Jeremiah 12 - Zanniat Bible

Jeremiah In Bawipa Thuzawt I

¹ “Bawipa, nang tu midikcang isi; I thula na hnenah hlengruai inglai khai na dikcang tuh thotho i. Ikhalselai i zawt nuamhnak um i: Zaimanin hrokhrawl mite khangso amam ini? Zaimanin mileplete hlawhtling ini?

² Nangmah in kho ngai in bir ai ham nai i; khang ai thai i. Amahte ponka incen na porh i, Ikhalselai a thinlung incen zaikhai na siar tlang lo i.

³ Ikhalselai Bawipa nang cenin i ling isi; I thil bawnhnak i hmu ai kai in zaitluk na it ing ti khai ling isi. Hemi hrokhrawl mite tu rek tuhhnak tuu bangin duk tu; Amahte thih ni a khim hlanlo tlan tuh teu loin kil tu.

⁴ Zaikom tian amahte ram heh car tuh i? Zaikom tian kin ram pumpuhluk ai hampa heh vawi tuh i? Ramsa le vaniu khai thi betbo i. ‘Pathian in kin bawnhnak hmu hang lo i!’ a titu minungte ai sualhnak manin i,” ti i.

⁵ Bawipa in, Aw Jeremiah, Minung rin dawp zuam ben hlah lesikhaw Akontih in siphuh tu dawp zuam ben tuh isi. Lenpal ah rin na ding ben lo fangin tu Akontih in Jordan runpui kam hambur lakah ding ben tuh isi?

⁶ Na unaute, na innsangte inrin, na engsan in na ralcaitu ah tel i. Anite khiah sang mah, amahte ponkam a pha ta inkhai,” tiin i ti i.

Bawipa A Lungsia I

⁷ Bawipa in, “Israel zangtak zo ing, I rilciahnak i miphun heh hnawl zo ing. I daihhnak i minungte khiah, Amahte ralte kut songah pe zo ing.

⁸ I rilciahnak minungte in ral i cai i, Tupui songai chintit bangin i vumah huk tlang i; ciamanin i hua i.

⁹ I rilciahnak i minungte tu, Nuamhmuncang in mupui ai a hnawthnak vaniute bang i. Amahte sa aihnak puai ah ramsate khai ko tu ih.

¹⁰ Ramdang uktute in i cabit vuan hnawmcan sio i; I loram fon dek ai a daihkul i ram khiah nelrawn cangruai i.

¹¹ Hlumhnak ram cangruai ai, I mithmuh ah hampalak ramah cang i; A ram pumpuhluk in nelrawn ah cang ai aisu inkhai poi lo i.

¹² Nelrawn ramkhing tlangsang vum khuahacang ah, Mi sut tuh le rok tuhin siatsuahtute kawi i; Ram pumpuhluk khat lam tong in a khat lam tong tian a siatsuahtu heh Bawipa ai a ralvang i. Aisu khai hlamuanghnak thawn um thil lo i.

¹³ I minungte in sangvut pawi i; Ikhalselai hling le so lek khawm i; Harsa ngai in naper i, Ikhalselai zaikhai ngah lo i. Thin i raw ze manin, amahte cinghnak rongpo ai thaihnak nai lo i,” ti i.

Bawipa Ai Thukhamhnak

¹⁴ Bawipa in, “I minung Israel mite ai ram a siatsuahtu, Israel ram hiangai umhnak ramte hnenah rel tuh nai ing. Ciami hrokhrawl mite tu phaihnak thingkung bangin amahte ram an phai tuhai amahte hnenin Judah mite hup tuh ing.

¹⁵ Ikhalselai ciatihin i phai hnuaah amahte vumah ninghiohnak nai leh tuhai amahte khua le ram ṭen ah hoi leh tuh ing.

¹⁶ Baal khuavang hming in i minungte cukcamhnak zirh napui tun tu I hming in cukcamhnak zirh ai, ‘Bawipa a nung bangin,’ ti ai a thinlung taktak in i minungte biahnak pom lekhaw i miphun ah cang tuh ve ai khangso tuh ve i.

¹⁷ Ikhalselai miphun pakhat in hlun nuam hlah lekhaw ciami miphun tu phai tuh lio ai siatsuah tuh ing. Kaimah Bawipa in rel zo ing,” tiin ti i.