Isaiah 65 - Zanniat Bible

Ralthotute Bawipa In Cawh I

¹ Bawipa in, “I minungte ai sawngenhnak sawn tuhin ralring dun napui anite in sawngen tlang lo i! Amahte tawk tuhin ralring napui anite incen i tawk tuh khai tum tlang lo i! I hnenah saw a ngen lomi miphun hnenah, ‘Heta ah um ing, na bawm tuh ing,’ tiin sawn tuhin ralring napui i hnenah sawngen tlang tau lo i!

² Thilsual lek lungruh ngai ai a bawntu le amahte daihhnak lek a hluntute hnenah catloin i kut san ing.

³ Zakthi rin thiam loin thin i rawruai ṭiode i. Vuan song cawlum hmunah lawki hibawlhnak sel ai lawki puleng vumah rimhmui tai tlang i.

⁴ Zan khing ah mithi rauhla tawk tuhin khukua le hlanmual ah feh i. Hemite in voksa ai ai lawki mite ai hibawlhnak sa tihang ding tlang i.

⁵ Ikhalselai midang hnenah, ‘Kin khing mah ih, mi thianghlim i ing,’ ti tlang i. Hemi bang minungte tu or cawk tuh ilo i; amahte vumai i thinrawhnak tu a dit awng kel lohnak mai bang i.

⁶ “Amahte cawh tuhin ruatcat zo ai i thukhanhnak tu ngan ciazo ing. Amahte thil bawnhnak tu pakhat khai pelh loin hmu tuh sio ai,

⁷ anite sualman le a pipute ai sualman co tuh i. Lawkite in tlang vumai dawlhnak puleng vumah rimhmui tai tlang ai thang i siat i. Ciamanin anite tu hlanai a bawnhnak bangin cawh tuh ing,” tiin ti i.

⁸ Bawipa in, “Aisu inkhai cabit thai pha heh siatsuah awng lo i; cabit thai pha in cabitti bawn sawn i. Ciatih bangin i minungte tu siatsuah tuh sek lo ing; Kaimah i ruaihtute tu hup tuh ing.

⁹ Judah hin Israel mite tu hmuifu pe tuhai a tesinfate in tlang vum ram tu khur tlang tuh i. Ciata ah i rilhnak le i ruaihtute tu um tuh i.

¹⁰ Kaimah i bia tuhin amahte tuu le kawlpawte tu tlimniu umhnak ram nitlak lamah Sharon phairawn, nisuah lamah Harsahnak phairawn tihnak ah hlat tlang tuh i.

¹¹ Ikhalselai kaimah i zangtaktu, i mual cianghlim Zion hnawl ai bawngphahnak khuavang Gad le bawngsiahnak khuavang Meni a biatu ningmah ca ahcen ciabang i tuh lo i.

¹² Na ko fangin i sawn lo ai ning hnenah i pong fangin i ngai lo manin sarthih lekin ning thi tuh i. I thu el le a pha lo bawn heh ningmah ai rilhnak i.

¹³ Ciamanin ning rel ing; Kaimah i biatu le i thu a hluntute tu aih tuh le bar tuh tampui nai tuh ngiode i; ikhalselai ning tu ri ning kam tuhai ti ning hal tuh i. Anite tu lungawi tuh i; ikhalselai ning tu zakthi le hmaisia in um tlang tuh i si.

¹⁴ Anite tu thinnuam in la sa tlang tuh i; ikhalselai ning tu ning thinlung khoi in kap tlang tuh i si.

¹⁵ I rilhnak minungte in ning hming tu cukcamhnak ah hmang tlang tuh i. Bawipa Kaimah rori in ning thiruai tuh ing. Ikhalselai i thu i hluntute tu hmingthar pe tuh ing.

¹⁶ Hemi ram songai a ummi hmuifu i ngentu hmuahhmuah in rinsantlak Pathian ai hmuifu ngen tlang tuh i. Cukcam in thukhamhnak a bawntu hmuahhmuah in rinsantlak Pathian hming in bawn tuh i. A liam sa can ai harsahnak tepawl tu bo tuhai hai tuh sio ihang,” tiin ti i.

Lai Thar Le Van Thar

¹⁷ Bawipa in, “Sik tucuk ih! lai thar le van thar a bawn lak thliahthlo ing. A liam sa thilte tu hai tuh sio i.

¹⁸ Kin semtharhnak vumah lungawi aipuang in um tu ih. I bawnhnak Jerusalem thar cenin anghnak in dim tuhai a khuasong mite tu thinnuam tlang tuh ngaingai i.

¹⁹ Jerusalem khua le i minungte manin kaimah khai lung i awi tuh i. Ciata ah tu kaphnak um tuh lo i; bawmhnak ngen khai um tuh nawn lo i.

²⁰ Nauniu thi khai um tuh lo ai aisu khai amahte san khim in nung tuh i. Kum zakhat a khimtute tu mino i tuh i. Cia hlanah thi lekhaw kaimah in cawh ing, ti hnikhnaihhnak i tuh i.

^21-22 Inn sa tlang tuhai a songah um tuh i; amahte sahnak inn tu aisu inkhai khur sah tuh lo i. Cabit kung bir tuhai cabitti ding tlang tuh i; midang aisu inkhai ding sah tuh lo i. Thingkung bangin i minungte tu san sau tlang tuh i. Amahte perhnak thai tu a khim ngai in ai tlang tuh i.

²³ Amahte naperhnak ah hlawhtlinghnak nai tuhai a tesinfate tu siatsuahhnak tawk tuh lo i. Amahte le a fate tu santong tianin hmuifu pe tuh ing.

²⁴ I hnenah sawngen a ben hlanah rin amahte sawngenhnak sawn tuh ing.

²⁵ Mehleng le tuufa niute tu hmunkhat ah rong ai tlang tuhai kawlpaw bangin chintit in hampa ro ai tuh i. Rul khai a kihkul i tuh nawn lo i. Aw Zion, i mual cianghlim, ciata ah zaikhai a kihkul le thilpha lo um tuh nawn lo i,” tiin ti i.