Isaiah 44 - Zanniat Bible

Bawipa Lek Pathian I

¹ Bawipa in, “Aw Israel, i cengfa, I relhnak, Jacob ai tefate, ngai tu ih.

² Kai tu na semsuahtu Bawipa ing. Na nunhnak a sem sawng in na bawm awng zo ing. Zaikhai lau mah; i cengfa isi. I rilhnak, i ithnak isi.

³ “Ti a halmi ramah ti pe tuh ing; Nelrawn ah ti luangruai tuh ing. Ning fate vumah i rauhla burh tuhai Ning tesinfapar vum ahkhai I hmuifu burh tuh ing.

⁴ Pha ngai ai ti a ngahtu hampa bangin khang tuhai, Runpui kamai nempan kung bangin hnum tuh i.

⁵ “Pakhat hnua pakhat mi in, ‘Kai khai Bawipa ai minung ing,’ ti tuh i. Israel mite khawm tuh betbo i. Amahte ban vumah Bawipa ai hming ngan tuh ṭen ai, Pathian ai minung ah siar dun tuh i,” ti i.

⁶ Israel a uktu le a huptu Bawipa, Cungnungber Bawipa in, “Kai tu hmasaber le hnuataber ing; Kaimah siarlo Pathian dang um lo i.

⁷ I bawnhnak a bawn bentu aisu tal um aw im? Can a hampan in a tawphnak tian, Thil a cang tuhhnak hmuahhmuah a relciatu um awm?

⁸ I minungte, zaikhai lau mah ih! Khuahlanlai in tun san tian a cang tuhhnak hmuahhmuah hlanvom in rel cia zo ing; Ciami thu ning ling manin kaimah thulingpuitu i si. Pathian dang aisu tal um aw im? A hat ngai Pathian, i ling awng lohnak tang um aw im?” tiin ti i.

Milim Bia Zaisiar Lohnak

⁹ Milim a bawntu minungte tu zaikhai ilo i; cen amahte uarhnak le a songloihhnak a khuavangte khai santlai lo ciang i. Hemi khuavang a biatu le a upattu heh mivoi le mitcawte i ai zakthihnak tawk tuh i.

¹⁰ Bia tuhin thir in khuavang bawn heh zaikhai hnempui lo i.

¹¹ Ciami khuavang a biatu hmuahhmuah heh zakthi leh tuh i. Milim a bawntute tu minung lek i. Zaikhai ilo i. Kawi tu selai amahte thukhanhnak hmunah ding tucuk seh. Lau tuhai zakthihnak tuar tuh i.

¹² Pumsutu pa in thir tan khat lang ai maivam songah vamruai i. A hat ngai a ban in haibul lang ai pianzia nai tianin su i. Ciatih ai a perhnak ah rikam i, a ti hal ai cawl ngai i.

¹³ Cen lettama pakhat in zanthing teh i. Miphiu in zuk pianzia suai i; yibaw ṭhu ai a lettama thilri in per i. Biakinn songah dah tuhin minung pianzia in bawn i; minung pianzia mawi ngai bawn i.

¹⁴ Ciami bawn tuhin cedar thing maw, hlokhli thingkung maw, farthing maw tupui songin vawng ai hmang i. Ihlahle cedar thing bir ai ruah in khangruai tuhin iang i.

¹⁵ Minung in thingkung a hrek tu tih thing tuhin hmang ai a hrek tu milim bawnhnak tuhin hmang i. Thing a hrek in maisem ai a khualumhnak tuhin ai kong in sang khai em i. A dang a hrek in milim bawn ai bia i;

¹⁶ Zanthing hrekkhat tu mai in sem i; sa khai em in ai ai kham ngai i. Mai aai ai, “Lum ngai i nuam ngai i, mai phadan tu! ti i.

¹⁷ Zanthing hrekkhat in milim bawn i. A hmaiah ut ai bia i. A hnenah, “Nangmah heh i Pathian isi. I o tu hram law,” tiin sawngen i.

¹⁸ Ciabang minungte tu a voi ze ai ziang bawn i ing ti rin ling lo i. Thutak le thuhman lamah mitcaw ai a thinlung pit i.

¹⁹ Milim bawntu in, “Zanthing a hrek tu mai in tai sio ing. Mailing vumah sang le sa em ai ai ing. A dang zanthing tu milim ah bawn ing. Ciami zanthing tankhat hmaiah tunin ut hnelhno ing!” ti ruathnak le ngaisunghnak tlawmniu rin nai lo i.

²⁰ Vutkuang ai bangin sullam nai lo i. A thinlung voi in lampeng ah hoi ai bawm thil tuh nawn lo i. A kut in a awhhnak milim tu pathian i lopui ngawn i, ti rin ling thil nawn lo i.

Bawipa Tu Semsuahtu Le Otu I

²¹ Bawipa in, “Aw Israel, hemi thilte heh hih tu ngio; I na ruaihtu i si ti khiah hai mah. I na ruaihtu i tuhin na semsuah ai, Zaikom inkhai na hai tuh lo ing.

²² Na sualhnak tu mairo a lan bangin lanruai zo ing. I hnenah kawi leh tu; Na otu heh kaimah ing,” tiin ti i.

²³ Aw vante, lungawi in au tu ih! Lailung a thukhmun tepawl, au tu ih! Tlang le tupui song zanthing hmuahhmuah khai lungawi aipuang in au tu ih! Bawipa in a thawmlianhnak larruai in A minung Israel o zo i.

²⁴ Bawipa in, “Kai tu Bawipa ing; na semtu le otu ing. Kai tu Bawipa ing; thil hmuahhmuah semsuahtu ing. Vante khai kaimah lekin pharh ing; Lailung i bawn fangin aisu inkhai i bawm lo i.

²⁵ Kutrin sikthiamte tu mivoi ah bawn ai, Arsi sikthiamte ai ponka tu thudon ah cangruai ing. Mifimte ai ponka tu el ai, Amahte fimhnak tu voihnak i ti larruai ing.

²⁶ Ikhalselai i cengfa ai a cang tuhhnak thil rel cia ai, i tumtekhnak phuang tuhin palai hlat fangin cen, Ciami a relhnak le i tumhnak khiah khimruai rori ing. Jerusalem hnenah, ‘Minung um leh tuh i,’ tiin ti ing. Judah khuapui hnenah, “A thar in salehhnak i tuh isi,’ ti ing. Hemi khuapuite tu hnawmborh pumhnak songin ding leh tuh i.

²⁷ Thupe ai Tipuithuanthum cangruai ing.

²⁸ Cen Cyrus hnenah, “Nang tu kaimah tumrul in uktu tuh isi. Bawn tuh i daihsahhnak bawn tuh isi; Jerusalem saleh tuhin thupe tulai, Biakinn ai innham pan leh tuhin thupe tuh isi,’ ti ing,” tiin rel i.