Jeremiah 23 - Zanniat Bible

Hmai lam Umlamhnak

¹ Bawipa ai thukhanhnak tu a minungte a siatsuahtu le a piakruaitu tuukhalte vumah zaitlukin kihkul tuh i?

² A minung phatak niu in a kilkhawltu tuhin dahhnak tuukhalte hnenah Bawipa, Israel ai Pathian in hetihin ti i, “I minungte phatak niu in kilkhawl lo i si; piakruai ai hnawt sek i si. Hemi thilsual ning bawn manin ning cawh tuh ing.

³ A tangsun i minungte tu i piakruaihnak ram an ko khawm tuhai amahte khua le amahte ramah letruai tuh ing. Fate tampui nai tlang tuhai pungzai tuh i.

⁴ Ciahlaiah amah kilkhawltu tuhin tuukhalte dah tuh ing. I minungte tu anite in khal tuhai thinlau le thincawl in um tuh nawn lo ai cawh tuh nawn lo ing. Kaimah Bawipa in rel zo ing,” ti i.

⁵ Cen Bawipa in, “David ai tesinfate songin a felmi pakhat kumpibawi ai a rilhnak can hleng tuh i. Ciami kumpibawi in fimhnak thawn he ram heh uk tuhai a dikcang le a dikmi lek bawn tuh i.

⁶ Kumpibawi a cang fangin Judah mite tu himniu in um tuhai Israel mite tu lungmuang in daphnak thawn um tuh i. Ani tu ‘Bawipa kin nunohnak’ tiin ko tuh i.

⁷ “Can hleng tuhai ‘Egypt ram an Israel a hoitu a nungmi Pathian hming in,’ tiin cukcam dun tuh nawn lo i.

⁸ Cia caah sak lam ram le a minung a piak siohnak ramte an Israel mite a hoi lehtu a nungmi Pathian hming in,’ tiin cukcam tuh sawn i. Ciatihin amahte ram songah um tlang tuh i,” ti i.

Prophette Hnenah Jeremiah Ai Thucah

⁹ I thinlung khoi sio i, Tha nai loin i hlin derdo i; Bawipa manin, a thu thianghlim manin i. Zuri bang ing, cabit tam ze a dingtu bang ing.

¹⁰ Hemi ram tu rintlak lo minung in dim i; Bawipa hmaiah hlotlau ciang i. Amahte nuncan pha lo ai thunaihnak hmang sual i. Bawipa in cuk a cam manin he ram tu mithi ngai in um i; Hampa hing hmuahhmuah khai ro sio i.

¹¹ Bawipa in, “Prophette le suangbawite tu Pathian ling lo i. Biakinnpui song rori ah thilsual amahte bawn pom zo ing.

¹² Amahte hlunhnak lampui tu nal tuhai thim tuh i; Bahruai tuhai tluruai tuh ing. Amahte vumah hnawmcanhnak hlengruai tuh ing. Amahte cawhhnak can hleng tuh i. Kaimah Bawipa in rel zo ing.

¹³ Samaria ai prophette a sualdan hmu zo ing; Baal khuavang hming in pong ai, i minungte hoisual zo i.

¹⁴ Ikhalselai Jerusalem ai prophette tu cia tahin amahte sualhnak luar deuh i. Kangkawm sualhnak bawn ai thudonrel i; Sual bawn tuhin midang bawm i. Ciamanin thilpha lo bawn heh, aisu inkhai hlat tum lo i. I mithmuh ah amahte veksen in Sodom bang i. Khuasong mite tu Gomorrah mite bang i.

¹⁵ “Ciamanin Jerusalem prophette thu ah Cungnungber Bawipa in hetihin rel i. Amahte aih tuhin thinghnah kha pe tuhai, amahte ding tuhin thihsi pe tuh ing. Zaimantifangin Pathian ling nuam lohnak thinlung he ram pumpuhluk ah dimruai zo i,” ti i.

¹⁶ Cungnungber Bawipa in Jerusalem mite hnenah, “Prophette ai thurelhnak tu ngai mah ih; thudon lek rel ai a dik lomi umlamhnak ning pe i. I ka ai suakhnak ponkam ilo in amahte ruathnak menma ning rel i.

¹⁷ I thurelhnak a ngai nuam lotute hnenah zaizongza pha tuh sio ngawn i tiin rel ṭiode i. Milungruhte hnen ahkhai hnawmcanhnak hleng tuh awng lo i ti i,” tiin rel i.

¹⁸ Kaimah in, “Hemi prophette lakah aisu inkhai Bawipa ai a thuruathnak khiah ling lo i, amahte thinlung inkhai lingthiam lo i; a relhnak khai ngai lo ai poi fawn lo i.

