Isaiah 43 - Zanniat Bible

Pathian In A Minungte O I

¹ Aw Israel, nangmah na bawntu Bawipa in, “Zaikhai kih mah na o tuh ing; Na hming in na ko zo ing kaimah ai isi.

² Ti thuk ngai songah na vak inkhai na hnenah um tuh ing. Na harsa tawkhnak in na neh tuh lo i. Maiko songah feh silai khai na kang tuh lo i. A siakha harsahnak inkhai na urruai tuh lo i.

³ Zaimantifangin kai tu Bawipa ning Pathian ing. Na otu, Israel ai Pathian Thianghlim ing. Nangmah luatruai nuam in Egypt hnawl tuh sawn ing. Ethiopia le Seba khai zangtak tuh sawn ing.

⁴ Na nunhnak o nuam in miphun tampui hnawl tuh sawn ing; Zaimantifangin nang tu kaimah caah na songlawi i. Na it ngai ai upathnak na pe ing.

⁵ Zaikhai lau mah na hnenah um ing. “Lamhlapui nisuahhnak le nitlahnak in, Na minungte hoi tuh ing.

⁶ Amah hlat tuhin sak lam heh rel tuhai, Amah khit tuh nawn loin hlang lam heh ruai tuh ing. Ram hla puipui in i minungte tu let tuseh. Laivum khuahacang in tlung tuseh.

⁷ Kaimah ai minungte i ai, songlawihnak i petu tuhin i semsuahhnak mite i,” ti i.

Israel Tu Bawipa Ai Thulingpuitu I

⁸ Pathian in, “I minungte tu thukhanhnak zung ah ko tu ih; Mit nai napui mitcaw i. Bil nai napui nangong i.

⁹ A dang miphunte tu thukhanhnak zung ah ko tu ih; A khuavangte lakah hmai lam thurelthaitu um aw im? Tunai thil canghnakte heh aisu in rel awng cia i? Hemi khuavangte in kin relhnak tu hman ai Kin thu tu thudik i ti larruaihnak tuhin thulingpuitu suahpui tuseh.

¹⁰ “Aw Israel mite, ningmah heh i thulingpuitu i si; Kaimah i na ruaihtu phun in i rilhnak mite i si. Ciatihin kai tu i ling tuhai i sang tuh i si; Kaimah ian Pathian ing ti khiah i lingthiam tuh i si. Kaimah siar lo Pathian dang um lo i; Um awng lo ai um tuh awng lo i.

¹¹ “Kaimah pakhat lek Bawipa ing. Na o ben thaitu heh kaimah ian ing.

¹² A cang tuhhnak rel cia zo ing; Cen nangmah bawm tuhin kawi ing. Ciabang ai a bawntu ramdang khuavang um lo i; Ningmah heh i thulingtute i si.

¹³ Kai tu Pathian ing ai catloin i tuh hlen ing. I huham songin aisu khai luat tuh lo i. I bawnhnak tu aisu inkhai thleng thil tuh lo i,” tiin ti i.

Babylon In Luathnak

¹⁴ Israel ai Pathian thianghlim, na otu Bawipa in, “Nangmah luatruai tuhin Babylon ah ralkapte hlat tuh ing; Amahte khuapui kotkate siatbal tuh sek ing, A minungte auhnak aw tu kaphnak ah cang tuh i.

¹⁵ Kai tu Bawipa ning Pathian Thianghlim ing. Aw Israel, na semsuahtu ing ai, Kai tu ning kumpibawi ing,” tiin ti i.

¹⁶ Hlanlai ah Bawipa in, Tifingriat songin lampui bawn i. Tiver lakah lampui umruai ing.

¹⁷ A thawmlian ngai ralkapbur tu tlu ai tho nawn lo i; Siphuhleng le siphuh vum ralkapbur tu tlu ai tho nawn lo i. Maifar kin dit bangin hmit tlang sio i.

¹⁸ Ikhalselai Bawipa in, “Hnua lam thil lek ngaisung mah ih; Hlanlai thula ian ruat mah ih.

¹⁹ Thil thar i bawn tuhhnak phatak niu in hlir tu ih. Tun ahkhai um hnelhno hang ti hmu tuh i si. Hampalak ramkhing ah lampui bawn tuh ing, Ciata ah ningmah caah ti luangruai tuh ing.

²⁰ Hampalak ramsa inrin i kihzah tuh i; Mehleng le kalauk vaniu in i thangphat tuh i, I rilhnak i minungte caah Nelrawn ai rawnti bangin i luangruai fangin!

²¹ Kaimah ca ai i bawnhnak miphun i; Kaimah thangphathnak la in sa tlang tuh i!” tiin ti i.

Israel Ai Sualhnak

²² Bawipa in, “Aw Israel, ning biahnak tu kai i bang hlah ing; Kai tu ning in i luah heh i sin!

²³ Maitai hibawlhnak ai tuu heh i hnenah koih tlang lo i si; Ning sazarh hibawlhnak in ning cawimawihnak tu Kaimah ilo ing. Thil pe tuh ning ngen in thil ning ritruai lo ing. Rimhmui ning ngen in thil ning ritruai lo ing.

²⁴ Kaimah caah rimhmui lai lo i si; Ning sumhnam ai thau in i khamruai fawn lo i. Ning sualhnak in thil i ritruai ai, Thil pha lo ning bawnhnak in thin i cawlruai i.

²⁵ Cia bang inapui, ning sualhnak a phiat siotu Pathian tu Kaimah thotho ing! Kaimah imanin he bangin bawn ing. Ning mawhhnak tu hih tuh ngio lo ing.

²⁶ Thukhanhnak zung ah feh tuh ising; Mi mawhhluk tuh ning naihnak koih tucuk ih. Ning felhnak larruai tuhin ning thu tu rel tucuk ih!

²⁷ Ning pu le ning pate sual awng i; Ning hotute khai i vumah sual zo i.

²⁸ Ning ram uktute in I hmun thianghlim ningrimtiar i; Ciamanin Israel vumah siatsuahhnak hlengruai ing; I minungte midang zohsuam tuhin a bawntu heh Kaimah ing,” tiin ti i.