Isaiah 24 - Zanniat Bible

Bawipa In Lailungpui Cawh Tuh I

¹ Bawipa in laivum siatsuah tuh sek ai khing tuh sukso i. Laivum tu bungbaleh tuhai minungte piak tlang tuh sio i.

² Aisusu khai ituseh amahte tawkhnak bangran tuh sio i; suangbawite le mizapuite, salte le bawite, a laitu le a zuartute, paisa puttu le putu, milian le mifarahte amahte tawkhnak bang tlang tuh i.

³ Laivum pumpuhluk tu khoi tuh sek ai hnawm tuh sek i. Bawipa in rel zo ai a relhnak bangin cang tuh i.

⁴ Laivum khiah car ai vawi sek i; laivum pumpui tu thanau i; lai le van hnawmral sek i.

⁵ Mi in Pathian dan bal tlang ai kumzangza hrangah a bawnhnak thukham heh bal tlang i; ciatihin laivum ningrimtiar i.

⁶ Ciamanin laivum tu hnawm tuhin Pathian in cukcam i. Laivum mi in amahte sualman tuar tlang i. A nungtu tlawm deuhdeuh i.

⁷ Cabit kuangte vawi ai cabit har deuhdeuh i. Lungawi aipuang ngai ai a umtute tu lungsiahnak in dim i.

⁸ Nuam ngai in la a sa dehnak congcing le khuangte dap zo i.

⁹ Zu a ding inrin nuam ngai in la sa tlang thil nawn lo i; zu ai urhnak khai ling nawn lo i.

¹⁰ Khuapui songah zaizongza buai sio i; minungte tu luat nuam in inn songah khum dun i.

¹¹ Mite tu lampui ah ding tlang ai zu duh in au tlang i. Nuamhnak zaikhai um nawn lo i; nuamhnak tu ramsong in kumzangza hrangah hnawt zo i.

¹² Khuapui tu hnawm sio ai a kotkate khai bal sek i.

¹³ Lailung vum ram cangcang ciatihin i tuh sio i. Rongkhawm can bo ai olive kuang in olive thai sat in tloktiar sio ai pakhat khai tang lo ai a lang sek can thawn bang tuh i.

¹⁴ A tangsunte tu lungawi in la sa tlang tuh i. Nitlak lamai ai a umtute in Pathian a thawmlian zia phuang tlang i,

¹⁵ nisuak lamai a umtute in thangphat tlang tuh i. Tipui kam tluan ai a umtute in Israel ai Pathian Bawipa tu thangphat tlang tuh i.

¹⁶ Laivum ai a hla ber ram an rin Israel miphun, miphun dik, amahte thangphathnak la tu za tlang tuh ising. Ikhalselai kaimah ca ahcen umlam tuh um lo i. Kin bo deuhdeuh ai i taksa ruangpui in pin nawn lo i. Mizuartute in kin zuar zo thotho ai anite zuardan tu a ni a ni in roh amam i.

¹⁷ Aw laivum minungte, tihikhnak um i, khur thukpui um ai ningmah caah thangtoh cia in um i.

¹⁸ Tihikhnak in a tlantumtu heh khur songah tlok tuh i; khur in a tlantu heh thang in awk tuh i. Van in ruah a roh ngai in si tuhai laivum hamtohhnak hlin tuh sio i.

¹⁹ Lailungpui tu khing tuh i, khoi tuhai tlam tuh i.

²⁰ Lailungpui tu zuri bangin sawn tuhai hlisia lakai buk niu bangin tlu tuh i. Laivumpui tu a sualhnak in net zo i; tlu tuhai tho lehsal tuh nawn lo i.

²¹ Bawipa in vum lamai a ummi huham naitute le laipua vumai miukte a cawhhnak tikcucan hleng tuh i.

²² Bawipa in khur songai thawngtla bangin kumpibawite khawm tuh i. Anite cawh can a hleng hlanah thawnginn songah khum tlang tuh i.

²³ Hlapui thim tuh i; ni tlang tuh lo i; zaimantifangin cungnungber Bawipa tu kumpibawi i tuh i. Jerusalem khua Zion Mual in uk tuhai mizapui hotute in a songlawihnak huham hmu tlang tuh i.