Isaiah 54 - Zanniat Bible

Bawipa Ai Israel A Ithnak

¹ Aw Jerusalem, fa nai lo nucing bang isi. Ikhalselai tun tu ang tulai au in la sa tu. Tun tu a pasal in a zam awng lomi nupang tahin fate tam deuh nai tuh isi.

² Na ponhlam kauruai deuh tu! Pon penhnak ri sauruai tulai, a khemte kho deuh in bawn tu;

³ Na ramri tu na ram cingkim ah kauruai tu; A dang miphunte ai khurhnak na ram heh na miphunte in co leh tuh i. Tunai a khing siksek khuate tu minung dim leh tuh i.

⁴ Zaikhai lau mah, zak na thi tuh nawn lo i; Mualpho in um leh tuh nawn lo isi. Nupui dawnniu na i laiah na zuangzamhnak le hmaitong isi ai thinhnawm lungsia ai na umhnak khiah hih tuh nawn lo isi.

⁵ Na semsuahtu a hming Cungnungber Bawipa tu na pasal bang i tuh i. A Thianghlimmi Pathian, Israel ai Pathian in na o tuh i. Amah tu laivum pumpuhluk uktu i.

⁶ Aw Israel, nupui dawnniu bang isi, A pasal ai mahnak le thinhnawm lungsia ai a ummi nupang bang isi. Ikhalselai Bawipa in a hnenah na ko leh ai,

⁷ “Camkhatniu song na khek ing; I ithnak a thuk manin na fehpui leh tuh ing.

⁸ Can comniu song i thinraw in khat lam hoisan ing; Ikhalselai kumzangza in a khomi i ithnak tu na hmuh tuh ing,” tiin ti i. Na otu Bawipa in ti i.

⁹ Laivum ah tilawi tlungruai tuh nawn lo ing, tiin Noah san ah thu na tiam awng zo ing. Tun tu ning vumah thinraw tuh nawn lo ing, tiin thu ning kham ing. Na cawh tuh lo ing, hau khai na hau tuh lo ing.

¹⁰ Mualtlangta khai min sio khalselai, i ithnak tu bo tuh awng lo i. Na pe tuh ing ti ai i thukhamhnak daphnak tu khimruai tuh ngiode ing,” tiin na ittu Bawipa in ti i.

Jerusalem Thar

¹¹ Bawipa in, “Aw Jerusalem, bawmtu nai lo harsa tuartu khuapui, hnemtu aisu khai nai lo isi. Na innhamte tu lung mankhung in saleh tuh ing.

¹² Na ralvilhnak innsangte tu ruby lung mankhung in, na kotkate tu mai bangin a lingmi lung mankhung in, na cingkim bangkhangte tu lungvar in saleh tuh ing.

¹³ “Na minungte tu kaimah rori in zirh tuhai, daphnak le khangsohnak pe tuh ing.

¹⁴ Dikcanghnak le phathnak in na hatruai tuh ing; Nauneh le thinlauhnak in na luat tuh i.

¹⁵ Midang in na tawng lekhaw i thu loin na tawng i tuh i. Na tawngtu aisu ita inkhai sung tuh i.

¹⁶ “Pum zap ai ralthuam a bawntu pumsutu pa tu kaimah in bawn ing. Mirekhnak ah ciami ralthuam a hmangtu ralkap pa a bawntu khai kaimah ing.

¹⁷ Ikhalselai zaibang ralthuam bawnhnak inkhai na ngah tuh lo i; Sual na puhtu ponkam hmuahhmuah sawn ben tuh sio isi. I cengfate tu ṭan tuhai nehhnak pe tuh ing,” ti i. Bawipa in rel zo i.