Isaiah 51 - Zanniat Bible

Jerusalem Hnemhnak Thu

¹ Bawipa in, “ohnak a daihtute, i ngai tucuk ih! I bawmhnak daih in a kawitute, Ning suakhmun lungpui khiah ruat tu ih, Amahte in ning laihnak lungto khiah!

² Ning pu Abraham le ning tetu Sarah khiah ruat tucuk ih. I ko laiah Abraham tu fate nai lo i. Ikhalselai hmuifu pe ai fate pe ing. A tesinfate tu mi tampui ah bawn ing.

³ “Jerusalem vumah ngaihharhnak nai tuh ing. Siatsuah siohnak a khua ramai a umtute vumah. A ram tu nelrawn ah cang napui vuandum ah cangruai leh tuh ing, Eden ai i dahhnak vuandum bangin. Lungawihnak le thinnuamhnak um tuh i, I hnenai anghnak le thangphathnak in dim tuh i.

⁴ “Aw i minungte, i ngai tu ih; I ponghnak heh ngai tu ih. Miphun hmuahhmuah hnenah I thuzirhhnak hlengruai tuh ing. I dante tu amahte caah tleuhnak i tuh i.

⁵ Rang ngai in kawi tuhai o tuh ing, I mi nehhnak tu nong zo i. Miphun hmuahhmuah kaimah rori in uk tuh ing; Ram hlapuite in kaimah kawi tuh khiah umlam tlang i. I ohnak tu umlam in iang tlang i.

⁶ Vanvum khai hlir tu ih! Laivum heh cuan tu ih! Van khiah maikhu bangin pai tuh i; Laivum heh hnikpon hlun bangin her tuh i; Cen mi zongzong thothi bangin thi tuh sio i. Ikhalselai i mi nunohnak tu kumzangza tham tuh i; I mi nehhnak tu kumzangza in kho tuh i.

⁷ “Dikcanghnak a lingtu ningte, i ngai tu ih; I zirhhnak thinlung songah a dahtute! Midang in na hring ai zoh na suam ta inkhai zaikhai lau mah ih!

⁸ Ciabang minungte tu Hnikpon mot bangin bo tuh i. Ikhalselai i mi nunohnak tu kumzangza hrang i tuh i. I mi nehhnak tu catloin kho tuh i,” ti i.

⁹ Aw Bawipa, tho tulai kin bawm tu! Na hathnak suah tulai kin o tu! Hlanlai ai na suak awng bangin suak leh tu. Tipuithuanthum rulhreng Rahab a rektu le a sattu heh nangmah isi.

¹⁰ Tifingriat a kangruaitu le na ohnak tepawl fehsuak thil tuhin ti lakah lampui a bawntu heh nangmah isi.

¹¹ Na ohnak tepawl tu Jerusalem ah, lungawi aipuang in, la sa kong le au kongin hleng tlang tuh i. Kumzangza in lungawi tuhai thinhnawmhnak le lungsiahnak in kumzangza in luat tuh i.

¹² Bawipa in, “Na hatruaitu heh kaimah ing. Zaimanin hampa bangin a san com ai a thi thai minung tu ning lau hnelhno i?

¹³ Ningmah a bawntu Bawipa, Vanvum khai a pharhtu le lailung ai hamtohhnak a dahtu Pathian khiah hai tlang zo i sim? Zaimanin na naunehtute ai thinrawhnak le Ningmah siatsuah tuh a tumtute heh hlawng biakbo in kih i si? Amahte thinrawhnak in zaikom inkhai ning dap thil tuh awng lo i!

¹⁴ Tunai thawngtotute tu a rai hlanah luat tlang tuh i, Amahte nun sau tuhai a duhzah in aih tuh rong ngah tuh i.

¹⁵ “Kai tu Bawipa ning Pathian ing. Tifingriat tu kaimah in phawr ai A tilepte tu hukruai dekdo ing. I hming tu Hmualnaiber Bawipa ing.

¹⁶ Vante khai pharh ai laivum ai hamtohhnak khai Kaimah in bir ing. Jerusalem hnenah, ‘Nang tu i minung isi! I thuzirhhnak pe zo ai I kut in na hup ing,’ ti ing,” tiin ti i.

Jerusalem Tuarhnak Dap Zo I

¹⁷ Aw Jerusalem, phawk tuhang! Phawk tulai tho tuhang! Bawipa in a thinraw in na dingruaihnak cawhhnak khuat heh ding zo isi. A holnawi tianin ding ai na sawnruai zo i.

¹⁸ Na konghoitu aisu khai um lo i. Na minung lakah a kut san in Na thotu aisu khai um lo i.

¹⁹ Bawngsiahnak phun hnih tawk isi; Raltawnghnak manin na ram tu hnawm sio ai, Na minungte tu rong loin ro sio i. Na ninghiotu aisu khai um lo i.

²⁰ Lam kingkawn cangcang ah na minungte tu helhep in leu tlang bial i. Thangtohtu ai awkhnak kiho bang i. Pathian ai thinrawhnak ru tawk tlang i.

²¹ Harsahnak a tuartu Jerusalem mite, Zuri bangin a sawn hnelhnotute,

²² Bawipa ning Pathian in ning ṭan ai ning hnenah, “I thinraw in i pehnak khuat tu ning kut songin lang leh hnelhno lai ing. Ning tluruaitu zu heh ding kul tuh nawn lo ihang.

²³ Ningmah ning naunehtute, Lampui ah ning tluruaitute hnenah, Hnawmborh fon bangin ning fontute hnenah ciami khuat khiah pe tuh ing,” tiin ti i.