Isaiah 19 - Zanniat Bible

Pathian In Egypt Cawh Tuh I

¹ Egypt caah a hlenghnak thu: Bawipa tu a rang ngai in mairo vumah to ai Egypt ramah kawi i. A hmaiah Egypt ai milimte tu hlawng tlang ai Egypt mite ai ralphahnak tu pairal sek i.

² Bawipa in, “Egypt ramsong ah mah le mah tawngdunhnak ralthoruai tuh ing; unau le unau tawng dun tuhai ompui le ompui khai ral dun tuh i. A hua dun ngai khua pakhat le pakhat tawng dun tuhai a ralduntu kumpibawite tu mi ukthilhnak huham daih in tawng dun tuh i.

³ Egypt mite ai tumtekhnak tu hnawm sah tuh sio ai amahte thinlung siaruai tuh i. Amahte milimte hnenah bawmhnak ngen tuh i; polte leng tuhai mithi rauhlate thuzawt tuh i.

⁴ Egypt mite tu misiava le mipuarthaute kut songah pe tuhai ninghio nai lo kumpibawi in uk tuh i. Cungnungber Bawipa Kaimah in rel zo ing,” tiin ti i.

⁵ Nile runpui ah ti tlawm tuhai nuamniu in kang tuh sio i.

⁶ A rawnti kakte tu nam tuh ze ai ro tuh sek ve i. Phaipeng le phaiphokte tu vawi tuh sek i.

⁷ Nile runpui kamai cinghnak rongkung hmuahhmuah ro tuh sek ai hlivua in hmut tuh sek i.

⁸ Nile runpui ai nga dawi ai pum a cawmtute hmuahhmuah in cawm ngai au tuh i; amahte sio le surte tu lang sah tuh sek i.

⁹ Ponthan bawntute thinnau tlang tuh i;

¹⁰ thiamtaktu le zungthiamte khai thinpit tuhai vansang tlang tuh i.

¹¹ Zoan khua ai hotute tu mivoi ciang i! Egypt mifimber pawl in voi thu forh i. Hlanlai kumpibawi le mifimte tumrul tuh i ing tiin akontih in kumpibawi rel ngam i si?

¹² Aw Egypt kumpibawi, akonah na mifimte um sio i? Cungnungber Bawipa in Egypt ca tumtekhnak a naihnak heh ning rel thil thai napui i!

¹³ Zoan le Memphis hotute tu mivoi ciang i! Amahte miphun konghoitu tuh napui hoisual tlang zo i!

¹⁴ Bawipa in thinlung buaihnak pe ai amahte thurelhnak khai buai sio i. Ciamanin Egypt in thilsual lek bawn ai zuri pa tu a mah ai awk vum lala ah a tlu bangin Egypt tu tlu hnelhno i.

¹⁵ Egypt ram songah milian ituseh, mifarah ituseh, miham ituseh, minauta ituseh a bawmthaitu aisu khai um lo i.

Egypt In Bawipa Bia Tuh I

¹⁶ Egypt mite tu nupang bangin a ralhut can hleng tuh i. Cungnungber Bawipa in amahte cawh tuhin a kut tung khiah hmu fangin tihik in hlawng tuh i.

¹⁷ Anite caah Bawipa in a ruatciahnak a hih lehsal cang fangin Egypt mite in Judah mite tu kih tuh ngio i.

¹⁸ Ciami can a hleng fangin Egypt khuapuite panga ah Hebrew pong hmang tlang tuh i. Ciata ai a umtute in cukcam in thu a kham fangin Cungnungber Bawipa hming in kham tlang tuh i. Khua pakhat tu, “Ni khuapui,” tiin ti tlang tuh i.

¹⁹ Ciami can a hleng fangin Egypt ramah Bawipa ai hming in puleng pakhat tiang tuhai Egypt ramri ah a hming in khanlung bir tlang tuh i.

²⁰ Ciamite tu Egypt ramah Cungnungber Bawipa um ai hnikhnaihhnak i tuh i. Ciata ai a umtute in naunehhnak tuar ai bawmhnak ngen in Bawipa a ko fangin anite otu tuhin Bawipa in mi pakhat hlat tuh i.

²¹ Egypt mite hnenah Bawipa tu lar tuh i. Ciafangin Bawipa tu kihzah tuh i, bia tlang tuhai a hnenah hibawlhnak le lehsawng koih tuh i. A hnenah thu kho ngai in kham tuhai amahte thukhamhnak bangin bawn tuh i.

²² Egypt mite tu Bawipa in cawh tuh i, ikhalselai cakruai leh tuh i. Amah lamah hoi tlang tuhai amahte sawngenhnak ngai sah tuhai cakruai leh tuh i.

²³ Ciami can a hleng fangin Egypt le Assyria karlak ah lampui um tuh i. Hemi ram hnih ai minungte tu bai niu in tlawng dun thil tuhai hmunkhat ah Pathian bia thil tlang tuh i.

²⁴ Ciami can a khim fangin Israel tu Egypt le Assyria thawn ṭang tuhai anite ram thum tu laivum pumpui hrangah hmuifu i tuh i.

²⁵ Cungnungber Bawipa in hmuifu pe tuhai, “Egypt i minung, Assyria i kut ai bawnhnak, le Israel i rilhnak, ning vumah hmuifu um tuseh,” ti tuh i.