Jeremiah 2 - Zanniat Bible

Pathian in Israel Kilkhawl I

¹ Bawipa awka tu i hnenah hleng ai,

² Jerusalem khua songai a ummi zongzong hnenah a hnia lamai bangin rel tu, i ti i. “Na dawn laiah rinsan tlak na i zia le kin hoi dun sawng ai na i ithnak khiah hih ngiode ing. Nelrawn lakah i hlun ai aisu inkhai vai awng lohnak ram ahkhai i hlun isi.

³ Aw Israel, nang tu kaimah ai lek isi; I naihnak mi thianghlim isi. Nangmah na tuahmawhtu vumah, harsahnak le siatsuahhnak hlengruai ing; Kaimah Bawipa in rel zo ing,” tiin ti i.

Israel Ai Pupate Sualhnak

⁴ Jacob ai tesinfate, Israel ai sen mite, Bawipa ai thurelhnak ngai tu ih.

⁵ Bawipa in, “Ning pu le ning pate in i vumah ziang mawhhluk tuh nai i? Zaimanin i zangtak tlang i? Santlai lomi milim bia ai amahte khai mi zai lo ah cang zo i.

⁶ Ziang khai i siar tlang lo i, ‘Kin suahtu Pathian’ ti awng lo i; Egypt ram songin suakruai ing, Hampalak ramkhing in fehpui ing; Nelrawn ram le runsiat khur thuk ngai, Ram car le khuathim sah ngai ram le ram kihkul, Aisu khai um le feh awng lohnak ram songin fehpui napui zaikhai i siar sah lo i.

⁷ “Ram pha bik songah ram song suakhnak thilpha le a thaite ai tuhin hlengpui ing. Ikhalselai i ram siatsuah tlang lehlam i. I pehnak ram ningrimtiar i.

⁸ Suangbawite in, “Bawipa a konteng ah um i?” ti tlang lo i. Dan a awhtu le i suangbawite inrin i ling nawn lo i. A hotute in ral i cai ai, A prophette inkhai Baal khuavang hming in thurel tlang ai zaikhai ilomi milim bia tlang i.

Pathian In A Minungte Mawhhluk I

⁹ Ciamanin Kaimah Bawipa in, I minungte vumah mawhhluk thu rel tuh ing; A tesinfate vum ahkhai thu nai tuh ing.

¹⁰ Nitlak lamah Cyprus tikulh tian feh tu ih; Nisuah lamah Kedar ram tian mi hlat tu ih! Hetih ai thil a canghnak thil bangtluk thil canghnak akonah khai hmu tuh lo i si.

¹¹ Miphun dang aisu inkhai, a Pathian thleng awng kel lo i, pathian ngaingai ilo ita inkhai! Ikhalselai i minungte incen a Pathian thleng i; Amahte vumah songlawihnak a hlengruaitu Pathian tu, amahte caah zaikhai hnempui lo, khuavang in i thleng i.

¹² Ciamanin maw vante khai, ngaihsunur in hlin tu dek ih; Lungsia in hlawng tu ih.

¹³ Zaimantifangin i minungte in thilsual pahnih bawn i: Nunhnak cirhti kaimah i hnawl ai ti zaikhai tling thil lo i, tikhur khing co tlang i.

Israel Sualhnak Ai A Thai

¹⁴ “Israel tu sal ilo i; Tualsong suak sal i awng lo i. Ikhalselai zaimanin a ralte in suk le so ah fehpui dekdo i?

¹⁵ A ralte in chintit bangin auh tlang dekdo i; A ram tu nelrawn ah cangruai i. A khuapuite tu khuarop ah can ai hlum sio i.

¹⁶ I, Memphis mite le Tahpanhes mite in, amahte luruh seu ai khoi i.

¹⁷ Aw Israel, lampui in na hoi lai rori ah, Bawipa ning Pathian Kai i hlum manin, Hemi thil poimawh heh na vumah nangmah in hlengruai isi.

¹⁸ Egypt ramah feh in Nile Runpui ai ti dinghnak in ziang ngah tuh ing tiin ruat isi? Assyria ramah feh in ziang hlawh tum isi? Euphrates runpui ti dinghnak in ziang ngah tuh ing tiin ruat isi?

¹⁹ Nangmah ai sual bawnhnak lala in na cawh tuhai, Lamkhelh na hlunhnak in mawh na hluk tuh i. Kaimah Bawipa na Pathian i zam ai, I vumah kihzahhnak zaikhai na nai nawn lo manin, Nangmah ca thil sual le thil poimawh khiah ling tuh bet bo isi. Cungnungber Bawipa, Pathian Kaimah in rel zo ing,” tiin ti i.

