hnenah hleng ai,

² saphaw le thing rolh in kawlpaw hak bawn ai i hawng ah awr tuhin i ruai i.

³ Bawipa in Jerusalem ah kumpibawi Zedekiah tawk tuhin a kawitu palaite Edom ram, Moab ram, Tyre le Sidon ram an ram palai a kawitute hnenin amahte ram kumpibawi hnen ṭen ah thucah tuhin i ruai i.

⁴ Amahte kumpibawi ṭen rel tuhin Cungnungber Bawipa Israel ai Pathian in hetihin thu i pe i:

⁵ “A thawmlian i huham le i hathnak in laivum pumpuhluk le minung le laivum ai a nungmi ramsa hmuahhmuah heh semsuah ing; ciamite tu i pe nuammi hnenah pe ing.

⁶ Kaimah cengfa Babylon kumpibawi Nebuchadnezzar kuthnia ah miphun hmuahhmuah a dahtu heh kaimah ing; hampalak ramsa rin amah na ruaihtu ah dah ing.

⁷ Miphun hmuahhmuah in amah tu na ruaih tlang tuhai a fapa le a fasuante tianin, a miphun a ṭumsuk can a khim hlan tian, na ruaih tuh ngio i. Cia hnuaah a miphun in a dang miphunte le a hatmi kumpibawite na ruaih leh tuh ve i.

⁸ “Ikhalselai ram ram khatkhat ituseh, ukhnak pakhatkhat ituseh, a ukhnak hniaah um nuam hlah lekhaw ciami miphun tu raltawnghnak le rian tlung le urhnak in cawh tuhai a tawphnak ah a hnawmruai siotu tuhin Nebuchadnezzar heh thupe tuh ing.

⁹ Ning prophette ituseh, aisu bang khai ituseh, hmai lam thil a cang tuhhnak rel thai ing a titu heh sang mah ih. Mang in ituseh, mithi rauhla ko in ituseh, kut rin sik in ituseh, ling ing a titu heh sang mah ih. Amahte veksen in Babylon kumpibawi kut songah pe dun tuh loin ning rel i.

¹⁰ Ning zawl i; ning ram an lamhlapui ah ning thawn ruai tuhin a ṭangtu heh anite i tuh i. Ning hnawt tuh sio ai siatsuahhnak tuar tuh i si.

¹¹ Ikhalselai miphun pakhatkhat in Babylon kumpibawi kut songah pe dun ai ruaih lekhaw amah ai ram songah umruai tuh ing; amah ai ramah um tuhai amah ai loram khiah vai tuh i. Kaimah Bawipa in rel zo ing,” ti i.

¹² Ciabang thotho in Judah kumpibawi Zedekiah hnen ahkhai rel ing: “Babylon kumpibawi kuthnia ah um tu. Amah le a minungte ruaih tulai na nung tuh i.

¹³ Zaimanin nangmah le na minungte tu raltawnghnak le rong loin le urhnak in ning thi tuh im? Babylon kumpibawi kuthnia ai a um lotute raltawnghnak le rian tlung le urhnak in ning thi tuh i, tiin Bawipa in rel zo i.

¹⁴ Babylon kumpibawi kuthnia ah um tuh loin ning reltu prophette ai thu heh sang mah.

¹⁵ Hemi prophette tu, i hlathnak ilo ai kaimah hming in mi zawltu ian i, tiin amah Bawipa rori in rel zo i. Ciamanin ning hnawt tuh sio ai nangmah ituseh, he thudonreltu prophette ituseh, rekhnak tuar tuh i si,” ti ing.

¹⁶ Cen suangbawite le misenpui hnenah Bawipa ai ponka tu hetihin rel ing: “Babylon an Biakinn thilri bungbelte hleng cing tuh i a titu prophette tu sang mah ih. Ning zawl i.

¹⁷ Amahte thu ngai mah ih. Babylon kumpibawi kuthnia ah um tlang tu ilai ning nung tuh i. Hemi khuapui tu zaimanin khuarop ah cangruai ning nuam hnelhno heh i?

¹⁸ Prophet ngaingai i ai Cungnungber Bawipa kaimah ai thu anite hnenah um ngaingai lekhaw Biakinn songah a um laihnak thilri le kumpibawi inn ai a umhnak sumsawte tu Babylon ah thiar tuh sio loin kaimah hnenah i ngen tuseh,” ti i.

^19-20 Kumpibawi Nebuchadnezzar in Babylon ah Judah kumpibawi, Jehoiakim ai fapa Jehoiachin le Judah ram upate a fehpui fangin Biakinn khuamte, dar tikuang le a tohnak lengte, le Biakinn thilri hrekkhatte tu hlum awng i.

²¹ “Cungnungber Bawipa, Israel ai Pathian kaimah in Biakinn song le Jerusalem kumpibawi inn ai a tang laihnak thilri thu i relhnak heh ngai tu ih:

²² Babylon ah thiar tuh sio ai kaimah in tawk zo hang ti hlanlo ciami Babylon khua ah um tuh i. Cia hnuaah kaimah in letpui tuhai he hmunah dah leh tuh ing. Kaimah Bawipa in rel zo ing,” tiin ti i.