Isaiah 7 - Zanniat Bible

Ahaz Hnenah Thucahhnak

¹ Uzziah ai tupa, Jotham ai fapa kumpibawi Ahaz in Judah ram a uk laiah raltawnghnak suak i. Syria kumpibawi Rezin le Israel kumpibawi Pekah, Remaliah ai fapa, in Jerusalem tawng i; ikhalselai ruam ben lo i.

² Syria ralkapte Israel ram hleng zo ti khiah Judah kumpibawi in a za fangin amah le a minungte tu thinlau ze ai hlivua in thingkung a hmut bangin hlin ai hlawng tlang dekdo i.

³ Cen Bawipa in Isaiah hnenah, “Na fapa Shear Jashub fehpui tulai kumpibawi Ahaz tawk tuhin feh tu. Kumpibawi tu vumta tikhur in ti a luanghnak tizir tonghnak ai hnikpon taktute ai naperhnak lampui ah tawk tuh i si.

⁴ Ning tawk fangin amah tu ralring in, lungmuang ngai in, thinlau lo le kih loniu in um tuhin rel tu ih. Kumpibawi Rezin le ralkapte le kumpibawi Pekah thinrawhnak tu kih tuh um nawn lo i; a hmit dawn thingthute pahnih ai maikhu tluk rin i nawn lo i.

⁵ Syria le Israel mite le a kumpibawi thawn na engsan tlang i.

⁶ Judah tawng tum i; Judah mite tu anite hnenah ṭang tuhin hring tuhai Tabeel ai fapa heh kumpibawi cangruai tum tlang i.

⁷ Ikhalselai kaimah Bawipa in ciatihin cang tuh loin thuphuang zo ing.

⁸ Zaimantifangin Syria tu Damascus khua tahin hat sawn cuang lo ai Damascus tu kumpibawi Rezin tahin khai hat sawn cuang fawn lo i. Israel ram thu rel lengkhaw tunai panin hmai lam kum sawmruk le kum nga songah Israel tu khoi tuh sio ai ram ramkhat titlak khai um tuh nawn lo i.

⁹ Israel tu Samaria khua tahin hat sawn cuang lo ai Samaria khai tu kumpibawi Pekah tahin hat sawn cuang fawn lo i. Ning sanghnak kho hlah lekhaw a rai ning awk tuh lo i,” tiin ti i.

Emmanuel Hnikhnaihhnak

¹⁰ Bawipa tu Ahaz hnenah thucah kuat leh ai,

¹¹ “Bawipa na Pathian hnenin hnikhnaihhnak ngen tu. A thuk ber mithi khua an ituseh, a sang ber vancung inkhai ituseh ngentu,” tiin ti i.

¹² Ahaz in, “Hnikhnaihhnak na ngen tuh lo ing. Bawipa tu cu tuh lo ing,” ti i.

¹³ Ciafangin Isaiah in, “Aw kumpibawi David ai tesinfate, ngai tu ih. Minung thintha siaruai zo ai a poi ze i; tunin Pathian thintha siaruai tuh lala i sim?

¹⁴ Tunah Bawipa amah rori in hnikhnaihhnak ning pe tuh i. Nupang niu pakhat in naupai ai fapa in te tuhai a hming ah Emmanuel tiin bawn tuh i.

¹⁵ Upa a khang ai a pha le a hnawm a thiathiam fangin a rong aihnak tu kawlpawhnawi le khoitizu i tuh i.

¹⁶ Ciami can a hleng hlanah ning kihhnak ngai kumpibawite pahnih ai ramte tu khing tuh sio i.

¹⁷ “Israel le Judah ning khek hnuaah zaikom inkhai ning tawk awng lo harsahnak tu Bawipa in nangmah le na songkhat le na miphun vumah hlengruai tuh i, Assyria Kumpimangbawi hlengruai tuh i.

¹⁸ “Ciami can a hleng fangin Bawipa in Egypt mite tu Nile runpui hnar a hlahnak ber inkhai thothi bangin zuang tuhin le Assyria mite tu amahte ram an khoi bangin zuang tuhin vu in ko tuh i.

¹⁹ Kawi tlang tuhai phairawn lak, khukua lak, hling le so lakah le sumhnam lenghnak hmuncang ah dim tlang tuh i.

²⁰ Ciami can a hleng fangin Bawipa in Assyria Kumpimangbawi tu ning sammettu tuhin Euphrates runpui ral in ko tuhai ning khahmul, ning lu vum sam le ning taksa vumai hmul hmuahhmuah met tuh sio i.

²¹ “Ciami can a hleng fangin lovai pa pakhat in kawlpawla lu khat le mete lu hnih a nai inrin,

²² a hnawi tam tuh ze ai a kulhnak tham tuh sio i. I, ram songai a tanghnak hmuahhmuah in ai tuhin kawlpawhnawi le khoitizu nai tuh i.

²³ “Ciami can a hleng fangin cabit vuan pha bik, cabit kuang thawng khat um, vuan pakhat ai tangka thawng khat man khiah hling le so in dim tuh i.

²⁴ Li le thal thawn minung sazulhnak hmunah cang tuh i. I, ram pumpuhluk tu hling le so in dim tuh sek i.

²⁵ Rong cinghnak tlang vum tepawl tu hlingkung po tuh sio ai aisu khai ciata ah feh tuh lo i. Kawlpaw le tuu lenghnak ramah cang tuh i.