Isaiah 17 - Zanniat BiblePathian In Syria Le Israel Cawh Tuh 1 Bawipa in, “Damascus tu khuapui i tuh nawn lo i; a hnawm siohnak hnawmborh lonhnak cang tuh i. 2 Syria ramai khuate tu kumzangza in hlumhnak khua ah cang tuh i. Tuu le kawlpaw lenghnak lenpal cang tuhai ciami sumhnamte tu aisu inkhai hnawt tuh lo i. 3 Israel khai ṭanhnak nai lo i tuhai Damascus tu a zalenhnak pairal tuh i. Syria mi a nungsunte tu Israel mite bangin zakthi le mualpho in um tuh i. Kaimah Cungnungber Bawipa in rel zo ing,” tiin ti i. 4 Cen Bawipa in, “Israel ai thawmlianhnak a bo nia hleng cing tuh ihang; a lianhnak tu farahhnak ah thleng sah tuh i. 5 Israel tu rongkhawm ben zohnak lo bangin cang tuh i. Rong a khawmciahnak Rephraim lo ai phairawn bangin kolh tuh sio i. 6 Mi a tlawmniu ian nung tuh i. Israel tu, a thai loih sek ai a pardir ah pum hnih thum, a kak ah pum li nga a tanghnak olive kung bang i tuh i. Kaimah, Israel ai Bawipa Pathian in rel zo ing,” tiin ti i. 7 Cia nia a hleng fangin mite in amahte semsuahtu, Israel ai Pathian thianghlim hnenah bawmhnak daih in hoi tuh i. 8 Amahte ai kut in a bawn fawmhnak pulengte tu rinsan tuh nawn lo i; amahte kutzung ai a suakhnak Asherah pathian nu biahnak a zarhmi thingbirhnak tepawl le maitai hibawlhnak hrangah pulengte khai rinsan tuh nawn lo i. 9 Ciami nia a hleng fangin phatak niu ai kulhhnak khuate tu hlum tuh sio ai, Israel mite kih manin a tlantu Hiv mi le Amor mite ai khuapuite bangin, amahte khuate tu zam tlang tuh sio i. 10 Aw Israel, lungpui bangin na otu le na huptu Pathian khiah hai zo isi. Ramdang pathian bia tuhin vuan cianghlim bawn tum isi. Harsahnak le cak thil lo urhnak lek um tuh i. 11 Ikhalselai na bir ninghla rori ah khang ai a mum a par inrin rong khawm tuh tu nai tuh cuang lo isi. Harsahnak le cak thil lo urhnak lek um tuh i. Ralte Sung I 12 A hat ngaingai ramte tu buai tlang dekdo i. Anite buaihnak thawmvang tu tipui huk thawm le a roh ngai tilep thawm bang i. 13 Ralte tu tilep bangin mi nor tlang diamdo i; Ikhalselai Pathian in hau ai khel lamah let i; tlang vumai hli hmuthnak laivut bangin le simpai ai lanhnak fangcang kuangro bangin pairal ta i. 14 Zan lam fang tu tihikkul; ikhalselai zing lam fang tu pairal sio i! Kin ram a simtu hmuahhmuah in ciabang i tuh ṭen i. |
Zanniat Bible © Bible Society of Myanmar, 2018.
Bible Society of Myanmar