Jeim 2 - Zanniat Bible

Hlaihdanhnak Nai Mah Ih

¹ U le naute, songlawihnak Bawipa, kin Bawipa Jesuh Khrih sangtu ning imanin zaikom inkhai hlaihdanhnak nai mah ih.

² Santehhnak ah mi pakhat tu sui kutruk le hnikpon pha ngaingai thawn ning pumkhawm hmunah kawi ai mifarah pa tu hnikpon her sengkhai thawn kawi ve i.

³ Ciatihin hnikpon pha ngai a siltu pa tu ning in uar deuh ce manin, “Hemi tohkham pha ber ah to tu,” ti i si; ikhalselai mifarah pa tu, “Khiata ah ding tu,” ihlahle i ke hiang suat vumah to tu,” ti le i sikhaw,

⁴ ningmah lakah hlaihdanhnak nai ai thinlung pha lo vuman thukhanhnak bawn i si.

⁵ I ithnak u le naute, ngai tucuk ih. Pathian in laipua vum mifarahte heh sanghnak lamah milian cang tuhin le amah a ittute hnenah a thukhamhnak Ukhnak cotu tuhin ril ilo im?

⁶ Ikhalselai ning incen mifarahte nautat i si. Aisu i ning zohsuamtu le thureltute hmaiah ning duktu dekdo heh? Miliante i, ilo im?

⁷ Pathian in ning hnenah ning pehnak hming pha a relsiattu khai anite ilo im?

⁸ Lai Thianghlim songai a umhnak, “Na innhnen heh nangmah na it dun bangin it tu,” tihnak Pathian Ukhnak ai dan heh hlun ben lesikhaw a dikmi bawn isi.

⁹ Ikhalselai a pualam ah hmuhhnak in mi hlaihdan lesikhaw na sual i. Dan in dan baltu ah na hmu i

¹⁰ Cen aisu khai thupehnak pakhat bal lekhaw thupehnak veksen in a baltu i.

¹¹ Zaimantifangin, “Kangkawm sualhnak bawn mah,” a titu in, “Mi rek mah,” ti i. Kangkawm sualhnak na bawn lo inkhai mi rek lesikhaw dan baltu isi.

¹² Ciamanin luathnak kin petu dan ai thukhan tuhhnak bangin ning pongdan le ning thil bawndan bangin bawn tu ih.

¹³ Mi hnenah ninghiohnak a nai lomi heh Pathian in a thu a khan fangin a vumah ninghiohnak nai tuh ve lo i; ikhalselai thukhanhnak heh ninghiohnak in neh i.

Sanghnak Le Bawnhnak

¹⁴ U le naute, mi pakhatkhat in sanghnak nai ing ti khalselai a bawnhnak in larruai hlah lekhaw zai phathnem i? Ciami sanghnak in o thil tuh im?

¹⁵ Kin Khristian unaute lakah pasal ituseh nupang ituseh hnikpon le aih tuh nai loin um bang selai,

¹⁶ ciamite hnenah, “Pathian in hmuifu ning pe tuseh. Lum niu in um tu ilai rong pha niu in ai tu ih,” tiin ning tihnak tu ziang hnempui i?

¹⁷ Ciatih bangin sanghnak ahkhai i; bawnhnak tel hlah lekhaw sanghnak tu a thi i.

¹⁸ Ikhalselai mi hrekkhat in, “Mi pakhat in sanghnak nai ai a dang pakhat in bawnhnak nai i,” ti tlang tuh i. I thu sawnhnak tu, “Bawnhnak um lo ai sanghnak lek a naimi i hmuh tulai kai in i bawnhnak in i sanghnak na hmuh tuh ing,” tihnak i.

¹⁹ Pathian pakhat lek um i, ti sang ilo i sim? Pha i. Khuasiate inrin Pathian pakhat um i ti sang ve ai a kih in hlawng tlang biakbo i.

²⁰ Ruathnak nai lo pawl! Bawnhnak um hlah lekhaw sanghnak heh santlai lo i, ti hmu ning hiam awm?

²¹ Akontih in kin pu Abraham tu Pathian thawn rualremhnak co i cang ta? A fapa Isaac puleng vumah Pathian hnenah hibawlhnak hrangah pe ai ciami a bawnhnak manin rualremhnak co ilo im?

²² Ciami heh ling lo i sim? a sanghnak le a bawnhnak feh tlang i. A bawnhnak manin a sanghnak semkhim i.

²³ Cen Lai Thianghlim in. “Abraham in Pathian sang ai ciami a sanghnak thawmin Pathian in midikcang ah cosang i,” a tihnak khim i. Ciamanin Abraham tu, “Pathian ai rual,” tiin ko i.

²⁴ Hetih imanin minung tu sanghnak lekin ilo in a bawnhnak manin Pathian thawn rualremhnak co i ti ling i si.

²⁵ Hlotlau nu Rahab thula ahkhai ciatih thotho i. Micultu Israel mite phatak niu in a tuamhlawm hnuaah lampui dang in tlansuak thil tuhin bawm i; ciatih bangin a bawn manin Pathian thawn rualremhnak co i.

²⁶ Ciatih imanin ruangpum heh rauhla loin tu a thi bangin sanghnak khai bawnhnak loin tu thi ve i.