Isaiah 41 - Zanniat Bible

Pathian In Israel Mite Thukham I

¹ Pathian in, “A hlapui ai um ramte, Dapkhep in um tlang tu ilai i relhnak ngai tu ih! Thurelhnak hmunah ning thu koih tu ih. Ning thula relhnak can ngah tuh i si. Kawi tu ilai aisu sawn hman i ti ruat tlang tuh ising.

² “Mi zongzong nehtu heh aisu in nisuah lamin hoi ini? A fehhnak hmuncang ah aisu in nehhnak pe ini? Miphun tampui le kumpibawi tampui vumah aisu in nehtu cangruai i? A neh mite tu laivut iselai ciatih bangin A ralvang in sat i! Fangkung ro khiah hli in a hmut bangin A conkiang in piakruai sek i!

³ Amahte khel lamin hnawh i, him ngai in feh tlang betbo i! Lai rin khing lo titlak in rang i.

⁴ Hetihin a ngaisungtu heh aisu ini? Laivum tluanthu in cang tuhin A tumtu heh aisu ini? Bawipa kaimah heh a hampan in um zo ing; Bawipa Pathian kaimah heh a tawphnak ahkhai um tuh ing.

⁵ “Lamhlapui ramte an i thil bawnhnak heh hmu zo i; Lau ngaingai ai thinlau in hlawng i. Ciamanin hmunkhat ah tawk dun i.

⁶ Kut zungthiamte khai bawm dun ai Pakhat le pakhat tha pe dun i.

⁷ Lettama in sui ertu hnenah ‘Sui bawn thiam ngai isi,” ti i. Milim ngil ngai in a ertu in Tlawngkhen a khenkoptu heh hnem i. Mi pakhat in ‘Na erhhnak tu pha i,’ ti ai Kho ngai in milim khiah amahte dahhnak hmunah tlawngkhen in khen i.

⁸ “Ikhalselai nang Israel i cengfa, Nang tu i ril zomi isi. I rual Abraham ai tesinfate isi.

⁹ Laivum tonghnak in na fehpui ing; Vanham tong in na ko ai, ‘Nang tu i cengfa isi,’ na ti ing. Na hnawl lo ing, na ril sawn ing.

¹⁰ Zaikhai lau mah, na hnenah um ing. Kai tu na Pathian ing, zai inkhai na lauruai maseh. Na bawm tuhai na hatruai tuh ing; Na hup tuhai na o tuh ing.

¹¹ “Na vumai thinrawtute tu Mualpho tuhai zakthi tuar tuh i. Nangmah na tawngtu heh thi tuh i.

¹² Catloin na tawngtute tu Laivum in pairal tuh i.

¹³ Kai tu Bawipa na Pathian ing; Na tha hatruai ai, ‘Zaikhai kih mah; na bawm tuh ing,’ tiin na ti ing,” ti i.

¹⁴ Bawipa in, “Aw Israel, miphun cikniu le mi ṭawnṭai isi. Ikhalselai zaikhai kih mah, na bawm tuh ing. Israel ai Pathian Thianghlim kai tu nun otu ing.

¹⁵ Nang tu fang talhnak fung, a thar, a sandir kam naimi bangin na bawn tuh ing. Tlangsangte cil tuhai hnawm tuh i; Tlangmualte khai laivut ah cang tuh sio i.

¹⁶ Van ah hlip tuhai Hlivua in hmut tuh sio i; Hlisia in khuahacang ah piak tuh sio i. Ikhalselai kaimah heh na Pathian imanin nang tu na ang tuh i. Israel ai Pathian Thianghlim tu thangphat tlang tuh i.

¹⁷ “I minungte mangbang vansang in um ai Tihal in a dang ro fangin, Bawipa Kaimah in a sawngenhnak khiah ngai tuh ing. Israel ai Pathian kaimah in zangtak tuh awng lo ing.

¹⁸ Tlang ro lakin rawnti put tuhai Phairawn in cirhti fim luang tuh i. Nelrawn tu cirhti in dimruai tuhai Ramro tu cirhti luanghnak ah cangruai tuh ing.

¹⁹ Nelrawn ah cedar thing poruai tuh ing, Lawithing, hlenhmui le olive thing khai poruai tuh ing. Lenpal ah tupui umruai tuhai ciami tupui ah farthing, hualthing le tufar po tuh i.

²⁰ Ciami heh mi in a hmu fangin Bawipa kaimah ai bawnhnak i ti khiah ling tuh i. Israel ai Pathian Thianghlim in hemi hmuahhmuah heh cangruai i ti khiah lingthiam tuh i,” tiin ti i.

Bawipa In Khuavangte Zuam I

²¹ Israel kumpibawi, Bawipa Pathian in; “Miphun hmuahhmuah ai khuavangte, Ning thula rel tucuk ih! Ning thiam tawk in rel tu ih!

²² Heta ah kawi tu ilai thil cang tuhhnak rel cia tu ih; Thil a cang zohnakte ai a sullam i rel tucuk ih. Cen hmai lamah thil canghnak a um fangin a sullam kin lingthilhnak tuhin, akontih in khim thil tuh i, tiin relfiang tucuk ih.

²³ Hmai lamai a hleng tuhhnak thula i rel tu ih; Ciatihin khuavang ngaingai ning ihnak ling tuh i ing. Thil pha pakhat hnih tal bawn tucuk ih, Ihlahle thihhnak thupoi hlengruai tucuk ih. Kihhnak le tihikhnak in i dimruai tucuk ih.

²⁴ Ningmah ituseh, ning thil bawnhnak ituseh, thudon lek i si! Ningmah ning biatute khai ningdulkul i fawn i.

²⁵ “Nisuah lamai a ummi pakhat ril zo ing; Sak lam in tawng tuhin hoi tuh ing. Mi uktute tu nawngbek bangin fon i, Bel bawntu in nawngbek a fon bangin fon dekdo i.

²⁶ Hemi thil cang tuh i, tiin kin relciathaitu aisu tal um aw i sim? Ning hman i, ti tuhin aisu tal um aw i sim? Ciabang a pongtu aisu khai um lo i si; pon kamkhat khai pong lo i si, Ning ponkam a ngaitu pakhatniu bangkhai um lo i.

²⁷ Kaimah Bawipa heh Zion hnenai hemi thuthang a phuangtu hmasaber ing. Jerusalem hnenah palai hlat ai, ‘Na minungte kawi tuh i! Let tuh i,’ tiin i relruai i.

²⁸ Ning khuavangte i sik fangin Pakhat bang inkhai zaikhai pong lo i. I thuzawthnak a sawn bentu aisu khai um lo i.

²⁹ Hemi khuavangte tu thulovang ciang i; A bawn benhnak zaikhai um lo i. A milimte tu ṭawnṭai le huham nai lo ciang i.