Isaiah 25 - Zanniat Bible

Thangphathnak La

¹ Aw Bawipa, nang tu i Pathian isi; Na upat tuhai na hming thangphat tuh ing. Ngaihsunurkul thilte bawn zo isi; Kum raipui in na tumhnak tu Fel ngai in bawn sio isi.

² Khuapuite tu siatbal sek ai, Amahte kulhhnak ralvingte hnawmcan sek isi. Kin ralte ai sahnak kumpibawi innte tu, Zaikom inkhai saleh tuh nawn loin hnawm sek i.

³ Ram hat ngaingai ai minungte in, Nang tu thang na phat tlang tuh i; Ninghiohnak nai lo ramai khuapuite inkhai Nang tu na kih tuh ze i.

⁴ Mifarah le bawmtu nai lote na hnenah kawi ai Harsahnak can ah khai him tlang i. Hlisia a zuang fangin buan hmun pe ai, Ni sa fangin cawlumhnak nihlim pe isi. Khuasikcu ai hlisia bang i. Ninghiohnak nai lote in tawng i.

⁵ Ramro lakah nisan sa bangin; Ikhalselai Bawipa nangmah in Kin ralte tu dapruai ai; Ninghiohnak nai loin mi ai authawm tu tawpruai isi, Khuanim in nisa a dapruai bangin.

Pathian In Rong Ai Puai Bawn Pai I

⁶ Heta Zion Mual vumah Cungnungber Bawipa in lailung vum ramcang le miphuncang caah rong ai puai bawn tuh i. Ciami rong ai puai ahcen rong ur ber le cabit ur ber pe tuh i.

⁷ Hemi mual ah ramcang le miphun cang ai lungsiahnak tu mairo bangin lanruai tuh i.

⁸ Cungnungber Bawipa in thihhnak tu kumzangza in pairalruai tuh i. Mi zongzong in amahte mithli nul tlang tuhai lailung vum khuahacang ah minungte ai tuarhnak mualpho zakthihnak lang sah tuh sek i. Bawipa amah in rel zo i.

⁹ Ciami nia a hleng fangin aisusu inkhai, “Ani tu kin Pathian i! ani tu rinsan tlang zo ai kin o zo i! Ani tu Bawipa i! A hnenah kin rinsanhnak dah ai lungawi aipuang in um tlang ising; zaimantifangin kin o zo i,” ti tlang tuh i.

Pathian In Moab mite Cawh Tuh I

¹⁰ Bawipa in Zion Mual tu hup tuh i; ikhalselai fangcang kuangro dawm bawn tuhin a fon dekdo bangin Moab mite tu fonhnak tuar tlang tuh i.

¹¹ Tileuh tum bangin amahte kut dang tuh i, ikhalselai Pathian in anite tu nem tuhai amahte kut tu kuai tuh nai loin phum tuh i.

¹² Bawipa in Moab mite ai sahnak vingpui, sang ngaingai ai tianghnak ralvingte tu min tuhai laivut ah cang tuh i.