Isaiah 8 - Zanniat Bible

Isaiah Ai Fapa Hnikhnaihhnak

¹ Bawipa in i hnenah, “Lainganhnak tuhin lungtlep lianpui tlepkhat lang tulai mizapui ling thai in: ‘Rang ngai in sut, rang ngai in lang,’ tiin ngan tu.

² Rinsantlak minungte pahnih, suangbawi Uriah le Jeberekhiah ai fapa Zechariah tu lingpuitu ah sawm tu,” tiin i ti i.

³ Cia hnuaah i nupui thawn it kawm le naupai ai fapa nai i. Ciafangin Bawipa in, “A hming tuhin “Rang ngai in sut, rang ngai in lang’ tiin ti tu.

⁴ Nauniu in, ‘Nunu, Papa,’ ti rin a thiam hlanah Damascus ai lianhnak thilri le sumsaw hmuahhmuah le Samaria ai rallonghnak thilri hmuahhmuah heh Assyria Kumpimangbawi in lang tuh sek i,” tiin i ti i.

Assyria Kumpimangbawi Hleng Tuh

⁵ Cen Bawipa in i hnenah pong lala ai,

⁶ “Hemi minungte tu dap niu ai a luanghnak Shiloah Runpui ti hnawl tlang ai kumpibawi Rezin le kumpibawi Pekah hmaiah hlawng derdo in um manin,

⁷ Bawipa kaimah rori in Assyria Kumpimangbawi le a ralkapte heh Judah tawng tuhin fehpui tuh ing. Euphrates runpui ti lian ai run kam hmuahhmuah a liam sio bangin kawi tuh i.

⁸ Judah ram songah tilawi bangin hleng tlang tuhai kodar cam tian khang tuhai zaizongza khuk tuh sek i,” ti i. Pathian kin hnenah um i. A ko pharh ai kin ram heh hup i.

⁹ Aw ram cangcang le miphun cangcang, thinlau in hmunkhat ah taikhawm tu ih. Ngai tu ih, lamhlapui ai a umtute khai raltho tuhin ralring tu ih; ikhalselai lau tu ih. I, ralring tu ih; inapui lau tu ih!

¹⁰ Tumtekhnak tu nai tu ih. Zaikhai hlawhtlinghnak cenin nai tuh cuang lo i si. Ning nuam zah in pong tu ih; a lovang ciang tuh i, zaimantifangin Pathian kin hnenah um i.

Bawipa In Prophet Tu Ralringruai I

¹¹ Mizapui ai hlunhnak lampui hlun tuh loin Bawipa in huham a roh ngai thawn ralringruai i.

¹² “Amahte tumtekhnak ah tel ve malai a kihhnak khiah kih ve mah.

¹³ Cungnungber Bawipa kaimah lek a thianghlimmi ing ti khiah phatak niu in hih tu. Kaimah lek na kih tuhhnak ing.

¹⁴ I thianghlimhnak ngaihsunurkul imanin kai tu anite bahhnak lungto bang ing. Kai tu Judah ram le Israel ramai mizapui le Jerusalem khuasong mite a awktu tuh thang bang ing.

¹⁵ Mi tampui bah tlang tuh i. Tlu tuhai a ek a zan in um tuh i. Thang in awk tuh i,” tiin i ti i.

Mithi Thuzawt Tuh Loin Thupehnak

¹⁶ Ning i hnuahlunte, Bawipa in i hnenah a relhnak thute a kilkhawltu le a nungruaitu tuh i si.

¹⁷ Bawipa tu a minungte ai hmu tuh loin relh i; ikhalselai kai incen amah rinsan ai i umlamhnak tu amah hnenah dah ing.

¹⁸ Heta ah Bawipa ai i pehnak fate thawn um tlang i ing. Cungnungber Bawipa ai tohkham Zion Mual ah um ai kinmah khai Israel mite hnenah hnikhnaihhnak kin kuat i.

¹⁹ Mi tampui in pol le kutrin sikthiamte, ainai pawl leng tuhin le thuzawt tuhin ning ruai tuh i. “A nung mite tumrul in a thi mite thuzawt tuh le mithi rauhlate thuzawt tuh heh pha hlen nakhaw,” ning ti tuh i.

²⁰ Ciatihin a ti fangin ningmah in, “Bawipa ai ning zirhhnak heh ngai tlang tu sawn ih. Pol thu tu ngai mah ih. Anite relhnak tu ning caah hnempuihnak zaikhai nai tuh lo i,” ti tlang tuh i si.

Harsahnak Can

²¹ Amahte rikam le thinrawhnak in a kumpibawi le Pathian tianin cukcam tuh i. Van sik tuh i,

²² lai khai sik tlang tuh i; ikhalselai harhnak le thimhnak siarlo a dang zaikhai hmu tuh lo i. Ciami a kihkul thimhnak songah lut tuh cuahco i. Hemi harsahnak songin luathnak tuh lampui um tuh lo i.