Isaiah 3 - Zanniat Bible

Jerusalem khuasong Ai Buaihnak

¹ Tunai panin Bawipa, Cungnungber Bawipa in, minung ai rinsanhnak ber minung ituseh thilri ituseh Jerusalem le Judah in lang tuh sek i. Amahte rinsanhnak ber rong le ti,

² a mihatte le ralkapte, thukhantu le prophette, thurel thiam le kutrin sikthiamte,

³ ram uktu bawi le ralbawite, ram konghoitu le mitkher thiamte lang tuh sek i.

⁴ Bawipa in a ram tu naupang tuallengte ukruai tuh i.

⁵ Mi zongzong in amahte miathnak hrangah mi hmaisong nai tuh lo i. Minote in upate upat tuh lo ai minautate in a vumai bawite hmaisong tuh lo i.

⁶ Can hleng tuhai innsang pakhat songah a unau pakhat heh, “Nang tu sil tuh hnikpon tal na nai manin hetluk kin harsa can ah hotuber cang tu hram law,” ti tlang tuh i.

⁷ Ikhalselai ani in, “Ihlah e, ning hotu i tuh lo ing. Ning bawm thil tuh lo ing. I inn songah rong khai um lo i, hnikpon khai um lo i. Ning hotu tuhin i bawn mah ih,” ti tuh i.

⁸ I, Jerusalem tu a bo ihang! Judah khai sawn ruairo ihang! Zaizongza anite relhnak le a bawnhnak tu Bawipa ai daih lohnak lek i. A lar ngai in Pathian rori rin zohsuam i.

⁹ Mi hlaihdan a naihnak tu amahte caah siatsuahtu i tuh i. Sodom khua mite bangin zakthi nai loin sual tlang i. A bo ihang, hlaici a cinghnak khawm tlang leh ihang.

¹⁰ Ikhalselai midikcangte tu mi lungawi i tuhai anite lampui hmuahhmuah tluang tuh i. Amahte hlawhman tu ang ngai in ngah tuh i.

¹¹ Ikhalselai hrokhrawl mite tu a bo ihang; midang vumah a bawnhnak tu anite vumah hleng leh ihang.

¹² I minungte tu tangka puttute in cawh ai tangka kilsahtute in zawl i. Aw i minungte, ning hotute in ning hoisual ai akon lam feh tuh ti ling lo i si.

Bawipa In A Minungte Thukhan I

¹³ Bawipa tu a minungte thurel tuhin ralring i. A ralring ben fangin,

¹⁴ Anite uktu le hotute tu thurelhnak hmunah suahpui i. Anite hnenah, “Mi cabit vuan sut sek ai ning inn tu mifarah hnenin ning langhnak thilri in dim i.

¹⁵ I minung fonthilhnak le mifarahte ai covo sutthilhnak thu zaikhai nai lo i si. Kaimah Cungnungber Bawipa in rel zo ing,” ti i.

Jerusalem Nupangte Ralring Pehnak

¹⁶ Bawipa in, “Jerusalem nupangte a hngaldan heh sik tu ih. Anite tu puar ze in vancau in vak i. Zakthi nai loin pasal vum lek ah mitthak i. Mah le mah thupui roh le sang dun roh in vak ai amahte ke ai khithnak sengserel heh pauruai sulhso i.

¹⁷ Ikhalselai cawh tuh ing, a sam met sah tuhai lukolh in hlat leh tuh ing,” ti i.

¹⁸ Jerusalem nupang hnenin amahte uarhnak ber hlawnthilte Bawipa in a suthnak can hleng tuh i. Amahte lu le ke ai khaihhnak sengserel, a hawng le

¹⁹ a kut ai rukhnak ngunte lang tuh sek ing. Hmai huphnak pon paniu,

²⁰ lukhukte, a ban le a el ai a khithnak aicamhnak a khaihhnak bankhih le elpente,

²¹ amahte kutzung ah ruhnak kutruk le a hnar ai khaihnak hnarkhaihte,

²² a hnikpon phapha, pon le korfual le paisa bawmte,

²³ a padiar a hnikponte, pavuate, hawngvelhte le lukhukhnak pon paniu a sau ngaingai pawl heh sut tuh sek ing.

²⁴ Yihmui hmang tlang tuh nawn lo i, a rim sia tlang tuh ze sawn i; elpen phapha tumrul in rihual siava pawl hmang tlang tuh i; sam mawi ngaingai tumrul in lu kolh tlang tuh i; hnikpon pha bikbik tumrul in ponsia sil tlang tuh i; amahte mawihnak tu zakthihnak ah cang tuh i.

²⁵ Khuasong pasalte, mihat ber pawl rin ral kut in thi tlang tuh i.

²⁶ Khuapui kotkate kap tlang rung tlang tuh i. A khuapui tu hnikpon nai lo laipua lakah a totu nupang bang i tuh i.