Isaiah 52 - Zanniat Bible

Pathian In Jerusalem O Tuh I

¹ Aw Jerusalem, a thawmlian ai a hatmi khua cang leh tu! Aw Pathian ai khuapui thianghlim, A mawimi in thuam dun tu! Pathian ling lotute tu na kotka songah lut leh tuh nawn lo i.

² Aw Jerusalem, luat tuhang! Laivut lakin tho tulai na tohkham ah to tu. Aw sal ai a tangmi Zion mite! Amahte penhnak cikcinte tu hawk tuhang.

³ Bawipa in a minungte hnenah, “Ningmah laihnak tuhin paisa zaikhai pe lo i, Ikhalselai sal ah cang i. Ningmah tlanhnak tuhin zaikhai pe tuh lo i, A lovang in ning luat tuh i.

⁴ A hlanah Egypt ramah um i si ai mikhual ah ning cang i. Leh hnuaah zai thula rin um loin Assyria in ning cawh i.

⁵ Tun tu Babylon ah ciabang thotho in cang leh i; Ziang thu um loin salpom mi ah ning cang i. Ning uktute tu puarthau in tluangkhawng ai Kaimah zohsuamtute i.

⁶ Ikhalselai can hleng tuhai Kai tu Pathian ngaingai ing ti ling tuhin ning hnenah a pongtu heh kaimah ing ti khiah ling tuh i si,” tiin ti i.

⁷ Tlang vuman kawi ai, Luathnak le daphnak thuthangpha a phuangtu ai ke tu zaitlukin mawi i? Zion hnenah nehhnak thuthan ai “Ning Pathian tu Kumpibawi i!” ti i.

⁸ Khuapui a kiltute tu au tlang i, Lungawi in hmunkhat ah au dekdo i! Zion ah Bawipa kawi leh zo i, ti khiah amahte mit rori in hmu i!

⁹ Aw Jerusalem ai hnawmborhte, Lungawi aipuang in au tu ih! Bawipa in a khuapui tu hup i, A minungte tu hnem i.

¹⁰ Bawipa in a huham thianghlim suah tuh i, A minungte o tuh i. Laivum pumpuhluk in hmu tuh sio i.

¹¹ Suak tu ih! Babylon tu hlum tu ih! Biakinn thilri a awhtute! Thil zarh zaikhai dai mah ih; Thianghlim niu in um tu ilai Hemi khuapui khiah hlum tu ih.

¹² Tun ṭum tu ngaihhlah in tlan kul tuh lo i si; Raltlan bangin tlan kul tuh lo i si. Bawipa ning Pathian in ning hoi tuhai ning hnua ning hmai in ning kil tuh i.

Bawipa Ruaihtu Tuarhnak

¹³ Bawipa in, “Sik tu, I ruaihtu khiah a naperhnak ah hlawhtling tuh i. Mi ai upat bermi i tuh i.

¹⁴ Ikhalselai a hmuihmel hnawm ai minung rin a bang lo fangin tu mi tampui ngaihsunur tlang i.

¹⁵ Miphun tampui in a sik fangin ngaihsunur tuh i, Kumpibawi tampui khai khuaruahhar in pong tuh zaikhai ling tuh lo i. A sik tlang fangin a hlanai amahte ling awng lohnak ling tuh i,” tiin ti i.