Jeremiah 10 - Zanniat Bible

Milim Biahnak Le Biahnak Dik

¹ Aw Israel mite, ningmah ca Bawipa relhnak thu heh ngai tu ih.

² Bawipa in, “A dang miphunte ai thil bawndan hlun tlang mah ih; Van ah thil ngaihsunurkul ning hmu inkhai thinlau mah ih. Midangte hlawng in lau khalselai lau mah ih.

³ Hemite ai biahnak tu zaikhai ilo i; Tupui songah thing kungkhat vawng in, Kutzung thiamte in amahte kutken thilri in solh tlang ai,

⁴ Sui le ngun in par tlang i. A tlu lohnak tuhin thir in khen cih i.

⁵ Ciabang milim tu zil vuandum songai mude tar bang i; Pong thil fawn lo i. A zawng fawm kul i, a vak thil lo manin. Ciamite heh lau mah ih, Zaikhai ning ti thil lo i; Ning phathnak bawn thil lo ai, Ning hnophnak khai bawn thil lo i,” ti i.

⁶ Aw Bawipa, nangmah bangtu aisu khai um lo i; Nang tu cungnungber isi, Na hming tu a thawmlian ai huham nai fawn i.

⁷ Nang, miphun hmuahhmuah ai Kumpibawi tu aisu in upat loin um thil tuh i? Upat le kihzah tlak isi. Miphun tampui ai mifimte lakah le, A kumpibawite lakah khai, Nangmah bangtu aisu khai um lo i.

⁸ Anite tu amahte veksen in ramsa bang mivoi le mitaw ciang i! Thing ai bawnhnak milim hnenin, Ziang zir pha nai tuh tho i?

⁹ A milimte tu Spain ram ngun in le, Uphaz ramai sui in tuam ai, Kutzungthiamte ai bawnhnak i. Sannum le mepian pon in thuam i; Thiamtaktute ai takhnak pon in thuam tlang i.

¹⁰ Ikhalselai Bawipa, nang tu a dikmi Pathian isi; Pathian nung isi ai kumzangza kumpibawi khai i si. Thin na raw fangin laivum pumpuhluk heh hlin sio i; Na thinrawhnak tu miphunte in tuar ben tlang lo i.

¹¹ Ningmah in, “Lai le van a semsuah thai lotu khuavangte tu siatsuah tuh sek i!” tiin rel tu ih. Laivum a konteng ah khai um tuh nawn lo i.

Pathian Thangphathnak La

¹² Pathian in laipua heh a hathnak in bawn i; Laivum pumpuhluk heh a fimhnak in semsuah ai a thiamhnak in van khai pharh i.

¹³ Amah ai thupehnak in van vumah ti pau i; Vanham tong in khuanim keng i; Ruah lakah vantlingtleleuh ruai zutzo i. A thilri dahhnak hmun an hlivua suakruai i.

¹⁴ Hemi thil kin sik fangin minung heh, mivoi le ruathnak nai lo ising. Milim bawntute khai mizawltute i; Zaimantifangin amahte bawnhnak milimte tu, mizawlhnak menma i ai nunhnak khai nai lo i.

¹⁵ Thudon lek i ai hnihsakul i. Bawipa a kawi fangin tu bo tuh sek i.

¹⁶ Jacob ai Pathian tu ciatih bang ilo i. Ani tu zaizongza a bawntu i. Amah ai minung taktak i tuhin Israel mite ril i; Amah ai hming tu Cungnungber Bawipa i.

Saltanghnak Can Hleng Tuh I

¹⁷ Jerusalem mite, ral ai kulh siohnak i si. Ning thilrite khawm tusek ih.

¹⁸ Bawipa in he ram an ning lon tuh sek i. Mi pakhat rin tang lo tianin ning cil tuh dek i. Bawipa in rel zo i.

¹⁹ Jerusalem mite hetihin au tlang i, “A roh ngai in tuahmawh mi i ing, Kin hmaihma lawm thil lo i. Ikhalselai kin tawkhnak thil i ai, a tuar kin kul ve i, tiin ruat i ing.

²⁰ Kin ponhlamte hnawm sek i, Kin penhnak rite cat zo sek i, Kin fate in kin hlum sek i; Kin ponhlam salehtu rin um nawn lo i; Ponzar tartu aisu khai um nawn lo i,” ti i.

²¹ Cen kaimah in, “Kin hotute mivoi ciang i, Bawipa hnenah thuron tuh hal tlang lo i. Ciamanin hlawhtlinghnak zaikhai nai tlang lo i; I minungte piak tlang sio i.

²² Ngai tu ih, thuthang hleng i! Sak lam ramah buaihnak a roh ngai in um i; A ralkapte in Judah ramai khuapuite heh nelrawn cangruai tuh i, Mehlengte umhnak tuhin,” ti ing.

²³ Aw Bawipa, minung in amah ai nunhnak a ukthaitu um lo i; Mah ai nunhnak lampui vumah thunaitu aisu khai um lo i, ti ling ing.

²⁴ Aw Bawipa, na minungte heh nunthutiam tu; Ikhalselai harsa ze incen bawn malaw; Na thinraw in kin ti malaw; Cia lo fangin tu kin bo tuh ngaingai i.

²⁵ Na thinrawhnak tu na bia lotu miphunte le, Na hnawltu ram vumah hlengruai tu sawn law. Anite tu na minung rektute i; Kin siatsuah sek ai kin ram tu hnawmborh pumhnak ah a cangruaitute i.