Isaiah 42 - Zanniat Bible

Bawipa Ai Cengfa

¹ Bawipa in, “I cengfa tu heta ah um i; Ani tu i hatruaihnak le i rilhnak i, A vumah lung i awi i. I rauhla in dimruai zo ai miphun hmuahhmuah hnenah thu dikcang hlengruai tuh i.

² Au tuh lo ai a aw khai sang tuh lo i; Lampui ahkhai cawm ngaingai in thu rel tuh lo i.

³ Tlu ai a ek dawn phaikung khiah ek tuh lo i, A hmit dawn maikhuat khai hmit tuh lo i. Mi zongzong hnenah thudik hlengruai tuh ngio i.

⁴ Thinpit tuh lo ai a thin khai nau tuh lo i; Laivum ah thudik lengruai tuh i. Lamhlapui ramte an a thuzirhhnak heh umlam tuh i,” tiin ti i.

⁵ Pathian in van khai semsuah ai pharh i; Laivum le nunhnak nai thil hmuahhmuah bawn i. Minung hnenah nunhnak le haihawh pe i. Bawipa Pathian in a cengfa hnenah.

⁶ “Bawipa kaimah in na ko ai huham na pe ing, Laivum ah thudik a lenghnak tuhin. Nangmah songin mi zongzong thawn thukhamhnak bawn tuh ing. Nangmah songin miphun tampui hnenah tleuhnak hlengruai tuh ing.

⁷ Mitcawte ai mit tu varruai tulai, A thimmi thawnginn songah a totute tu luatruai tuh isi.

⁸ “Kaimah ian heh Bawipa na Pathian ing. I huham tu a dang khuavangte zem tuh lo ing, I songlawihnak khai milimte sum tuh lo ing.

⁹ Hleng tuh i tiin i relciahnak tu Hleng ngaingai zo i. Tun tu thil thar na rel tuh ing, A hleng hlanin ning rel cia tuh ing,” ti i.

Thangphathnak La

¹⁰ Bawipa hnenah la thar sa tu ih; Laivum pumpuhluk in amah thangphat la sa tu ih. Tipui vumai a umtute in amah thangphat tu ih. Tipui songai a umtute inkhai thangphat tu ih. Lamhlapui ai umtute inkhai thangphat tu ih.

¹¹ Nelrawn le nelrawn khuate in Pathian thangphat tuseh. Kedar mite inkhai thangphat tuseh! Sela khua ai a umtu in tlangsang vuman lungawi in au tu dekdo seh!

¹² Lamhlapui ai a umtute in Bawipa hnenah thangphathnak le songlawihnak pe tuseh!

¹³ Bawipa tu mihat ber bangin vak i; Raltawng tuhin ralring ai thatho ngai i. Raltawng tuhin au ai neh tuhin au dekdo i. A ralte hnenah a huham hmuh i.

Bawipa In A Minung Bawm Tuh I

¹⁴ Pathian in, “Can raipui dap niu in um zo ing; I minungte thusawn lo ing. Tun tu pan tuh ihang ing; Nau nai tuh nupang bangin ai ing.

¹⁵ Mual le tlangsangte siatsuah tuh ing; Hampa le thingkungte roruai tuh sio ing. Runpui phairawnte tu nelrawn cang thai in bawn tuhai, Cirhtite tu kangruai tuh sek ing.

¹⁶ “I minung mitcawte fehpui tuh ing; Amahte feh awng lohnak lampui in. A khuathimhnak tu tleuhnak ah thleng tuh ing; A hmai ai lampui bingbo heh nilruai tuh sio ing. Hemite tu bawn tuh tengteng ing.

¹⁷ Milim a rinsantute le Ciami milimte i pathian a titute heh zakthi tuhai mualpho tuh i,” ti i.

Israel Mite In Lingthiam Lo I

¹⁸ Bawipa in, “Ningmah naa ngongte, phatak niu in ngai tucuk ih! Ningmah mitcawte, nong niu in sik tu ih!

¹⁹ I cengfa tahin mit a caw sawn um thil tuh im? Palai i hlathnak tahin mit a caw sawn um tuh im?

²⁰ Aw Israel, na hmuhnak le na tawkhnak heh tam ze zo i; Ikhalselai nangmah caah zaikhai santlai lo i. Zahnak tuhin bil nai isi; Ikhalselai na za cianghnak ngaingai zaikhai nai lo isi?” tiin ti i.

²¹ Bawipa tu mi o tuh a hiamtu Pathian i; Ciamanin a dan le a thuzirhhnak khiah upat ai, A minungte inkhai upat tuseh ti daih i.

²² Ikhalselai a minungte tu mi in rok i; Lai kua songah khum ai, Thawnginn hlapui ah thup sio i. Thilri sut sah mi le rok sah mite i; Amahte humtu tuhin aisu khai um lo i.

²³ Hemi thula heh a lingtu aisu tal um aw i sim? Tun hnuaah tu phatak niu in ngai tlang tuh lo i sim?

²⁴ Israel heh mi roktute kut ai a petu heh aisu i? Bawipa amah i; Engsan ai a vumah sualhnak kin bawnhnak Bawipa i. A daihhnak bangin nung ben lo ising; A thuzirhhnak bangin hlun ben fawn lo ising.

²⁵ Ciamanin a thinrawhnak kin tuarruai ai, raltawng harsahnak kin tawkruai i. A thinrawhnak tu mai bangin Israel ram pumpuhluk kang i; Ikhalselai ziang cang thliahthlo i ti ling awng lo ising; Hemi hmuahhmuah in zaikhai kin zir ngahhnak um cuang lo i.