¹⁹ A thinrawhnak tu khuahu le hlisia bang i ai hrokhrawl mite lu vumah huk tuh dekdo i.

²⁰ Cen bawn a tumhnak hmuahhmuah a bawn ben hlanlo com tuh awng lo i. Hmai lam can ah he thu tu a minungte in ling fiang leh tuh i,” tiin rel ing.

²¹ Bawipa in. “Hemi prophette heh i hlathnak ilo napui feh tlang i. Thurel tuh pe lo napui i hming in thurel thotho i.

²² I thuthup ruathnakte ling selai i minungte hnenah i thute rel tuhai a nuncan pha lo le a thilsual bawnhnak tepawl heh hlum zo tuh napui i!

²³ “Kai tu hmunkhat lek ah umtu ilo in khuahacang ai a umtu Pathian ing.

²⁴ I hmu thil lohnak tian ai a relhbentu aisu khai um lo i. Lai le van khuahacang ah um heh i ling lo i sim?

²⁵ I mang ah Pathian ai thurelhnak za ing tiin i hming in thudon a reltu prophette ponka za ing.

²⁶ Amahte ai puahfawmhnak thudon in i minungte khiah zaikom tian hoisual tuhlai ini?

²⁷ Amahte pu le a pate in i hai ai Baal khuavang hnenah a tlan bangin a mang thurelhnak in i minungte in i hai tuhin ruat i.

²⁸ Mang a naitu prophet in a mang khiah rel selai, i thurelhnak a zatu prophet inkhai i thu khiah fel ngai in amahte hnenah rel tuseh. Fanghi tu fangmu pha thawn santeh tlak lo i.

²⁹ I thu tu mai bang i ai lungto a khoi bentu sobul bang i.

³⁰ Pakhat le pakhat ai ponkam ru sah dun in Bawipa ai ponkam i tiin thu a reltu prophette khiah ralcai ing.

³¹ Amahte pumpak ponkam khai Bawipa ai ponkam i tiin thu a reltu prophette khai ralcai ing.

³² Kaimah Bawipa ai i ponghnak heh ngai tu ih! Thudon lekin mang thu a reltu prophette khiah ralcai ing. Amahte mang rel ai a thudon le puarthauhnak in i minungte hoisual i. I hlathnak ilo i, feh tuhin thu i pehnak khai ilo i. Mipui caah hnempuihnak zaikhai nai lo i. Kaimah Bawipa in rel zo ing,” tiin ti i.

Bawipa Ai Thilrit

³³ Bawipa in kaimah hnenah, “Jeremiah, i minung lakah pakhatkhat in ituseh, prophet ihlahle suangbawi pakhatkhat in ituseh, thu na zawt ai ‘Bawipa ai thu tu ziang i?’ na ti lekhaw anite hnenah ‘Ningmah heh Bawipa caah thilrit i si ai ning lon tuh teu i,’ tiin ti tu.

³⁴ I minung lakah pakhatkhat in ituseh, prophet ihlahle suangbawi pakhatkhat in ituseh, ‘Bawipa ai thilrit,’ tihnak pongfang hmang lekhaw amah le a innsang veksen in cawh tuh ing.

³⁵ Ciatih ilo in aisu inkhai a rualpuite le a songkhatte hnenah, ‘Bawipa in akontih in na sawn i? Bawipa in akontih in pong i?’ tiin zawt tu sawn seh.

³⁶ Ciatihin zaikom inkhai, ‘Bawipa ai thilrit,’ tihnak ponkam hmang nawn maseh. Hmang lekhaw amahte caah i thu tu thilrit taktak ah bawn tuh ing. Hemi minungte in a nungmi Pathian, Cungnungber Bawipa, amahte Pathian ai ponkam tu phundang ah mer ai a pingpeng in pialruai sio i.

³⁷ Jeremiah, prophette tu ‘Bawipa in akontih in ning sawn i? Bawipa in ziang pong i?’ tiin zawt tulai,

³⁸ I thupeciahnak hlun nuam lo ai ‘Bawipa ai thilrit,’ tihnak ponkam hmang thotho lekhaw fiang ngai in rel tu.

³⁹ Amahte khiah khai tuhai a pupate le amahte hnenah i pehnak khuapui ituseh, amahte khai ituseh, I hnenin lamhlapui ah lon tuh sek ing.

⁴⁰ Amahte vumah zaikom inkhai hai thil tuh lohnak zakthihnak le mualphohnak hlengruai tuh ing,” tiin ti i.