Isaiah 40 - Zanniat Bible

Umlamhnak Pongkam

¹ Kin Pathian in, “I minungte hnem tu ih, I minungte hnem tu ih;

² Jerusalem khua mite thape tu ih. A rai ze tuar tlang zo ai amahte sualhnak tu ngaithiam zo i, tiin rel tu ih. Amahte sualhnak hmuahhmuah manin A roh ze in cawh ing,” tiin ti i.

³ Aw thang ai, “Bawipa caah Hampalak ramkhing ah lampui bawn tu ih, Kin Pathian ca nelrawn ah lampui sel tu ih!

⁴ Horkuam hmuahhmuah silh tusek ilai, Tlang sang hmuahhmuah cek tusek ih. Tlangte tu zawllai ah cang tuhin, Lailung bingbo hmuahhmuah rual ngai in remm tuh sio i.

⁵ Ciafangin Bawipa ai huham lar tuhai, Mi zongzong in hmu tuh i. Bawipa amah rori in thukham zo i,” ti i.

⁶ Aw in, “Au tu,” i ti i. Kai in, “Ziang au tuh ing?” tiin zawt ing. “Minung tu hampa bang i; Hampalak papar tahin rai deuh nung cuang lo i.

⁷ Hampa tu vawi ai papar tu ria i, Bawipa in a vumah hlivua zuangruai fangin! Minung tu hampa tahin hat deuh cuang lo i.

⁸ I, hampa khiah vawi ai papar tu ria i; Ikhalselai Pathian thu tu kho ngio i,” ti i.

⁹ Aw Jerusalem, tlang vumah kai tulai, thuthangpha rel tu. Aw Zion, cawm ngai in au tulai, thuthangpha phuang tu. Rel tu, zaikhai lau mah. Judah ram khuapuite hnenah ‘Ning Pathian kawi lai i,’ tiin rel tu!

¹⁰ Bawipa tu a hathnak huham thawn Mi uk tuhin kawi lai i. A hum zohnak minungte khai fehpui i.

¹¹ A tuute tu tuukhal bangin kilkhawl tuh i; Tuu faniute khiah hmunkhat ah khawm in, A kut in cawi tuhai, A nu hnenah nuamniu in fehpui tuh i.

Santeh Thilh Lo Israel Ai Pathian

¹² Tifingriat heh a sum in teh bentu um nitur im? Van khiah a khap in a teh bentu tang um nitur im? Aisu in laipua vumai laivut heh a bawm songah thun ben sio nitur? Aisu in tlang sang le tlang mual heh cuai in teh ben nitur?

¹³ Hetihin bawn tu tiin Bawipa a rel thaitu aisu um nitur? A cukthaitu le ruathnak a pe thaitu tang um awm?

¹⁴ Pathian in aisu thuron awng i? Aisu hnenah fimhnak le lingthiamhnak si awng i? Thil bawndan tang aisu tal in rel awng i?

¹⁵ Bawipa caah miphunte heh zaikhai ilo i; Ti farkhat tluk fang i. Lamhlapui ai tikulhte khai, laivut tluk in zangniu i.

¹⁶ Lebanon tupui songai ramsa hmuahhmuah heh, Kin Pathian hnenah hibawl sel tuhin a tam ze ilo i. Tupui songai thingkung hmuahhmuah khai Maitai hibawlhnak zanthing hrang tuhin a tlawm ze lai i.

¹⁷ Laivum miphun hmuahhmuah heh Amah caah zaikhai ilo i.

¹⁸ Pathian tu ziang thawn santeh thil tuh ising? Zaibang i ti khiah akontih in rel thil tuh ising?

¹⁹ Kut zungthiamte ai bawnhnak milim, Sui ertute ai sui ai khuthnak, Ngun hleng songai tohhnak bang ilo i.

²⁰ Sui le ngun a nai lotu in A hnawm bai lomi thing ril tlang i. Kut zungthiam pakhat si tlang ai A tlu thil tuh lo milim pakhat bawnruai i.

²¹ Hmu lo i sim? Ling awng lo i sim? A raipui in rel cia ilo im? Lailung akontih in pan i ti khiah ling cia zo lo i sim?

²² Laivum le van pualam ah A kumpibawi le a tohkham vumah a totu in bawn i. A hnia ai minungte tu a mithmuh ah sirsing tia fang i. Van khiah pon bangin pharh ai Minung umhnak ah ponhlam bangin zar i.

²³ Amah in a hat ngai uktute heh tlokruai ai Thulovang in bawn sio i.

²⁴ Anite tu thingkung dawnniu, ham nai lo a suak sawng bang i. Cialak ah Bawipa in hli zuangruai i, Ro sio ai fangcang kuangro bangin hmut sio i.

²⁵ Pathian Thianghlim tu aisu thawn santeh thil tuh ising? Amah bangtu aisu tal um awm?

²⁶ Van khiah honsik tu ih! Ning hmuhnak arsi hmuahhmuah heh aisu in bawn i? Ralkapbur a ho bangin hemi arsite a hotu in Zaizah i, ti ling ai amahte hming ṭen in ko sio i. A huham tu a thawmlian ai Pakhatniu bang khai pai awng lo i.

²⁷ Aw Israel, zaimanin phuncam tlang ai Bawipa in kin harhnak kin ling sah lo i, Kin caah thil phatak niu in tawlrel lo i, tiin ti i si?

²⁸ Hmu lo i sim? Ling awng lo i sim? Bawipa tu kumzangza in a khomi Pathian i. Lailung hmuahhmuah a bawntu i. Ani tu thacawl le thabo in um awng lo i; A ruathnak tu ling ban tuh pawl ilo i.

²⁹ A cawltu le thabotute tu thahatruai leh i.

³⁰ Minote rin cawl tuhai tlangvalte khai a tha bo in sawn tuh i.

³¹ Ikhalselai Bawipa a rinsantu khiah A tha tlung leh tuh i. Muvanlai bangin ko pharh in zuang tuh i. Dawp khalselai cawl tuh lo i; Vak thliahthlo inkhai thabo in sawn tuh lo i.