Israel In Bawipa Bia Tuh Hnong I

²⁰ Cungnungber Bawipa in, “Aw Israel, hlanlai in i thu el zo isi; I thu hlun awng lo ai i bia na nuam lo i. Tlang sang cangah le thingnim hniaah milim bia ai hlotlau isi.

²¹ Cabit kuang songin a pha ce bangin na bir ing, Ci pha songin a rilhnak isi. Ikhalselai ziang cang isi ti sik tucuk! A hmon a uih le santlai lo cabit kuang na cang zo i!

²² Satpia a pha ber in takhlu khal sikhaw, na sualhnak niah hmu thotho ing.

²³ Akontih in miningrim ilo ing, Baal bia awng lo ing ti thil isi? Horkuam songai na sualdan heh sik tucuk! Thilsual na bawndan heh phatak niu in sik tucuk! Hrem thilh lo kalauk nu bangin; A hur laiah amah nuamnuam in a tlantu.

²⁴ Runsiat lakah a dawktu dekdo kalauk nu bang isi; A hur laitak ah kalauk tu aisu in uk thil tuh i? Kalauk cang hrangah a si hnelhno kul lo i; A hur laitak ahcen bai niu in ngah thil i.

²⁵ “Aw Israel, khuavang dangdang na hnawhhnak ah na ke cawlruai mah, Na dang khai carruai mah. Ikhalselai nang in, ‘Let thil nawn lo ing, Ramdang khuavang i ngai ze hang ai, hnawh tuh betbo ing ti isi,” tiin ti i.

Israel Tu Cawh Tlak I

²⁶ Bawipa in, “Ruko pom ai zak a thi bangin Israel mite tu zak ning thi tuh i: ning kumpibawi, ning hotu bawite, ning suangbawi le ning prophette tianin zakthihnak lianpui tuar tuh i si.

²⁷ Thingkung heh kin pa i ai lungto heh kin nu a titu ningte tu zak ning thi tuh i. I hnenah let sawn loin i hnenin ning tlan manin hebang zakthi le mualpho in um tuh i si. Cen ngaihsunur le vansang in ning um fangin, ‘Kawi tulai kin o tu,’ i ti i si.

²⁸ Ningmah ca ning bawnhnak ning biahnak khuavangte tu akonah um i? Ning harsa fangin ning bawm tuseh, ning bawm ben lekhaw! Aw Judah, khuapui na nai zah in khuavang khai tampui nai isi.

²⁹ I vumah na phuncamhnak ziang i? Zaiman i tawngcai isi?

³⁰ Na cawh napui na caah zaikhai hnempui lo i. Nunthutiam pha khai ilo i si. A hrang bik chintit bangin nangmah ai ralvang lala in na prophette rek isi.

³¹ Aw Israel mite, i relhnak heh ngai tu ih! Ning caah nelrawn ro bangin maw, ramthim le ram kihkul bang ing im? Zaimanin, ‘Kin luat ai kin daihhnak bangin nung tuh i ing, na hnen ahcen let tuh lo i ing,’ i ti i si.

³² Fenu in a hlawnthil hai thil awng awm? Mothar in hoidunhnak hnikpon hai thil awng awm? Ikhalselai i minungte in i hai ai a ni le a hla rin siar cawk nawn lo ing.

³³ Ning daihtute daihdan in umdan tu thiam tlang ngai i si. Nupang pha lober hnenah rin zirhthaihnak nai lai i si.

³⁴ Ning hnikpon tu thisan in mat i; ciami thisan tu ruko misualralte ai thisan ilo in mawh nai lo farahte ai thisan i. “Ciacingin ning tu,

³⁵ ‘Mawhhnak nai lo i ing, Pathian tu kin vumah a thinraw tuh lo i,’ ti lai i si. Ikhalselai ning sualhnak ning pheh manin Kaimah Bawipa rori in ning cawh tuh ing.

³⁶ Miphun dang khuavang hnenah ning tlan manin ningmah hlanlam man nai lo ah bawn dun i si. Assyria vumah ning vansang zo bangin Egypt inkhai thinpit vansang in ning bawn tuh i.

³⁷ Egypt lam hoi nuam nawn loin ning lu ah ning kutsih tuhai zakthi in laipua sik tlang tuh i si. Ning rinsanhnak mite tu kaimah Bawipa in i hnawlciahnak mite imanin anite hnenin zaikhai ngah tuh lo i si,” tiin ti i.